ໄຊທານີ ມີໄຂ້ຍຸງລາຍເພີ່ມຂຶ້ນ ຍ້ອນການປະຕິບັດຫຼັກການ 5ປ ບໍ່ໄດ້ດີ

757 08 ສ.ຫ. 2019 ຂ່າວໜ້າ​ໜຶ່ງ

    ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ (ນວ) ເປັນ​ເມືອງ​ທີ່​ມີ​ຜູ້​ຕິດ­ເຊື້ອ​ພະ­ຍາດ​ໄຂ້­ຍຸງ​ລາຍ​ຫຼາຍ​ກວ່າ​ເມືອງ​ອື່ນ ເນື່ອງ​ຈາກ​ປະ­ຊາ­ຊົນ​ບາງ​ຄອບ­ຄົວ​ບໍ່​ເອົາ­ໃຈ­ໃສ່​ທຳ­ລາຍ​ແຫຼ່ງ​ເພາະ​ພັນ​ໜອນ​ນ້ຳ​ຍຸງ​ລາຍ ແລະ ປະ­ຕິ­ບັດ​ຫຼັກ­ການ 5ປ ເຊິ່ງ​ເປັນ​ບັນ­ຫາ​ຫຼັກ​ທີ່​ພາ­ໃຫ້​ມີ​ຍຸງ​ລາຍ ແລະ ພະ­ຍາດ​ໄຂ້­ຍຸງ​ລາຍ.

    ທ່ານ ເຈັງ​ເຮີ ໄຊ​ເລັຍ​ວື ຫົວ­ໜ້າ​ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ໄຊ​ທາ­ນີ ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້ ວ່າ: ເມືອງ​ໄຊ​ທາ­ນີ ມີ 104 ບ້ານ ມີ​ໄຂ້­ຍຸງ​ລາຍ​ເກີດ​ຂຶ້ນ 69 ບ້ານ ໃນ​ນີ້ ບ້ານ​ທີ່​ຕິດ­ເຊື້ອ​ຫຼາຍ​ກວ່າ​ໝູ່​ແມ່ນ​ບ້ານ​ໄຊ​ສົມ­ບູນ ສົມ​ສະ­ຫວັນ ຫົວ​ຊຽງ ດົງ​ໂດກ ຕານ​ມີ​ໄຊ ໄຜ່​ລ້ອມ ນາ​ລ້ອມ ນັບ​ແຕ່​ເດືອນ​ມັງ­ກອນ-ວັນ​ທີ 5 ສິງ­ຫາ 2019 ມີ​ຜູ້​ຕິດ­ເຊື້ອ​ພະ­ຍາດ​ໄຂ້­ຍຸງ​ລາຍ​ສະ​ສົມ 1.469 ກໍ­ລະ­ນີ ເສຍ​ຊີ ວິດ 4 ຄົນ ເພື່ອ​ຕອບ​ໂຕ້ ແລະ ຄວບ​ຄຸມ­ພະ​ຍາດ​ດັ່ງ­ກ່າວ ຫ້ອງ­ການ​ສາ­ທາ­ລະ­ນະ​ສຸກ ເມືອງ​ໄຊ​ທາ­ນີ​ໄດ້​ສຸມ​ໃສ່​ໂຄ­ສະ­ນາ​ສຸ​ຂະ​ສຶກ​ສາ ໂດຍ​ໄດ້​ຈັດ​ແບ່ງ​ຄະ­ນະ​ແພດ​ລົງ​ໄປ​ໂຄ­ສະ­ນາ​ປຸກ­ລະ­ດົມ​ໃຫ້​ອຳ­ນາດ​ການ​ປົກ­ຄອງ ແລະ ປະ­ຊາ­ຊົນ ສ້າງ​ຂະ​ບວນ​ການ​ອະ­ນາ­ໄມ ແລະ ທຳ­ລາຍ​ແຫຼ່ງ​ເພາະ​ພັນ​ໜອນ​ນ້ຳ​ຍຸງ​ລາຍ​ເປັນ​ປະ­ຈຳ​ແຕ່​ລະ​ວັນ.

    ເຖິງ​ວ່າ​ຄະ­ນະ​ແພດ​ຈະ​ສຸມ​ໃສ່​ໂຄ­ສະ­ນາ​ໃຫ້​ສຸ​ຂະ​ສຶກ​ສາ​ເຖິງ​ໄພ​ອັນ­ຕະ­ລາຍ​ຂອງ​ພະ­ຍາດ ແລະ ວິ­ທີ​ປ້ອງ​ກັນ​ພະ­ຍາດ​ນີ້​ໃຫ້​ປະ­ຊາ­ຊົນ​ຢ່າງ​ຕໍ່​ເນື່ອງ ແຕ່​ກໍ​ບໍ່​ສາ­ມາດ​ຫຼຸດ­ຜ່ອນ ຫຼື ຄວບ​ຄຸມ­ພະ​ຍາດ​ນີ້​ໄດ້ ແລະ ພະ­ຍາດ​ນີ້​ຍັງ​ມີ​ທ່າ​ອ່ຽງ​ນັບ​ມື້​ເພີ່ມ​ຂຶ້ນ ເຊິ່ງ​ສາ­ເຫດ​ຕົ້ນ­ຕໍ​ແມ່ນ​ປະ­ຊາ­ຊົນ​ບາງ​ຄອບ­ຄົວ ພາຍ­ຫຼັງ​ຄະ­ນະ​ແພດ​ສຳ­ເລັດ​ການ​ນຳ­ພາ​ສ້າງ​ຂະ​ບວນ​ການ​ແລ້ວ ບໍ່​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ຢ່າງ​ເປັນ​ຂະ​ບວນ ໂດຍ​ສະ­ເພາະ ການ​ທຳ­ລາຍ​ແຫຼ່ງ​ເພາະ​ພັນ​ໜອນ​ນ້ຳ​ຍຸງ​ລາຍ ເຊິ່ງ​ເປັນ​ສາ­ເຫດ​ໃຫ້​ມີ​ຍຸງ​ລາຍ​ເພີ່ມ​ຂຶ້ນ ຈາກ​ນັ້ນ ກໍ​ໄປ​ກັດ ແລະ ສົ່ງ​ເຊື້ອ​ໃສ່​ຄົນ ເຮັດ​ໃຫ້​ພະ­ຍາດ​ໄຂ້­ຍຸງ​ລາຍ​ກໍ­ລະ­ນີ​ເກີດ​ໃໝ່​ເກີດ​ເພີ່ມ​ຂຶ້ນ.

    ໃນ​ນາມ​ຕາງ­ໜ້າ​ຫ້ອງ­ການ​ສາ­ທາ­ລະ­ນະ​ສຸກ​ເມືອງ​ໄຊ​ທາ­ນີ ຂໍ​ຝາກ​ມາ​ຍັງ​ອຳ­ນາດ​ການ​ປົກ­ຄອງ ປະ­ຊາ­ຊົນ​ພາຍ​ໃນ​ເມືອງ​ໄຊ​ທາ­ນີ ກໍ​ຄື ທົ່ວ​ປະ­ເທດ ເອົາ­ໃຈ­ໃສ່​ປຸກ­ລະ­ດົມ​ຂະ​ບວນ​ການ​ທຳ­ລາຍ​ແຫຼ່ງ​ເພາະ​ພັນ​ຂອງ​ຍຸງ ໂດຍ​ປະ­ຕິ­ບັດ 5ປ ໃຫ້​ເປັນ​ປະ­ຈຳ ເພື່ອ​ຕັດ​ວົງ​ຈອນ​ຍຸງ​ລາຍ ພ້ອມ​ນີ້ ກໍ​ຕ້ອງ​ປ້ອງ​ກັນ​ບໍ່​ໃຫ້​ຍຸງ​ລາຍ​ກັດ ແລະ ຖ້າ​ເປັນ­ໄຂ້​ຄວນ​ໄປ​ພົບ​ແພດ​ໝໍ ບໍ່​ຄວນ​ຊື້​ຢາ​ມາ​ກິນ​ເອງ.

ຂ່າວທີ່ກ່ຽວຂ້ອງ