WHO ​ຮຽກ​ຮ້ອງ​ໃຫ້​ໃຊ້​ນະ​ໂຍ​ບາຍ​ຮັກ​ຄອບ​ຄົວ

834 08 ສ.ຫ. 2019 ຂ່າວຕ່າງປະເທດ
WHO ​ຮຽກ​ຮ້ອງ​ໃຫ້​ໃຊ້​ນະ​ໂຍ​ບາຍ​ຮັກ​ຄອບ​ຄົວ

    ວັນ​ທີ 1-7 ສິງຫາ​ຂອງ​ແຕ່​ລະ​ປີ ເປັນ​ອາທິດ​ສາກົນ​ເພື່ອ​ສົ່ງເສີມ​ການ​ລ້ຽງ​ລູກ​ດ້ວຍ​ນົມ​ແມ່. ສຳລັບ​ໃນ​ປີ​ນີ້ ອົງການ​ອະນາໄມ​ໂລກ (WHO) ແລະ ອົງການ​ກອງ​ທຶນ​ເດັກນ້ອຍ​ແຫ່ງ​ສະຫະ​ປະຊາ​ຊາດ (UNICEF) ພ້ອມ​ດ້ວຍ​ຄູ່​ຮ່ວມ​ຕ່າງໆ ໄດ້​ຮ່ວມ​ກັນ​ສູ້​ຊົນ​ໂຄສະນາ​ເຖິງ​ຄວາມ​ສຳຄັນ​ດ້ານ​ນະໂຍບາຍ​ຮັກ​ຄອບຄົວ ເພື່ອ​ສະໜັບສະໜູນ​ການ​ລ້ຽງ​ລູກ​ດ້ວຍ​ນົມ​ແມ່ ແລະ ຊ່ວຍ​ພໍ່​ແມ່​ສ້າງ​ສາຍ​ພົວພັນ​ທີ່​ດີ​ກັບ​ລູກໆ​ໃນ​ຕອນ​ຕົ້ນ​ຊີວິດ​ຂອງ​ໄວ​ເດັກ.

    WHO ຢືນຢັນ​ວ່າ ນະໂຍບາຍ​ຮັກ​ຄອບຄົວ ປະກອບ​ມີ ໃຫ້​ແມ່ຍິງ​ພັກ​ຍາມ​ເກີດ ແລະ ລ້ຽງ​ລູກ​ໂດຍ​ບໍ່​ຫັກ​ເງິນເດືອນ​ຢ່າງ​ໜ້ອຍ​ເປັນ​ເວລາ 18 ອາທິດ ອະນຸຍາດ​ໃຫ້​ຜູ້​ຊາຍ​ພັກ​ເພື່ອ​ເບິ່ງແຍງ​ເມຍ​ຍາມ​ເກີດ​ລູກ​ໂດຍ​ບໍ່​ຫັກ​ເງິນເດືອນ ເພື່ອ​ສົ່ງເສີມ​ໃຫ້​ຍິງ-ຊາຍ ແບ່ງປັນ​ໜ້າທີ່​ເບິ່ງແຍງ​ລູກ​ຢ່າງ​ສະເໝີພາບ​ກັນ.

   ຜູ້​ເປັນ​ແມ່​ຍັງ​ຄວນ​ມີ​ສະຖານທີ່​ເຮັດ​ວຽກ​ທີ່​ເອື້ອ​ອຳນວຍ​ແກ່​ການ​ເບິ່ງແຍງ​ລູກ ໂດຍ​ສາມາດ​ໃຫ້ການ​ປົກ​ປັກ​ຮັກສາ ແລະ ສະໜັບສະໜູນ​ຕ່າງໆ​ເຊັ່ນ ມີ​ເວລາ​ໃຫ້​ລູກ​ກິນ​ນົມ ສະໜອງ​ສະຖານທີ່​ປອດ​ໄພ​ສ່ວນ​ຕົວ ສະອາດ​ສຳລັບ​ການບີບ​ນົມ ແລະ ໃຫ້​ນົມ​ລູກ  ກໍ​ຄື​ໃຫ້ການ​ບໍລິການ​ຝາກ​ລ້ຽງ​ເດັກ​ທີ່​ບໍ່​ເກີນ​ພາລະ​ດ້ານ​ເສດຖະກິດ​ຂອງ​ຄອບຄົວ ເພື່ອ​ໃຫ້​ແມ່ລູກອ່ອນ ເມື່ອ​ກັບ​ຄືນ​ໄປ​ເຮັດ​ວຽກ​ແລ້ວ ຍັງ​ສາມາດ​ສືບຕໍ່​ລ້ຽງ​ລູກ​ດ້ວຍ​ນົມ​ແມ່​ຕໍ່​ໄປ.
     WHO ສະເໜີ​ອີ​ກວ່າ ຄວນ​ລ້ຽງ​ລູກ​ດ້ວຍ​ນົມ​ແມ່​ພຽງ​ຢ່າງ​ດຽວ​ຫຼັງ​ເກີດ​ລູກ 1 ຊົ່ວໂມງ ຈົນ​ກວ່າ​ເດັກນ້ອຍ​ຈະ​ມີ​ອາຍຸ 6 ເດືອນ​ເຕັມ. ຫຼັງ​ຈາກ​ນັ້ນ​ຄວນ​ໃຫ້​ອາຫານ​ເສີມ​ຕາມ​ໂພ​ສະ​ນາ​ການ. ຂະນະ​ດຽວ​ກັນ​ກໍ​ສືບຕໍ່​ລ້ຽງ​ລູກ​ດ້ວຍ​ນົມ​ແມ່ ຈົນ​ເດັກນ້ອຍ​ມີ​ອາຍຸ 2 ປີ​ຫຼື​ຫຼາຍ​ກວ່າ​ນັ້ນ.

ຂ່າວທີ່ກ່ຽວຂ້ອງ