ເຂົ້າກຸ່ມກະສິກຳອິນຊີປູກຜັກຂາຍ ສ້າງລາຍຮັບເດືອນລະ 2 ລ້ານກີບ

410 12 ສ.ຫ. 2019 ຂ່າວໜ້າ​ໜຶ່ງ
ເຂົ້າກຸ່ມກະສິກຳອິນຊີປູກຜັກຂາຍ ສ້າງລາຍຮັບເດືອນລະ 2 ລ້ານກີບ

    ປັດ­ຈຸ­ບັນ ຂະ­ແໜງ­ການ​ກ່ຽວ­ຂ້ອງ​ໄດ້​ຊຸກ­ຍູ້-ສົ່ງ­ເສີມ​ໃຫ້​ປະ­ຊາ­ຊົນ​ປູກ​ຜັກ​ປອດ​ສານ­ພິດ ເພື່ອ​ສະ­ໜອງ​ໃຫ້​ຕະ­ຫຼາດ ກໍ​ຄື ຜູ້​ບໍ­ລິ­ໂພກ​ຫຼາຍ​ຂຶ້ນ ເພື່ອ​ແນ­ໃສ່​ຮັກ­ສາ​ສຸ­ຂະ­ພາບ​ຂອງ​ຜູ້​ປູກ ແລະ ຜູ້​ບໍ­ລິ­ໂພກ ພ້ອມ​ນີ້ ຍັງ​ສາ ມາດ​ສ້າງ​ລາຍ​ຮັບ​ໃຫ້​ຊາວ​ສວນ​ໄດ້​ເປັນ​ຢ່າງ​ດີ ດັ່ງ​ທ່ານ​ນາງ ບົວ​ໄລ ພິມ​ມະ​ສອນ ເປັນ​ບຸກ­ຄົນ​ໜຶ່ງ​ທີ່​ເຂົ້າ​ກຸ່ມ​ກະ­ສິ­ກຳ​ອິນ​ຊີ​ບ້ານ​ທ່າ​ຊ້າງ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ເພື່ອ​ປູກ​ຜັກ​ປອດ​ສານ­ພິດ​ຂາຍ ສາ­ມາດ​ສ້າງ​ລາຍ​ຮັບ​ໃຫ້​ຄອບ­ຄົວ​ໄດ້​ດີ​ສົມ­ຄວນ.

    ທ່ານ​ນາງ ບົວ​ໄລ ພິມ​ມະ​ສອນ ໃຫ້​ສຳ­ພາດ​ວ່າ: ແຕ່​ກ່ອນ​ຕົນ​ມີ​ອາ­ຊີບ​ເຮັດ​ນາ ພາຍ­ຫຼັງ​ດຳ­ນາ​ແລ້ວ​ກໍ​ໄດ້​ລົງ­ມື​ປູກ​ຜັກ​ຂາຍ ໂດຍ​ປູກ​ແບບ​ທົ່ວ​ໄປ ມາ​ຮອດ​ປີ 2010 ພັກ ແລະ ລັດ­ຖະ­ບານ ກໍ​ຄື ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ ໄດ້​ລະ­ດົມ​ໃຫ້​ປະ­ຊາ­ຊົນ​ຢູ່​ໃນ​ບ້ານ​ທ່າ​ຊ້າງ ເຕົ້າ­ໂຮມ​ກັນ​ສ້າງ­ຕັ້ງ​ກຸ່ມ​ຜະ­ລິດ​ກະ­ສິ­ກຳ​ອິນ​ຊີ​ເປັນ​ສິນ­ຄ້າ ຕົນ​ກໍ​ໄດ້​ເຂົ້າ​ຮ່ວມ​ເປັນ​ສະ­ມາ­ຊິກ ເຊິ່ງ​ເບື້ອງ​ຕົ້ນ​ໄດ້​ປູກ​ຜັກ​ສະ­ຫຼັດ ໝາກ­ເຂືອ ແລະ ຫອມ­ລາບ ເນື້ອ­ທີ່ 1 ໄລ່ ປັດ­ຈຸ­ບັນ ໄດ້​ຂະ­ຫຍາຍ​ເນື້ອ­ທີ່​ເປັນ 1 ເຮັກ­ຕາ ໃນ​ນີ້​ປູກ​ໝາກ­ກ້ວຍ ໝາກ­ເຜັດ ໝາກ­ຖົ່ວ ໝາກ​ສີ­ດາ ຫອມ­ປ້ອມ ຜັກ​ກາດ ແລະ ຜັກ​ບົວ ຂາຍ 15.000-25.000 ກີບ​ຕໍ່​ກິ​ໂລ ສ້າງ​ລາຍ​ຮັບ​ໃຫ້​ຄອບ­ຄົວ​ສະ­ເລ່ຍ 2 ລ້ານ​ກີບ​ຕໍ່​ເດືອນ ໂດຍ​ຕະ­ຫຼາດ​ຈຳ­ໜ່າຍ​ວັນ​ເສົາ​ຂາຍ​ຢູ່​ເດີ່ນ​ສູນ​ການ​ຄ້າ ລາວ-ໄອ​ເຕັກ ແລະ ວັນ​ຈັນ ວັນ​ພະ­ຫັດ ຂາຍ​ຢູ່​ດົງ​ໂດກ.

    ປັດ­ຈຸ­ບັນ ກຸ່ມ​ກະ­ສິ­ກຳ​ອິນ​ຊີ​ທ່າ​ຊ້າງ ມີ​ສະ­ມາ­ຊິກ 111 ຄອບ­ຄົວ ເນື້ອ­ທີ່ 122 ເຮັກ­ຕາ ມີ​ເຮືອນ​ຮົ່ມ​ປູກ​ຜືດ​ຜັກ 352 ຫຼັງ ໄລ­ຍະ​ຜ່ານ​ມາ ກໍ​ຄື ປັດ­ຈຸ­ບັນ​ບັນ­ດາ​ຂະ­ແໜງ­ການ​ກ່ຽວ­ຂ້ອງ​ໄດ້​ໃຫ້­ການ​ຊຸກ­ຍູ້-ສົ່ງ­ເສີມ​ດ້ານ​ວິ­ຊາ​ການ​ປູກ​ຜັກ​ປອດ​ສານ­ພິດ ໂດຍ​ການ​ຈັດ​ເຝິກ­ອົບ­ຮົມ​ດ້ານ​ທິດ​ສະ​ດີ ແລະ ພາກ​ປະ­ຕິ­ບັດ​ຕົວ​ຈິງ ແນ­ໃສ່​ຮັບ­ປະ­ກັນ​ໃຫ້​ໄດ້­ຜົນ​ຜະ­ລິດ​ທີ່​ດີ ພ້ອມ​ນີ້ ຍັງ​ໄດ້​ຈັດ​ສັນ​ຫາ​ຕະ­ຫຼາດ​ຈຳ­ໜ່າຍ​ໃຫ້​ຕື່ມ​ອີກ ສັງ​ລວມ​ແລ້ວ​ຜ່ານ​ການ​ເຂົ້າ​ກຸ່ມ​ປູກ​ຜັກ​ປອດ​ສານ­ພິດ​ຂາຍ ໄດ້​ເຮັດ​ໃຫ້​ຊີ­ວິດ​ການ​ເປັນ​ຢູ່​ຄອບ­ຄົວ​ຕົນ​ດີ​ຂຶ້ນ ເຮັດ​ໃຫ້​ມີ​ສຸ­ຂະ­ພາບ​ແຂງ­ແຮງ ເພະ​ບໍ່​ໄດ້​ນຳ​ໃຊ້​ສານ​ເຄ​ມີ ນອກ​ນີ້ ຜູ້​ບໍ­ລິ­ໂພກ​ກໍ​ໄດ້​ຮັບ​ພືດ​ຜັກ​ທີ່​ປອດ​ໄພ​ອີກ​ດ້ວຍ.

ຂ່າວທີ່ກ່ຽວຂ້ອງ