ມີ​ຜູ້​ເສຍ​ຊີວິດ​ຫຼາຍ​ສິບ​ຄົນ​ຈາກ​ໄພ​ທຳ​ມະ​ຊາດ​ຢູ່​ໃນ​ອິນ​ເດຍ

453 12 ສ.ຫ. 2019 ຂ່າວຕ່າງປະເທດ
ມີ​ຜູ້​ເສຍ​ຊີວິດ​ຫຼາຍ​ສິບ​ຄົນ​ຈາກ​ໄພ​ທຳ​ມະ​ຊາດ​ຢູ່​ໃນ​ອິນ​ເດຍ

   ວັນ​ທີ 11 ສິງຫາ​ນີ້ ລັດຖະບານ​ອິນ​ເດຍ ໄດ້​ຜັນ​ຂະຫຍາຍ​ຄວາມ​ພະຍາຍາມ ໃນ​ການ​ຊ່ວຍເຫຼືອ​ກູ້​ໄພ​ຄັ້ງ​ໃຫຍ່ ທ່າມກາງ​ທີ່​ຈຳນວນ​ຜູ້​ເສຍ​ຊີວິດ ແລະ ບາດເຈັບ​ຍ້ອນ​ຝົນຕົກ​ໜັກ ຢູ່​ທາງ​ພາກ​ຕາເວັນຕົກ ແລະ ພາກ​ໃຕ້​ອິນ​ເດຍ​ເພີ່ມ​ຂຶ້ນ ໂດຍ​ມີ​ຜູ້​ເສຍ​ຊີວິດ​ແລ້ວ 144 ຄົນ. ໃນ​ຂະນະ​ດຽວ​ກັນ ນ້ຳນອງ ກໍ​ເຮັດ​ໃຫ້​ເປັນ​ຜົນ​ກະທົບ​ຮ້າຍ​ແຮງ​ຕໍ່​ການ​ຄົມມະນາຄົມ ໃນ​ເມື່ອ​ມີ​ເສັ້ນທາງ 136 ສາຍ ຖືກ​ເປ່​ເພ ຫຼື​ຖືກ​ໂດດດ່ຽວ.

    ຢູ່​ໃນ​ລັດ ເກ​ຣາ​ລາ (ພາກ​ໃຕ້​ອິນ​ເດຍ) ເປັນ​ພື້ນ​ທີ່​ທີ່​ໄດ້​ຮັບ​ຄວາມ​ເສຍ​ຫາຍ​ໜັກໜ່ວງ​ທີ່​ສຸດ ໂດຍ​ໄລ່​ມາ​ຮອດ​ວັນ​ທີ 11 ສິງຫາ​ນີ້ ມີ​ລາຍ​ງານ​ຜູ້​ເສຍ​ຊີວິດ​ແລ້ວ​ຢ່າງ​ໜ້ອຍ 67 ຄົນ ແລະ ມີ​ຜູ້​ຕ້ອງ​ໄດ້​ອົບ​ພະ​ຍົບ​ໜີ​ໄພ​ນ້ຳ​ຖ້ວມ 165.000 ຄົນ ໄປ​ອາໄສ​ຢູ່​ໃນ​ຄ້າຍ​ອາໄສ​ຊົ່ວຄາວ 1.318 ແຫ່ງ ຢູ່​ໃນ 4 ເມືອງ​ຂອງ​ລັດ​ນີ້.

    ຈຳນວນ​ຜູ້​ເສຍ​ຊີວິດ​ຍ້ອນ​ນ້ຳນອງ​ຢູ່​ໃນ​ລັດ ກາ​ນາ​ຕາ​ກາ ໄດ້​ຮັບ​ການ​ຢັ້ງຢືນ​ຢູ່​ທີ່ 34 ຄົນ ຫາຍ​ສາບ​ສູນ 14 ຄົນ ແລະ ຜູ້​ອົບ​ພະ​ຍົບ​ໜີ​ໄພ​ນ້ຳ​ຖ້ວມ ມີ 300.000 ຄົນ ໄປ​ອາໄສ​ຢູ່​ໃນ​ສູນ​ຮອງ​ຮັບ​ຊົ່ວຄາວ 1.100 ແຫ່ງ.

    ສ່ວນ​ຢູ່​ໃນ​ລັດ ມາ​ຮາ​ຣາ​ຕຣາ ຄາດ​ວ່າ​ມີ​ຜູ້​ເສຍ​ຊີວິດ 29 ຄົນ ຈາກ​ສະພາບ​ຝົນຕົກ​ໜັກ ພາໃຫ້​ເກີດ​ນ້ຳ​ຖ້ວມ​ໃນ​ຫຼາຍ​ວັນ​ທີ່​ຜ່ານ​ມາ.

     ກ່ອນ​ໜ້າ​ນັ້ນ ນ້ຳນອງ​ທີ່​ເກີດ​ຈາກ​ຝົນຕົກ​ໜັກ​ຢູ່​ໃນ​ລັດ ພິຫານ ແລະ ລັດ ​ອັສ​ສຳ ຂອງ​ອິນ​ເດຍ ໄດ້​ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 200 ກວ່າ​ຄົນ.

ຂ່າວທີ່ກ່ຽວຂ້ອງ