ເຈົ້າຄອງ ເນັ້ນໃຫ້ເມືອງສັງທອງ ສືບຕໍ່ຊຸກຍູ້-ສົ່ງເສີມທຸກການລົງທຶນຂອງເອກະຊົນ

840 09 ສ.ຫ. 2019 ຂ່າວໜ້າ​ໜຶ່ງ
ເຈົ້າຄອງ ເນັ້ນໃຫ້ເມືອງສັງທອງ ສືບຕໍ່ຊຸກຍູ້-ສົ່ງເສີມທຸກການລົງທຶນຂອງເອກະຊົນ

    ກອງ​ປະ­ຊຸມ​ຊຸກ­ຍູ້​ຂະ​ບວນ​ແຂ່ງ­ຂັນ “ຮັກ​ຊາດ ແລະ ພັດ­ທະ­ນາ” ຂອງ​ນັກ­ທຸ­ລະ­ກິດ​ເຂົ້າ​ສູ່​ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 8 ສິງ­ຫາ 2019 ຢູ່​ເມືອງ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ ດາວ​ເພັດ ອາ​ລຸນ ເຈົ້າ­ເມືອງ​ສັງ​ທອງ ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ບັນ­ດາ​ເຈົ້າ­ເມືອງ ພະ­ແນກ­ການ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ດາວ​ເພັດ ອາ​ລຸນ ກ່າວ​ວ່າ: ໂດຍ​ປະ­ຕິ­ບັດ​ຕາມ​ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ IV ຂອງ​ອົງ­ຄະ​ນະ​ພັກ​ເມືອງ ຄາດ­ໝາຍ​ສູ້​ຊົນ​ໃນ​ປີ 2020 ລວມ​ຍອດ​ຜະ­ລິດ​ຕະ​ພັນ​ພາຍ​ໃນ​ໃຫ້​ບັນ­ລຸ 574,08 ຕື້​ກີບ ສະ­ເລ່ຍ​ລາຍ​ໄດ້ 16,58 ລ້ານ​ກີບ​ຕໍ່​ຄົນ​ຕໍ່​ປີ ສະ­ເພາະ​ປີ 2018 ປະ­ຕິ­ບັດ​ລາຍ​ຮັບ​ໄດ້ 6,8 ຕື້​ກີບ ລື່ນ​ແຜນ­ການ 20,27% ສ່ວນ​ປີ 2019 ແມ່ນ 7,5 ຕື້​ກີບ ຜ່ານ​ການ​ປະ­ຕິ­ບັດ 7 ເດືອນ​ຜ່ານ​ມາ ໄດ້ 4,4 ຕື້​ກີບ ທຽບ­ໃສ່​ແຜນ­ການ​ປີ ປະ­ຕິ­ບັດ​ໄດ້ 58,76% ການ​ຂຸດ​ຄົ້ນ​ແຫຼ່ງ​ລາຍ​ຮັບ​ສ່ວນ​ໃຫຍ່​ມາ​ຈາກ​ການ​ເກັບ​ອາ­ກອນ 3,7 ຕື້​ກີບ ເທົ່າ​ກັບ 58,22% ແລະ ຊັບ​ສິນ 680 ລ້ານ​ກີບ ເທົ່າ​ກັບ 61,91% ນອກ​ນີ້ ຍັງ​ໄດ້​ເອົາ­ໃຈ­ໃສ່​ແກ້​ໄຂ​ປາ­ກົດ­ການ​ຫຍໍ້­ທໍ້​ຕາມ​ທິດ 3 ຫຼຸດ 3 ເພີ່ມ ແລະ 3 ຂະ​ບວນ​ການ ເຮັດ​ໃຫ້​ບັນ­ຫາ​ຢາ​ເສບ​ຕິດ​ມີ​ທ່າ​ອ່ຽງ​ຫຼຸດ​ລົງ ອຸ­ບັດ­ເຫດ ອັກ­ຄີ​ໄພ​ມີ​ໜ້ອຍ ຮັກ­ສາ​ໄດ້​ຄວາມ​ສະ­ຫງົບ​ທົ່ວ​ສັງ­ຄົມ ເນື່ອງ​ຈາກ​ໄດ້​ຫັນ​ເອົາ​ພະ­ນັກ­ງານ​ລົງ​ກໍ່­ສ້າງ​ຮາກ​ຖານ​ກັບ​ທີ່ ແລະ ປະ­ຈຳ​ບ້ານ ເພື່ອ​ຊີ້​ນຳ-ນຳ­ພາ​ບ້ານ​ແກ້​ໄຂ ຕິດ​ພັນ​ກັບ​ການ​ພັດ­ທະ­ນາ​ບ້ານ​ໄປ​ພ້ອມ​ກັນ ໄດ້​ສະ­ແດງ​ອອກ​ການ​ປັບ­ປຸງ​ປົວ­ແປງ​ພັກ ແລະ ກຳ­ນົດ​ແຜນ​ພັດ­ທະ­ນາ​ບ້ານ ໄປ​ຕາມ​ທິດ​ນະ­ໂຍ­ບາຍ​ຂອງ​ເມືອງ​ກຳ­ນົດ​ໄວ້.

    ການ​ພັດ­ທະ­ນາ​ເມືອງ​ໄດ້​ສຸມ​ໃສ່ 3 ເຂດ ຄື: ເຂດ​ນ້ຳ​ຕອນ​ລຽບ​ພູ​ພະ­ນັງ ກຳ­ນົດ​ເປັນ​ເຂດ​ກະ­ສິ­ກຳ ຕິດ​ພັນ​ກັບ​ການ­ທ່ອງ­ທ່ຽວ​ທາງ​ປະ­ຫວັດ­ສາດ ເຊິ່ງ​ໄດ້​ຊຸກ­ຍູ້-ສົ່ງ­ເສີມ​ປະ­ຊາ­ຊົນ​ຈັດ​ຕັ້ງ​ເປັນ​ກຸ່ມ​ຜະ­ລິດ​ເຂົ້າ​ອິນ​ຊີ ພືດ-ຜັກ​ປອດ​ສານ­ພິດ ແລະ ຫັດ­ຖະ­ກຳ ເຂດ​ທາງ​ເລກ​ທີ 11 ລຽບ​ຕາມ​ແມ່­ນ້ຳ​ຂອງ ກຳ­ນົດ​ເປັນ​ເຂດ​ຜະ­ລິດ​ກະ­ສິ­ກຳ ອຸດ­ສາ­ຫະ­ກຳ ແລະ ການ​ບໍ­ລິ­ການ ຕິດ​ພັນ​ກັບ​ການ​ສົ່ງ­ເສີມ​ການ​ປູກ​ເຂົ້າ ປູກ​ພືດ​ລົ້ມ​ລຸກ ຂຸດ​ຄົ້ນ​ແຮ່​ທາດ ໂຮງ​ຈັກ-ໂຮງ­ງານ​ຕ່າງໆ ແລະ ເຂດ​ລຽບ​ຕາມ​ສາຍ​ນ້ຳ​ສັງ ກຳ­ນົດ​ເປັນ​ເຂດ​ກະ­ສິ­ກຳ ແລະ ການ­ທ່ອງ­ທ່ຽວ​ດ້ານ​ທຳ​ມະ​ຊາດ ໃນ​ນີ້ ໄດ້​ສົ່ງ­ເສີມ​ການ​ປູກ​ເຂົ້າ ພືດ-ຜັກ ໄມ້​ໃຫ້​ໝາກ ພືດ​ອຸດ­ສາ­ຫະ­ກຳ ໄມ້​ອຸດ­ສາ­ຫະ­ກຳ ລ້ຽງ­ສັດ​ເປັນ​ຟາມ ແລະ ຊຸກ­ຍູ້-ສົ່ງ­ເສີມ​ການ​ສ້າງ­ຕັ້ງ​ກຸ່ມ​ຜະ­ລິດ​ຫັດ­ຖະ­ກຳ​ໄມ້­ປ່ອງ ນອກ​ນີ້ ຍັງ​ໄດ້​ກຳ­ນົດ 4 ຂົງ­ເຂດ​ວຽກ​ງານ 112 ໂຄງ­ການ ໃນ​ນີ້ ຂົງ­ເຂດ​ເສດ­ຖະ­ກິດ 53 ໂຄງ­ການ ວັດ​ທະ ນະ​ທຳ-ສັງ­ຄົມ 27 ໂຄງ­ການ ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ 12 ໂຄງ­ການ ບໍ­ລິ­ຫານ​ລັດ 21 ໂຄງ­ການ ປັດ­ຈຸ­ບັນ​ແມ່ນ​ທ້າຍ​ສະ­ໄໝ​ຂອງ​ກອງ​ປະ­ຊຸມ ໃນ​ໂອ­ກາດ​ເປີດ​ຂະ​ບວນ​ການ​ຮັກ​ຊາດ ແລະ ພັດ­ທະ­ນາ ຕິດ​ພັນ​ກັບ​ຮັກ ນວ ຂອງ​ພາກ​ທຸ­ລະ​ກິດ​ຢູ່​ເມືອງ​ສັງ​ທອງ ແລະ ເພື່ອ​ດຶງ​ດູດ​ການ​ລົງ­ທຶນ​ມາ­ສູ່​ເມືອງ​ສັງ​ທອງ ຕ້ອງ​ສຸມ​ໃສ່​ຂົງ­ເຂດ​ເສດ­ຖະ­ກິດ ແລະ ຂົງ­ເຂດ​ວັດ­ທະ­ນະ­ທຳ-ສັງ­ຄົມ ທີ່​ນອນ​ໃນ 3 ເຂດ​ພັດ­ທະ­ນາ​ຫຼັກ.

    ທ່ານ ສິນ​ລະ​ວົງ ຄຸດ​ໄພ­ທູນ ໄດ້​ເນັ້ນ​ໃຫ້​ເມືອງ​ສັງ​ທອງ​ສືບ­ຕໍ່​ສົ່ງ­ເສີມ​ທຸກ​ການ​ລົງ­ທຶນ​ຂອງ​ພາກ​ເອ­ກະ​ຊົນ ທີ່​ເຫັນ​ວ່າ​ຈະ​ຊ່ວຍ​ໃຫ້​ເມືອງ​ມີ​ການ​ພັດ­ທະ­ນາ ຮັບ­ປະ­ກັນ​ໃຫ້​ຊົນ­ນະ­ບົດ ແລະ ຕົວ​ເມືອງ ມີ​ຈັງ­ຫວະ​ການ​ພັດ­ທະ­ນາ​ທີ່​ຍັບ​ມໍ່​ເຂົ້າ​ໃກ້​ກັນ ສົ່ງ­ເສີມ​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ​ໃຫ້​ຫຼາຍ​ຂຶ້ນ ແລະ ຖື​ເອົາ​ກະ­ສິ­ກຳ​ສະ­ອາດ​ເປັນ​ທ່າ­ແຮງ ໂດຍ​ນຳ​ໃຊ້​ເຕັກ­ນິກ​ວິ­ທະ­ຍາ ສາດ ວິ­ທະ­ຍາ​ການ​ໃນ​ການ​ຜະ­ລິດ ແລະ ຊ່ວຍ­ເຫຼືອ ຄຽງ​ຄູ່​ກັບ​ການ​ສ້າງ​ພະ­ນັກ­ງານ ນັກ​ພັດ­ທະ­ນາ​ທ້ອງ­ຖິ່ນ​ກັບ​ທີ່ ແລະ ເປັນ​ຕົວ​ແບບ​ຂອງ​ການ​ພັດ­ທະ­ນາ​ໃຫ້​ເປັນ​ຮູບ​ປະ​ທຳ​ຫຼາຍ​ຂຶ້ນ ຄຽງ​ຄູ່​ກັບ​ອົງ​ການ­ຈັດ­ຕັ້ງ​ລັດ ພາກ​ທຸ­ລະ​ກິດ​ເປັນ​ກຳ­ລັງ​ແຮງ​ທີ່​ສຸດ ສະ­ນັ້ນ ຈຶ່ງ​ຮຽກ­ຮ້ອງ​ພາກ​ທຸ­ລະ​ກິດ​ເຂົ້າ​ມາ​ມີ​ສ່ວນ​ຮ່ວມ​ໃນ​ການ​ແຂ່ງ­ຂັນ​ຮັກ​ຊາດ ແລະ ພັດ­ທະ­ນາ ຕິດ​ພັນ​ກັບ​ການ​ຮັກ ນວ ຊຸກ­ຍູ້​ວຽກ​ງານ 3 ສ້າງ 3 ຫຼຸດ 3 ເພີ່ມ 3 ຂະ​ບວນ​ການ ແລະ 3 ເພື່ອ ໃຫ້​ເປັນ​ຂະ​ບວນ​ການ​ຟົດ­ຟື້ນ​ຫຼາຍ​ຂຶ້ນ ປຸກ­ລະ­ດົມ​ທຸກ​ພາກ­ສ່ວນ​ມີ​ສ່ວນ​ຮ່ວມ​ເປັນ​ເຈົ້າ​ການ​ດຶງ​ດູດ​ການ​ລົງ­ທຶນ ຊອກ​ຕະ­ຫຼາດ ແລະ ຊຸກ­ຍູ້​ໃຫ້​ເປັນ​ຫົວ­ໜ່ວຍ​ທຸ­ລະ​ກິດ​ປະ­ກອບ­ສ່ວນ​ໃນ​ວຽກ​ງານ​ແຂ່ງ­ຂັນ​ພັດ­ທະ­ນາ​ຊົນ­ນະ­ບົດ ເພື່ອ​ສ້າງ​ໃຫ້ ນວ ມີ​ໃບ​ໜ້າ​ໃໝ່ ມີ​ການ​ປ່ຽນ­ແປງ ແລະ ພັດ­ທະ­ນາ​ເປັນ​ກ້າວໆ.

ຂ່າວທີ່ກ່ຽວຂ້ອງ