ເຈົ້າ​ໜ້າທີ່ ​ສປຊ ເສຍ​ຊີວິດ​ຈາກ​ເຫດການ​ຮຸນ​ແຮງ​ຢູ່​ໃນ​ລີ​ບີ

461 12 ສ.ຫ. 2019 ຂ່າວຕ່າງປະເທດ
ເຈົ້າ​ໜ້າທີ່ ​ສປຊ ເສຍ​ຊີວິດ​ຈາກ​ເຫດການ​ຮຸນ​ແຮງ​ຢູ່​ໃນ​ລີ​ບີ

    ແຫຼ່ງ​ຂ່າວ​ທາງ​ການ​ແພດ ແຈ້ງ​ໃຫ້​ຮູ້ເມື່ອ​ວັນ​ທີ 10 ສິງຫາ​ທີ່​ຜ່ານ​ມາ​ວ່າ ເຫດ​ລະເບີດ​ລາຍ​ໜຶ່ງ ທີ່​ໃຊ້​ລົດ​ເປັນ​ພາຫະນະ ໄດ້​ເກີດ​ຂຶ້ນ​ທີ່​ນະຄອນ ເບນ​ກາ​ຊີ (ພາກ​ຕາເວັນ​ອອກ​ຂອງ​ປະເທດ​ລີ​ບີ) ສົ່ງ​ຜົນ​ໃຫ້​ເຈົ້າ​ໜ້າທີ່​ຂອງ​ສະຫະ​ປະຊາ​ຊາດ (​ສປຊ) ເສຍ​ຊີວິດ 2 ຄົນ.

    ເຫດ​ລະເບີດ​ດັ່ງກ່າວ ເກີດ​ຂຶ້ນ​ຢູ່​ດ້ານ​ໜ້າ​ປະຕູ​ເຂົ້າ​ສູນ​ການ​ຄ້າ ແລະ ທະນາຄານ​ແຫ່ງ​ໜຶ່ງ ຊຶ່ງ​ເກີດ​ຂຶ້ນ​ທ່າມກາງ​ທີ່ ​ສປຊ ພວມ​ພະຍາຍາມ​ເປັນ​ຕົວ​ກາງ​ໄກ່​ເກ່ຍ ໃຫ້​ແກ່​ຂໍ້​ຕົກລົງ​ຢຸດ​ຍິງ ຢູ່​ໃນ​ນະຄອນຫຼວງ ຕຣີ​ໂປ​ລີ ຂອງ​ລີ​ບີ.

    ເຖິງ​ຢ່າງໃດ​ກໍ​ຕາມ ທ່ານ​ນາງ ບິນ​ຕູ ເກ​ອີ​ຕາ ຜູ້​ຊ່ວຍ​ວຽກ​ຂອງ​ເລຂາທິການ​ໃຫຍ່ ​ສປຊ ຖະແຫຼງ​ຕໍ່​ກອງ​ປະຊຸມ​ສຸກ​ເສີນ​ຂອງ​ສະພາ​ຄວາມ​ໝັ້ນຄົງ ​ສປຊ ເພື່ອ​ປຶກສາ​ຫາລື ກ່ຽວ​ກັບ​ສະພາບ​ການ ຢູ່​ໃນ​ລີ​ບີ ເມື່ອ​ວັນ​ທີ 10 ສິງຫາ ວ່າ ​ສປຊ ຈະ​ບໍ່​ອົບ​ພະ​ຍົບ​ເຈົ້າ​ໜ້າທີ່​ຂອງ​ຕົນ​ອອກ​ໄປ​ຈາກ​ລີ​ບີ ທ່າມກາງ​ທີ່​ເກີດ​ເຫດການ​ໂຈມ​ຕີ​ດັ່ງກ່າວ.

    ໃນ​ຂະນະ​ດຽວ​ກັນ ອົງການ​ອະນາໄມ​ໂລກ (WHO) ໃຫ້​ຮູ້​ວ່າ ນັບ​ແຕ່​ຕົ້ນ​ເດືອນ​ເມສາ​ປີ​ນີ້ ເປັນຕົ້ນ​ມາ ການ​ຍິງ​ຕໍ່ສູ້​ຢູ່​ໃນ​ລີ​ບີ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ 1.000 ກວ່າ​ຄົນ ບາດເຈັບ 5.700 ຄົນ ແລະ ມີ 120.000 ກວ່າ​ຄົນ ຕ້ອງ​ໄດ້​ອອກ​ໄປ​ຈາກ​ເຮືອນ​ຊານ​ເພື່ອ​ໜີ​ໄພ.

ຂ່າວທີ່ກ່ຽວຂ້ອງ