ຂ່າວຫຼ້າສຸດ

ຜູ້ບໍລິໂພກຊີ້ນ ຈົ່ງເຊື່ອໝັ້ນຕໍ່ຄວາມສະອາດ ຂອງໂຮງງານຂ້າສັດທີ່ທັນສະໄໝດອນດູ່

746 08 ສ.ຫ. 2019 ຂ່າວໜ້າ​ໜຶ່ງ
ຜູ້ບໍລິໂພກຊີ້ນ ຈົ່ງເຊື່ອໝັ້ນຕໍ່ຄວາມສະອາດ ຂອງໂຮງງານຂ້າສັດທີ່ທັນສະໄໝດອນດູ່

    ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ ເປັນ​ພະ­ຍາດ​ໜຶ່ງ​ທີ່​ລະ­ບາດ​ຢູ່​ຫຼາຍ​ປະ­ເທດ ໃນ​ນີ້ ກໍ​ມີ​ປະ­ເທດ​ອ້ອມ​ຂ້າງ ແລະ ໄດ້​ເຂົ້າ​ປະ­ເທດ​ລາວ​ເຮົາ​ໃນ​ກາງ​ປີ 2019 ເຊິ່ງ​ພົບ​ກ່ອນ­ໝູ່​ຢູ່​ແຂວງ​ສາ­ລະ​ວັນ ຈາກ​ນັ້ນ ກໍ​ພົບ​ຢູ່​ນະ­ຄອນ­ຫຼວງ​ວຽງ​ຈັນ (ນວ) ໂດຍ​ພາກ­ສ່ວນ​ກ່ຽວ­ຂ້ອງ​ໄດ້​ມີ​ການ​ເຝົ້າ​ລະ­ວັງ​ຕິດ­ຕາມ​ຢ່າງ​ໃກ້­ຊິດ ເພື່ອ​ບໍ່​ໃຫ້​ຂະ­ຫຍາຍ​ອອກ​ໄປ​ວົງ​ກວ້າງ ພະ­ຍາດ​ດັ່ງ­ກ່າວ​ເກີດ​ຂຶ້ນ​ກັບ​ໝູ ບໍ່​ຕິດ​ໃສ່​ຄົນ ຈຶ່ງ​ບໍ່​ຈຳ­ເປັນ​ຕ້ອງ​ຢ້ານ​ການ​ຕິດ­ເຊື້ອ ແລະ ສາ­ມາດ​ບໍ­ລິ­ໂພກ​ຊີ້ນ​ໝູ​ໄດ້​ຕາມ​ປົກ­ກະ­ຕິ.

    ທ່ານ ຄຳ​ຫຼ້າ ແສງ​ດາ​ວົງ ຜູ້­ອຳ­ນວຍ­ການ ບໍ­ລິ­ສັດ​ລັດ​ວິ​ສາ​ຫະ​ກິດ​ສະ­ບຽງ​ອາ­ຫານ ນວ ຫົວ­ໜ້າ​ໂຮງ­ງານ​ຂ້າ​ສັດ­ທັນ​ສະ­ໄໝ​ດອນ​ດູ່ ໃຫ້​ສຳ­ພາດ​ວັນ​ທີ 6 ສິງ­ຫາ 2019 ວ່າ: ໂຮງ­ງານ​ຂ້າ​ສັດ­ທັນ​ສະ­ໄໝ​ດອນ​ດູ່ ໄດ້​ປັບ­ປຸງ​ໃຫ້​ທັນ​ສະ­ໄໝ ແລະ ມີ​ຄວາມ​ສະ­ອາດ ທ້າຍ​ປີ 2016 ເປັນ­ຕົ້ນ​ມາ ດ້ວຍ​ການ​ຍົກ​ລະ­ດັບ​ດ້ານ​ພື້ນ­ຖານ​ໂຄງ​ລ່າງ ລະ­ບົບ​ເຄື່ອງ​ຈັກ​ຂ້າ​ຄົວ​ສັດ ແຍກ​ໂຮງ­ງານ​ຂ້າ​ໝູ ແລະ ງົວ ຄວາຍ ອອກ​ຈາກ​ກັນ ປັບ­ປຸງ​ໂຄງ​ປະ­ກອບ​ຂ້າ​ຄົວ​ໝູ ສ້າງ​ຫ້ອງ​ນ້ຳ ສ້າງ​ຫ້ອງ​ຕົບ­ແຕ່ງ​ຊິ້ນ​ສ່ວນ​ສັດ ໂຕະ​ຮອງ​ຄົວ​ສັດ ສ້າງ​ຫ້ອງ​ເຢັນ ແລະ​ອື່ນໆ ປັດ­ຈຸ­ບັນ ຄືບ​ໜ້າ 80% ແລະ ຄາດ​ວ່າ​ຈະ​ສຳ­ເລັດ​ໃນ​ປີ 2019 ໂດຍ​ລວມ​ແລ້ວ ການ​ພັດ­ທະ­ນາ​ໂຮງ­ງານ​ນີ້ ໄດ້​ຮ່ວມ​ກັບ​ຜູ້​ປະ­ກອບ​ການ ໂດຍ​ສະ­ເພາະ ບໍ­ລິ­ສັດ ຊີ​ພີ ລາວ ປັດ­ຈຸ­ບັນ ໂຮງ­ງານ​ຂ້າ​ຄົວ​ສັດ​ປະ­ເພດ ງົວ ຄວາຍ 25 ໂຕ​ຕໍ່​ວັນ ໝູ 180-200 ໂຕ​ຕໍ່​ວັນ.

    ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ ຈະ​ບໍ່​ມີ​ຜົນ​ກະ­ທົບ​ຕໍ່​ຄົນ ຍ້ອນ​ພະ­ຍາດ​ດັ່ງ­ກ່າວ​ບໍ່​ຕິດ­ຕໍ່​ໃສ່​ຄົນ ແລະ ຢູ່ ນວ ກໍ​ເກີດ​ຂຶ້ນ​ພຽງ​ຟາມ​ດຽວ ເຊິ່ງ​ສາ­ມາດ​ສະ­ກັດ​ກັ້ນ​ໄດ້ ການ​ບໍ­ລິ­ໂພກ​ຊີ້ນ​ໝູ​ໃນ​ໄລ­ຍະ​ນີ້​ຫຼຸດ​ລົງ ແມ່ນ​ມີ​ຄວາມ​ຈິງ ແຕ່​ບໍ່​ແມ່ນ​ຍ້ອນ​ການ​ເກີດ​ພະ­ຍາດ​ໝູ​ອາ​ຟຣິ​ກາ ຍ້ອນ​ວ່າ​ເປັນ​ລະ­ດູ­ຝົນ​ເຊິ່ງ​ມີ​ອາ­ຫານ​ຕາມ​ທຳ​ມະ​ຊາດ​ຫຼາຍ ເຮັດ​ໃຫ້​ຄົນ​ຈຳ­ນວນ​ໜຶ່ງ​ຫັນ​ໄປ​ບໍ­ລິ­ໂພກ​ອາ­ຫານ​ທຳ​ມະ​ຊາດ​ຫຼາຍ​ຂຶ້ນ ລາ­ຄາ​ໝູ​ດິບ​ຢູ່​ໂຮງ­ງານ ຫຼຸດ​ລົງ​ຈາກ 20.000 ກີບ​ຕໍ່​ກິ​ໂລ ເປັນ 18.000 ກີບ​ຕໍ່​ກິ​ໂລ ຍ້ອນ​ຟາມ​ໝູ​ຈຳ­ນວນ​ໜຶ່ງ​ຢ້ານ​ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ​ລະ­ບາດ​ມາ​ໃສ່ ຈຶ່ງ​ຂາຍ​ໝູ​ອອກ​ໃນ​ລາ­ຄາ​ຖືກ ເຮັດ​ໃຫ້​ລາ­ຄາ​ໝູ​ຢູ່​ໂຮງ­ງານ​ຖືກ​ລົງ ແຕ່​ລາ­ຄາ​ຊີ້ນ​ໝູ​ຢູ່​ຕາມ​ຕະ­ຫຼາດ​ຍັງ​ຄື­ເກົ່າ ເພື່ອ​ຄວາມ​ປອດ​ໄພ​ຂອງ​ຜູ້​ບໍ­ລິ­ໂພກ ໂຮງ­ງານ​ພວກ​ເຮົາ​ໄດ້​ເນັ້ນ​ຄວາມ​ສະ­ອາດ ໝູ​ທີ່​ນຳ​ເຂົ້າ​ມາ​ຂ້າ​ຄົວ​ຢູ່​ໂຮງ­ງານ​ນີ້​ກ່ອນ 15 ວັນ ຕ້ອງ​ມີ​ການ​ກວດ­ກາ​ຢ່າງ​ລະ­ອຽດ​ຈາກ​ພາກ­ສ່ວນ​ກ່ຽວ­ຂ້ອງ ເປັນ­ຕົ້ນ ສັດ­ຕະ­ວະ­ແພດ ພະ​ແນກ​ກະ­ສິ­ກຳ ແລະ ປ່າ­ໄມ້ ທີ່​ໄດ້​ເອົາ​ເລືອດ​ໝູ​ມາ​ກວດ ເກັບ​ກຳ​ສະ­ພາບ​ການ​ລ້ຽງ​ຂອງ​ຟາມ​ໃນ​ການ​ສັກ​ຢາ​ກັນ​ພະ­ຍາດ ແລະ​ອື່ນໆ​ເປັນ​ລະ­ບົບ​ແລ້ວ ຈຶ່ງ​ອະ­ນຸ­ຍາດ​ໃຫ້​ເຄື່ອນ​ຍ້າຍ​ໝູ​ເຂົ້າ​ມາ​ໂຮງ­ງານ ຕ້ອງ​ມີ​ໃບ​ເຄື່ອນ​ຍ້າຍ​ຮູ້​ແຫຼ່ງ​ທີ່​ມາ​ຂອງ​ສັດ ນອກ​ນີ້ ໂຮງ­ງານ​ຍັງ​ຕິດ­ຕາມ​ເກັບ​ກຳ​ຂໍ້​ມູນ​ການ​ສະ­ໜອງ​ຊີ້ນ​ໄປ​ຈຳ­ໜ່າຍ​ຢູ່​ແຕ່​ລະ​ແຫ່ງ ເພື່ອ​ສະ­ດວກ​ໃນ​ການ​ກວດ​ສອບ.

    ການ​ພັດ­ທະ­ນາ​ໂຮງ­ງານ ແລະ ການ​ປະ­ສານ​ງານ​ກັບ​ຜູ້​ປະ­ກອບ​ການ​ຟາມ​ໝູ​ຕ່າງໆ ຈະ​ປອດ​ໄພ​ທີ່​ສຸດ​ບໍ່​ໃຫ້​ມີ​ໝູ​ທີ່​ຕິດ­ເຊື້ອ​ພະ­ຍາດ​ຕ່າງໆ ໂດຍ​ສະ­ເພາະ ໄລ­ຍະ​ທີ່​ພະ­ຍາດ​ອະ­ຫິ​ວາ​ໝູ​ອາ​ຟຣິ​ກາ​ລະ­ບາດ ເຂົ້າ​ມາ​ໂຮງ­ງານ​ຂ້າ​ສັດ​ດອນ​ດູ່​ເດັດ­ຂາດ ເຊິ່ງ​ຜູ້​ລິ​ໂພກ​ຊີ້ນ​ງົວ ຄວາຍ ແລະ ໝູ​ທີ່​ຂ້າ​ຄົວ​ຈາກ​ໂຮງ­ງານ​ຂ້າ​ສັດ​ແຫ່ງ​ນີ້ ຈົ່ງ​ເຊື່ອ​ໝັ້ນ​ຕໍ່​ຄວາມ​ປອດ​ໄພ ເນື່ອງ​ຈາກ​ມີ​ສັດ­ຕະ­ວະ­ແພດ​ມາ​ປະ­ຈຳ­ການ​ຫຸ້ມ​ຫໍ່​ສະ­ອາດ ມີ​ການ​ປ້ອງ​ກັນ​ເປັນ​ຢ່າງ​ດີ ແລະ ມີ​ຄວາມ​ເຂັ້ມ​ງວດ​ທຸກ​ຂັ້ນ​ຕອນ.

ຂ່າວທີ່ກ່ຽວຂ້ອງ