ຂ່າວຫຼ້າສຸດ

ສີໂຄດຕະບອງ ປະກາດສ້າງຕັ້ງກອງຮ້ອຍກຳລັງສຳຮອງ

1.115 09 ສ.ຫ. 2019 ຂ່າວໜ້າ​ໜຶ່ງ

    ພິ­ທີ​ປະ­ກາດ​ສ້າງ­ຕັ້ງ​ກອງ­ຮ້ອຍ​ກຳ­ລັງ​ສຳ­ຮອງ ຂອງ​ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ (ນວ) ຈັດ​ຂຶ້ນ​ວັນ​ທີ 7 ສິງ­ຫາ 2019 ຢູ່​ກອງ​ບັນ­ຊາ​ການ​ທະ­ຫານ​ເມືອງ​ດັ່ງ­ກ່າວ ໂດຍ​ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ທ່ານ​ນາງ ພູ​ວຽງ ແກ້ວ​ວົງ​ວິ­ຈິດ ເຈົ້າ­ເມືອງ​ສີ​ໂຄດ​ຕະ­ບອງ ທ່ານ ພັອ ສີ ທະ­ວີ​ໄຊ ຫົວ­ໜ້າ​ການ​ທະ­ຫານ ກອງ​ບັນ­ຊາ​ການ​ທະ­ຫານ ນວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ພັອ ບຸນ​ວານ ພົມ​ມະ​ວົງ ຫົວ­ໜ້າ​ຫ້ອງ­ການ​ເສ­ນາ​ທິ​ການ ກອງ​ບັນ­ຊາ​ການ​ທະ­ຫານ ນວ ກ່າວ​ວ່າ: ການ​ສ້າງ­ຕັ້ງ​ກອງ­ຮ້ອຍ​ກຳ­ລັງ​ສຳ­ຮອງ​ທະ­ຫານ​ຮາບ​ທີ 1 ຢູ່​ເມືອງ​ສີ​ໂຄດ​ຕະ­ບອງ ເປັນ​ກອງ­ຮ້ອຍ​ທີ 4 ຂອງ ນວ ໂດຍ​ມີ​ພາ­ລະ​ບົດ­ບາດ ສິດ ແລະ ໜ້າ­ທີ່​ໃນ​ການ​ເປັນ​ກອງ​ໜູນ​ໃຫ້​ກຳ­ລັງ​ປະ­ຈຳ­ການ​ຂອງ​ກອງ­ທັບ​ເມື່ອ​ມີ​ຄວາມ​ຈຳ­ເປັນ ເຊິ່ງ​ປະ­ກອບ​ດ້ວຍ​ກຳ­ລັງ​ພົນ ແລະ ພາ­ຫະ­ນະ​ເຕັກ­ນິກ​ສຳ­ຮອງ ເປັນ​ເຈົ້າ​ການ​ເຂົ້າ​ຮ່ວມ​ວຽກ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ​ຢູ່​ທ້ອງ­ຖິ່ນ​ຕົນ ເພື່ອ​ປະ­ກອບ ສ່ວນ​ປົກ​ປັກ​ຮັກ­ສາ​ຄວາມ​ສະ­ຫງົບ ແລະ ຄວາມ​ເປັນ​ລະ­ບຽບ​ຮຽບ​ຮ້ອຍ​ຂອງ​ຊາດ ແລະ ປະ­ຕິ­ບັດ​ຄຳ​ສັ່ງ​ເອີ້ນ ເຕົ້າ­ໂຮມ​ຫັດ​ແອບ ແລະ ກວດ­ກາ​ຄວາມ​ກຽມ­ພ້ອມ​ເຂົ້າ​ປະ­ຈຳ­ການ​ໃນ​ກອງ­ທັບ.

    ທ່ານ ສີ​ຫຸນ ສິດ­ທິ​ລື​ໄຊ ກ່າວ​ວ່າ: ການ​ສ້າງ­ຕັ້ງ​ກອງ­ຮ້ອຍ​ກຳ­ລັງ​ສຳ­ຮອງ​ຄັ້ງ​ນີ້ ແມ່ນ​ການ­ຈັດ­ຕັ້ງ​ປະ­ຕິ­ບັດ​ໜຶ່ງ ໃນ​ບັນ­ດາ​ວຽກ​ງານ​ທີ່​ນອນ​ຢູ່​ໃນ​ແຜນ​ຍຸດ​ທະ​ສາດ​ການ­ຈັດ­ຕັ້ງ​ກຳ­ລັງ​ປະ­ກອບ​ອາ­ວຸດ​ຂອງ​ພັກ​ໃນ​ໄລ­ຍະ​ໃໝ່ ເປັນ​ການ​ກະ­ກຽມ​ວັດ­ຖຸ​ປັດ​ໄຈ​ໄວ້​ໃນ​ຍາມ​ສັນ­ຕິ­ພາບ ຕົ້ນ­ຕໍ​ແມ່ນ ກຳ­ລັງ​ພົນ​ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ວຽກ​ງານ ປກຊ-ປກສ ໃນ​ສະ­ເພາະ​ໜ້າ ແລະ ຍາວ​ນານ ສະ­ແດງ​ໃຫ້​ເຫັນ​ການ​ປະ­ກອບ­ສ່ວນ​ອັນ​ໃຫຍ່​ຫຼວງ ຂອງ​ເມືອງ​ສີ​ໂຄດ​ຕະ­ບອງ ກໍ​ຄື ໝາກ­ຜົນ​ຂອງ​ການ​ຊີ້​ນຳ-ນຳ­ພາ​ຂອງ​ອົງ­ຄະ​ນະ​ພັກ ກອງ​ບັນ­ຊາ​ການ​ທະ­ຫານ ນວ ແລະ ກອງ​ບັນ­ຊາ​ການ​ທະ­ຫານ​ເມືອງ​ທີ່​ໄດ້​ເອົາ­ໃຈ­ໃສ່​ຂົນ­ຂວາຍ ໂດຍ​ສະ­ເພາະ ຄວາມ​ສະ­ໝັກ​ໃຈ​ຂອງ​ນາຍ ແລະ ພົນ­ທະ­ຫານ​ຜູ້​ທີ່​ໄດ້​ຈົບ​ພັນ­ທະ ອອກ​ອຸດ​ໜູນ​ກັບ​ຄືນ​ຢູ່​ທ້ອງ­ຖິ່ນ​ມາ​ເປັນ​ກຳ­ລັງ​ສຳ­ຮອງ ເພື່ອ​ກຽມ​ຮັບ​ໃຊ້​ຊາດ​ອີກ​ເທື່ອ​ໃໝ່ ພ້ອມ​ນີ້ ທ່ານ​ຍັງ​ໄດ້​ຮຽກ­ຮ້ອງ​ໃຫ້​ຄະ­ນະ​ຊີ້​ນຳ​ກອງ­ຮ້ອຍ​ກຳ­ລັງ​ສຳ­ຮອງ​ຈົ່ງ​ຮັກ­ສາ​ມູນ­ເຊື້ອ​ຄວາມ​ຫ້າວ­ຫັນ ເອົາ­ໃຈ­ໃສ່​ວຽກ​ງານ​ຄຸ້ມ​ຄອງ ແລະ ບັນ­ຊາ​ກຳ­ລັງ​ໃຫ້​ເຂັ້ມ­ແຂງ ສ້າງ​ແຜນ​ເຝິກ­ອົບ­ຮົມ​ການ­ເມືອງ ການ​ທະ­ຫານ ກວດ­ກາ​ການ​ກຽມ­ພ້ອມ​ຂອງ​ກຳ­ລັງ ແລະ ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ວຽກ​ແນວ​ຫຼັງ ເພື່ອ​ສ້າງ​ກຳ­ລັງ​ໃຫ້​ໜັກ​ແໜ້ນ ແລະ ເຂັ້ມ­ແຂງ.

ຂ່າວທີ່ກ່ຽວຂ້ອງ