ນວ ເລັ່ງໃສ່ການຜະລິດເຂົ້າພືດຜັກໃນ 3 ເມືອງ

1.220 09 ສ.ຫ. 2019 ຂ່າວໜ້າ​ໜຶ່ງ

    ໂຄງ­ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ຢູ່​ນະ­ຄອນ­ຫຼວງ​ວຽງ​ຈັນ (ນວ) ເປັນ​ໂຄງ­ການ​ໜຶ່ງ​ທີ່​ນອນ​ຢູ່​ໃນ​ໂຄງ­ການ​ຜະ­ລິດ​ເປັນ​ສິນ­ຄ້າ ຢູ່ 4 ແຂວງ​ເປົ້າ​ໝາຍ ທີ່​ໄດ້​ຮັບ​ທຶນ​ກູ້​ຢືມ​ດອກ​ເບ້ຍ​ຕ່ຳ 25 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 217,3 ຕື້​ກີບ ຈາກ​ທະ­ນາ­ຄານ​ໂລກ ໄລ­ຍະ​ການ​ດຳ­ເນີນ​ໂຄງ­ການ​ແຕ່​ປີ 2018-2024.

    ທ່ານ ສອນ​ໄຊ ກົມ​ໄຊ­ຊະ­ນະ ຮອງ​ຫົວ­ໜ້າ​ຂະ­ແໜງ​ປູກ­ຝັງ ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ຜູ້​ປະ­ສານ​ງານ​ໂຄງ­ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ນວ ກ່າວ​ໃນ​ກອງ​ປະ­ຊຸມ​ເປີດ​ກວ້າງ ຄັ້ງ​ທີ 7 ສະ­ໄໝ​ທີ VI ຂອງ​ຄະ­ນະ​ພັກ​ຮາກ​ຖານ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ເມື່ອ​ບໍ່​ດົນ​ມາ​ນີ້​ວ່າ: ໂຄງ­ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ​ຢູ່ ນວ ກະ­ກຽມ​ມາ​ແຕ່​ທ້າຍ​ປີ 2017 ເປັນ­ຕົ້ນ​ມາ ແລະ ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ເປັນ​ທາງ​ການ​ໃນ​ເດືອນ​ຕຸ­ລາ 2018.

    ຈົນ​ເຖິງ​ປັດ­ຈຸ­ບັນ ເປົ້າ​ໝາຍ​ໂຄງ­ການ​ແມ່ນ​ເລັ່ງ​ໃສ່​ປັບ­ປຸງ​ຕ໋ອງ​ໂສ້​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ຕາມ​ມາດ­ຕະ­ຖານ​ກະ­ສິ­ກຳ​ສະ­ອາດ ນັບ​ແຕ່​ຂອດ​ການ​ຜະ­ລິດ​ຈົນ​ຮອດ​ຂອດ​ປຸງ​ແຕ່ງ ແລະ ການ­ຈຳ­ໜ່າຍ ໃນ​ນີ້ ໄດ້​ເລັ່ງ​ໃສ່​ການ​ຜະ­ລິດ​ເຂົ້າ ແລະ ພືດ​ຜັກ​ເປັນ­ຕົ້ນ​ຕໍ​ຢູ່​ເຂດ​ຈຸດ​ສຸມ ເມືອງ​ຫາດ​ຊາຍ​ຟອງ ໄຊ​ທາ­ນີ ແລະ ເມືອງ​ປາກ​ງື່ມ.

    ໂຄງ­ການ​ນີ້ ຖືກ​ຈັດ​ຕັ້ງ​ປະ­ຕິ­ບັດ​ຮ່ວມ​ກັນ ລະ­ຫວ່າງ​ຂະ­ແໜງ​ກະ­ສິ­ກຳ ແລະ ຂະ­ແໜງ­ການ​ຄ້າ ໂດຍ​ນຳ​ໃຊ້​ເຕັກ­ນິກ​ການ​ຜະ­ລິດ​ຫັນ​ເປັນ​ທັນ​ສະ­ໄໝ ນຳ​ໃຊ້​ກົນ​ຈັກ​ເພື່ອ​ປະ­ຢັດ​ຕົ້ນ​ທຶນ ໄດ້​ຮັບ​ຜົນ​ຜະ­ລິດ​ສູງ ແລະ ທີ່​ມີ​ຄຸນ​ນະ​ພາບ ເຮັດ​ໃຫ້​ປະ­ຊາ­ຊົນ​ມີ​ຜົນ​ກຳ­ໄລ​ຈາກ​ການ​ຜະ­ລິດ​ເພີ່ມ​ຂຶ້ນ ການ​ປັບ­ປຸງ​ແນວ​ພັນ ມາດ­ຕະ­ຖານ​ການ​ຄຸ້ມ​ຄອງ​ການ​ຜະ­ລິດ​ທີ່​ດີ​ຂອງ​ໂຮງ­ສີ ຂອດ​ການ​ສົ່ງ­ເສີມ ລະ­ບົບ​ກົນ​ຈັກ ການ​ເກັບ​ກ່ຽວ ໂຮງ​ອົບ ສາງ ແລະ ຕິດ​ພັນ​ກັບ​ການ​ປຸງ​ແຕ່ງ ການ­ຈັດ­ຕັ້ງ​ການ​ພົວ­ພັນ​ການ​ຜະ­ລິດ ການ​ສຳ­ພັນ​ເສດ­ຖະ­ກິດ ການ​ຢັ້ງ­ຢືນ​ມາດ­ຕະ­ຖານ​ຄຸນ​ນະ​ພາບ ໂດຍ​ອີງ­ໃສ່​ນະ­ໂຍ­ບາຍ​ຂອງ​ລັດ­ຖະ­ບານ ທີ່​ແນ­ໃສ່​ການ​ຜະ­ລິດ​ກະ­ສິ­ກຳ​ສະ­ອາດ ແລະ ປັດ​ໄຈ​ອື່ນໆ ຜ່ານ​ການ­ຈັດ­ຕັ້ງ​ໄລ­ຍະ 6 ເດືອນ​ຕົ້ນ​ປີ 2019 ກຸ່ມ​ຜູ້​ຜະ­ລິດ​ແນວ​ພັນ​ເຂົ້າ​ຮຸ່ນ 3 ຈັດ​ຕັ້ງ​ກຸ່ມ​ໄດ້ 4 ກຸ່ມ 4 ບ້ານ ມີ​ສະ­ມາ­ຊິກ 74 ຄົນ ເນື້ອ­ທີ່ 46,64 ເຮັກ­ຕາ ຜະ­ລິດ​ແນວ​ພັນ​ເຂົ້າ­ທ່າ​ດອກ​ຄຳ 8 ກຸ່ມ ຜູ້​ຜະ­ລິດ​ເປັນ​ສິນ­ຄ້າ​ຈັດ​ຕັ້ງ​ກຸ່ມ​ໄດ້ 6 ກຸ່ມ ສະ­ມາ­ຊິກ 302 ຄົນ ເນື້ອ­ທີ່ 375,36 ເຮັກ­ຕາ ສະ­ໜອງ​ແນວ​ພັນ​ເຂົ້າ​ຮຸ່ນ 3 ທ່າ​ດອກ​ຄຳ 8 ໃຫ້​ກຸ່ມ​ຜະ­ລິດ​ເຂົ້າ​ເປັນ​ສິນ­ຄ້າ 3 ກຸ່ມ​ເປົ້າ​ໝາຍ​ຂອງ​ໂຄງ­ການ 5.020 ກິ​ໂລ ໃນ​ນີ້ ກຸ່ມ​ໜອງ​ພົງ 1.830 ກິ​ໂລ ກຸ່ມ​ທ່າ​ເດື່ອ ສິງ​ຫອມ 1.610 ກິ​ໂລ ກຸ່ມ​ບ້ານ​ໂດນ 1.580 ກິ​ໂລ  ສ່ວນ​ກຸ່ມ​ຜູ້​ຜະ­ລິດ​ພືດ​ຜັກ​ເປັນ​ສິນ­ຄ້າ ຈັດ​ຕັ້ງ​ໄດ້ 6 ກຸ່ມ (OA:4 ກຸ່ມ GAP 2 ກຸ່ມ) ສະ­ມາ­ຊິກ 258 ຄົນ ເນື້ອ­ທີ່ 214,13 ເຮັກ­ຕາ (OA:191,88 ເຮັກ­ຕາ GAP:22,25 ເຮັກ­ຕາ).

    ສຳ­ລັບ​ທິດ​ທາງ 6 ເດືອນ​ທ້າຍ​ປີ 2019 ຈະ​ເລັ່ງ​ໃສ່​ການ­ຈັດ­ຕັ້ງ​ກຸ່ມ​ຜູ້​ຜະ­ລິດ​ໃຫ້​ສຳ­ເລັດ ຕາມ​ຂໍ້​ຕົກ­ລົງ​ຂອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ວ່າ​ດ້ວຍ​ການ​ສ້າງ­ຕັ້ງ ແລະ ຄຸ້ມ​ຄອງ​ກຸ່ມ​ຜູ້​ຜະ­ລິດ​ກະ­ສິ­ກຳ 9 ກຸ່ມ ໃນ​ນີ້ ກຸ່ມ​ຜູ້​ຜະ­ລິດ​ແນວ​ພັນ​ເຂົ້າ​ຮຸ່ນ 3 ຈຳ­ນວນ 1 ກຸ່ມ ກຸ່ມ​ຜູ້​ຜະ­ລິດ​ເຂົ້າ​ເປັນ​ສິນ­ຄ້າ 4 ກຸ່ມ ກຸ່ມ​ຜູ້​ຜະ­ລິດ​ພືດ​ຜັກ​ເປັນ​ສິນ­ຄ້າ 4 ກຸ່ມ ເລັ່ງ​ໃສ່​ສ້າງ​ຄວາມ​ເຂັ້ມ­ແຂງ​ໃຫ້​ຄະ­ນະ​ບໍ­ລິ­ຫານ​ງານ​ກຸ່ມ ແລະ ສະ­ມາ­ຊິກ​ກຸ່ມ​ຜູ້​ຜະ­ລິດ​ທີ່​ໄດ້​ຈັດ​ຕັ້ງ​ແລ້ວ ແລະ ກຳ­ລັງ​ຈັດ​ຕັ້ງ 25 ກຸ່ມ ແລະ ອື່ນໆ.

ຂ່າວທີ່ກ່ຽວຂ້ອງ