ຮອງນາຍົກ ເນັ້ນ ລລບສ ໃຫ້ການບໍລິການບັນລຸຕາມແຜນການ

828 08 ສ.ຫ. 2019 ຂ່າວໜ້າ​ໜຶ່ງ

    ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ເຄື່ອນ​ໄຫວ​ຢ້ຽມ­ຢາມ ແລະ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຢູ່​ລັດ​ວິ​ສາ​ຫະ​ກິດ ລາວ​ບໍ­ລິ­ການ​ສິນ­ຄ້າ​ຜ່ານ​ແດນ (ລລບສ) ວັນ​ທີ 2 ສິງ­ຫາ​ຜ່ານ​ມາ ໂດຍ​ໄດ້ ຕ້ອນ­ຮັບ​ຈາກ​ທ່ານ ສຸ­ລິ­ຍາ ມະ­ນີ​ວົງ ຜູ້­ອຳ­ນວຍ­ການ​ໃຫຍ່ ລລບສ ພ້ອມ​ຄະ­ນະ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສຸ­ລິ­ຍາ ມະ­ນີ​ວົງ ກ່າວ​ວ່າ: ລລບສ ສ້າງ­ຕັ້ງ​ປີ 2008 ໂດຍ​ມີ​ສຳ­ນັກ­ງານ​ໃຫຍ່ ຢູ່​ບ້ານ​ທ່າ​ນາ​ແລ້ງ ເມືອງ​ຫາດ​ຊາຍ​ຟອງ ນະ­ຄອນ​ຫຼວຽງ​ຈັນ ປະ­ກອບ​ມີ​ສາ­ຂາ​ແຂວງ​ບໍ່​ແກ້ວ ປະ­ຈຳ​ດ່ານ​ສາ­ກົນ​ຂົວ​ມິດ­ຕະ­ພາບ​ລາວ-ໄທ ແຫ່ງ​ທີ 4 ສາ­ຂາ​ແຂວງ​ຄຳ​ມ່ວນ ປະ­ຈຳ​ດ່ານ​ສາ­ກົນ​ຂົວ​ມິດ­ຕະ­ພາບ ລາວ-ໄທ ແຫ່ງ​ທີ 3 ສາ­ຂາ​ແຂວງ​ຈຳ­ປາ​ສັກ ປະ­ຈຳ​ດ່ານ​ສາ­ກົນ​ວັງ​ເຕົ່າ ມີ​ໜ່ວຍ​ບໍ­ລິ­ການ​ນາ​ເພົ້າ ປະ­ຈຳ​ດ່ານ​ສາ­ກົນ​ນາ​ເພົ້າ ຊາຍ​ແດນ​ລາວ-ຫວຽດ­ນາມ ໜ່ວຍ​ບໍ­ລິ­ການ​ປາກ​ຊັນ ປະ­ຈຳ​ດ່ານ​ສາ­ກົນ​ປາກ​ຊັນ ຊາຍ​ແດນ​ລາວ-ໄທ ໜ່ວຍ​ບໍ­ລິ­ການ ລານ​ຕູ້​ຄອນ​ເທນ​ເນີ cy ມີ 2 ບໍ­ລິ­ສັດ​ຮ່ວມ​ທຶນ ຄື: ລັດ​ວິ​ສາ​ຫະ​ກິດ ລາວ​ບໍ­ລິ­ການ ທ່າ­ເຮືອ​ຫວຸງ​ອ່ານ ສສ ຫວຽດ­ນາມ ແລະ ບໍ­ລິ­ສັດ ລາວ​ສາ­ກົນ​ໄອ​ຊີ​ດີ ຈຳ­ກັດ ປະ­ຈຳ​ດ່ານ​ພາ­ສີ​ສາ­ກົນ​ບໍ່​ເຕັນ-ບໍ່​ຫານ ຊາຍ​ແດນ​ລາວ-ຈີນ ດຳ­ເນີນ​ທຸ­ລະ​ກິດ​ບໍ­ລິ­ການ​ຮັບ​ຝາກ​ສິນ­ຄ້າ​ເຄື່ອງ​ຂອງ ພາ­ຫະ­ນະ​ທຸກ​ປະ­ເພດ ມີ​ສາງ​ປິດ-ສາງ​ຮົ່ມ ສາງ​ກາງ­ແຈ້ງ​ໃຫ້​ເຊົ່າ ບໍ­ລິ­ການ​ຕິດ​ຊັ່ງ​ນ້ຳ­ໜັກ ຍົກ­ຍໍ-ຄ່ຽນ​ຖ່າຍ​ສິນ­ຄ້າ​ດ້ວຍ​ກົນ​ຈັກ​ໜັກ​ທີ່​ທັນ​ສະ­ໄໝ ແລະ ແຮງ​ງານ ສາງ​ເກັບ​ມ້ຽງ​ຕູ້​ຄອນ​ເທັນ​ເນີ ພິມ​ໃບ​ແຈ້ງ​ພາ­ສີ​ເອ​ເລັກ​ໂຕຣ​ນິກ ແລ່ນ​ເອ­ກະ­ສານ​ສິນ­ຄ້າ​ນຳ​ເຂົ້າ ສົ່ງ​ອອກ ນຳ​ເຂົ້າ​ເພື່ອ​ສົ່ງ​ອອກ ແລະ ຜ່ານ​ແດນ ຈັດ​ສົ່ງ-ຂົນ­ສົ່ງ​ສິນ­ຄ້າ​ພາຍ​ໃນ ແລະ ຕ່າງ­ປະ­ເທດ ໃຫ້​ຄຳ​ປຶກ­ສາ​ດ້ານ​ເອ­ກະ­ສານ​ນຳ​ເຂົ້າ ເພື່ອ​ສົ່ງ​ອອກ-ສິນ­ຄ້າ​ຜ່ານ​ແດນ ແລະ​ອື່ນໆ 6 ເດືອນ​ຕົ້ນ​ປີ 2019 ສ້າງ​ລາຍ​ຮັບ​ໄດ້ 23 ຕື້​ກວ່າ​ກີບ ເທົ່າ​ກັບ 45,16% ຂອງ​ແຜນ­ການ​ປີ ທຽບ­ໃສ່​ໄລ­ຍະ​ດຽວ​ກັນ​ປີ­ຜ່ານ­ມາ ເທົ່າ​ກັບ 103,35% ດ້ານ​ລາຍ​ຈ່າຍ 15,3 ຕື້​ກວ່າ​ກີບ ເທົ່າ​ກັບ 43,24% ທຽບ­ໃສ່​ໄລ­ຍະ​ດຽວ​ກັນ​ປີ­ຜ່ານ­ມາ ເທົ່າ​ກັບ 108,68% ກຳ­ໄລ 7,74 ຕື້​ກີບ ເທົ່າ​ກັບ 49,53% ທຽບ­ໃສ່​ໄລ­ຍະ​ດຽວ​ກັນ​ປີ­ຜ່ານ­ມາ ເທົ່າ​ກັບ 94,2%.

    ທ່ານ ສົມ​ດີ ດວງ​ດີ ໄດ້​ສະ­ແດງ​ຄວາມ​ຊົມ­ເຊີຍ​ຕໍ່​ຜົນ­ງານ​ທີ່ ລລບສ ຍາດ​ມາ​ໄດ້ ພ້ອມ​ນີ້ ທ່ານ​ຍັງ​ໄດ້​ເນັ້ນ​ໃຫ້​ເອົາ­ໃຈ­ໃສ່​ສູ້​ຊົນ​ປະ­ຕິ­ບັດ​ຕົວ​ເລກ​ຄາດ­ໝາຍ ສ້າງ​ຜະ­ລິດ​ຕະ​ພັນ​ດ້ານ​ການ​ບໍ­ລິ­ການ​ຕົ້ນ­ຕໍ​ຂອງ​ວິ​ສາ​ຫະ​ກິດ​ໃຫ້​ບັນ­ລຸ​ຕາມ​ແຜນ­ການ ເອົາ­ໃຈ­ໃສ່​ການ​ປະ­ຢັດ​ມັດ­ທະ­ຍັດ​ໃຫ້​ມີ​ປະ​ສິດ­ທິ​ຜົນ​ສູງ ສືບ­ຕໍ່​ຈັດ​ຕັ້ງ​ປະ­ຕິ­ບັດ​ແຜນ­ການ​ດຳ­ເນີນ​ທຸ­ລະ​ກິດ ເລັ່ງ​ພັດ­ທະ­ນາ​ຂະ­ຫຍາຍ​ກິດ­ຈະ­ການ ສືບ­ຕໍ່​ປະ­ສານ​ສົມ­ທົບ​ກັບ​ຂະ­ແໜງ­ການ​ກ່ຽວ­ຂ້ອງ ພາກ​ລັດ ແລະ ເອ­ກະ​ຊົນ ເພື່ອ​ເຮັດ​ໃຫ້­ການ​ດຳ­ເນີນ​ທຸ­ລະ​ກິດ​ມີ​ຄວາມ​ເຂັ້ມ­ແຂງ ປັບ­ປຸງ​ຄືນ​ລາ­ຄາ​ການ​ບໍ­ລິ­ການ​ໃຫ້​ແທດ­ເໝາະ​ກັບ​ສະ­ພາບ​ການ​ໃນ​ປັດ­ຈຸ­ບັນ ເພື່ອ​ດຶງ​ດູດ​ໃຫ້​ຜູ້​ປະ­ກອບ​ການ​ມາ​ໃຊ້​ບໍ­ລິ­ການ​ນັບ​ມື້​ຫຼາຍ​ຂຶ້ນ.

ຂ່າວທີ່ກ່ຽວຂ້ອງ