ຜ້າປູບ່ອນຝັງຊິບ ເປີດເຜີຍໃຫ້ຮູ້ວ່າຊັກລີດຄັ້ງສຸດທ້າຍເມື່ອໃດ

567 08 ສ.ຫ. 2019 ຫົວຂໍ້ຂ່າວອື່ນໆ

    ຈີນ​ເປິດ​ຕົວ​ລະ­ບົບ​ໄຮ​ເທັກ​ທີ່​ບອກ​ໃຫ້​ຮັບ​ຮູ້​ວ່າ ຜ້າ​ປູ​ບ່ອນ​ຖືກ​ຊັກ​ຄັ້ງ​ສຸດ​ທ້າຍ​ເມື່ອ​ໃດ ເພື່ອ​ຊ່ວຍ​ໃຫ້​ນັກ​ເດີນ­ທາງ​ທີ່​ອິດ­ເມື່ອຍ​ໄດ້​ເບົາ​ໃຈ.

    ຮ້ານ​ບໍ­ລິ­ການ​ຊັກ​ລີດ​ໃນ​ເມືອງ​ອູ໋​ຮັ່ນ​ໃນ​ພາກ​ກາງ­ຂອງ​ຈີນ ໃຊ້​ວິ­ທີ​ການ​ຕິດ​ໄມ​ໂຄຣ​ຊິບ​ລົງ​ໃນ​ຜ້າ​ປູ​ບ່ອນ​ນອນ ຜ້າ​ເຊັດ​ຕົວ ແລະ ຜ້າ­ຫົ່ມ ເຊິ່ງ​ລູກ​ຄ້າ​ສາ­ມາດ​ໃຊ້​ໂທລະ­ສັບ​ມື​ຖື​ອ່ານ​ເບິ່ງ​ວັນ​ທີ່​ຜ້າ​ເຫຼົ່າ­ນັ້ນ​ຖືກ​ຊັກ​ເປັນ​ຄັ້ງ​ສຸດ​ທ້າຍ​ໄດ້.

    ສຳ­ນັກ​ຂ່າວ​ຊິນ​ຮວາ ລາຍ​ງານ​ວ່າ ຊິບ​ດັ່ງ­ກ່າວ​ຈະ​ຖືກ​ຕິດ​ໄວ້​ທີ່​ມຸມ​ໜຶ່ງ​ຂອງ​ຜະ­ລິດ​ຕະ​ພັນ​ຕ່າງໆ ທີ່​ສົ່ງ​ໄປ​ຊັກ​ທີ່​ຮ້ານ​ຊັກ​ລີດ Wuhan Kunteng Laundry ເຊິ່ງ​ເປັນ​ຜູ້​ໃຫ້​ບໍ­ລິ­ການ​ຊັກ​ລີດ​ແກ່​ໂຮງ­ແຮມ ແລະ ຫໍ​ພັກ​ຫຼາຍໆ​ແຫ່ງ​ຂອງ​ເມືອງ.

    ຊິບ​ແຕ່​ລະ​ຕົວ​ມີ​ລະ­ຫັດ QR ທີ່​ສາ­ມາດ​ສະ​ແກນ​ໄດ້​ດ້ວຍ​ໂທລະ­ສັບ​ມື​ຖື ສາ­ມາດ​ກັນ​ນ້ຳ​ໄດ້ ແລະ ທົນ​ຕໍ່​ອຸນ­ຫະ­ພູມ​ສູງ ດັ່ງ­ນັ້ນ ຊິບ​ເຫຼົ່າ​ນີ້​ຈະ​ຍັງ​ໃຊ້​ການ​ໄດ້ ເຖິງ​ແມ່ນ​ວ່າ​ຈະ​ຜ່ານ​ການ​ຊັກ​ລີດ​ຫຼາຍ​ຄັ້ງ​ຫຼາຍ​ຫົນ​ກໍ​ຕາມ.

    ເມືອງ​ອູ໋​ຮັ່ນ ມີ​ປະ­ຊາ­ກອນ​ຫຼາຍ​ກວ່າ 10 ລ້ານ​ຄົນ ແລະ ເປັນ​ບ່ອນ​ນິ­ຍົມ​ຂອງ​ນັກ​ທ່ອງ​ທ່ຽວ ເນື່ອງ​ຈາກ​ເປັນ​ເມືອງ​ທີ່​ມີ​ບົດ­ບາດ​ສຳ­ຄັນ​ໃນ​ເລື່ອງ​ຂອງ​ປະ­ຫວັດ­ສາດ​ຈີນ ນອກ­ຈາກ​ນີ້ ຍັງ​ເຮັດ​ໜ້າ­ທີ່​ເປັນ​ສູນ​ກາງ​ທາງ​ການ​ຂົນ­ສົ່ງ​ທີ່​ສຳ­ຄັນ​ພາຍ​ໃນ​ປະ­ເທດ​ຈີນ​ອີກ​ດ້ວຍ

    ນະ​ວັດ­ຕະ​ກຳ​ນີ້ ເປັນ​ຄື້ນ​ລູກ​ໃໝ່​ຂອງ​ຄວາມ​ກ້າວ­ໜ້າ​ທາງ​ດ້ານ​ເຕັກ​ໂນ​ໂລ​ຊີ​ທີ່​ກຳ­ລັງ​ແຜ່​ຂະ­ຫຍາຍ​ໄປ​ທົ່ວ​ໂຮງ­ແຮມ​ຕ່າງໆ​ໃນ​ຈີນ.

    ເມື່ອ​ປີ​ທີ່​ຜ່ານ​ມາ ເຄືອ​ໂຮງ­ແຮມ InterContinental ຮ່ວມ​ມື​ກັບ Baidu ເຊິ່ງ​ເປັນ​ບໍ­ລິ­ສັດ​ເຕັກ​ໂນ​ໂລ​ຊີ​ຈີນ​ທີ່​ມີ​ຄວາມ​ຊ່ຽວ­ຊານ​ດ້ານ​ບໍ­ລິ­ການ​ຄົ້ນ​ຫາ​ທາງ​ອິນ​ເຕີ​ເນັດ ແລະ ປັນ­ຍາ​ປະ­ດິດ ໃນ​ການ​ເປີດ​ຕົວ “ຫ້ອງ​ອັດ​ສະ​ລິ​ຍະ” ຫຼື “Smart Rooms” ເຊິ່ງ​ຮອງ​ຮັບ​ເຕັກ​ໂນ​ໂລ​ຊີ AI ໃນ​ປະ­ເທດ​ຈີນ.

    ຄວາມ​ກ້າວ­ໜ້າ​ດັ່ງ­ກ່າວ ເລີ່ມ​ຕົ້ນ​ຂຶ້ນ​ໃນ​ໂຮງ­ແຮມ​ທຸ­ລະ​ກິດ​ຂະ­ໜາດ​ໃຫຍ່​ສອງ​ແຫ່ງ​ຂອງ​ປະ­ເທດ ຄື InterContinental Beijing Sanlitun ແລະ InterContinental Guangzhou ເຊິ່ງ​ໄດ້​ເປິດ​ຕົວ​ຫ້ອງ​ສະ​ວີດ​ລະ­ບົບ AI ຈຳ­ນວນ 100 ຫ້ອງ.

    ສ່ວນ​ໂຮງ­ແຮມ​ອື່ນໆ ເຊັ່ນ ໂຮງ­ແຮມ Hangzhou Marriott Hotel Qianjiang ແລະ ໂຮງ­ແຮມ Sanya Marriott Hotel Dadonghai Bay ໄດ້​ກາຍ­ເປັນ​ໂຮງ­ແຮມ​ລະ­ດັບ​ນາ­ນາ​ຊາດ​ແຫ່ງ​ທຳ​ອິດ​ຂອງ​ແມ​ຣິ​ອອດ ທີ່​ໃຊ້​ເຕັກ​ໂນ​ໂລ​ຊີ​ລະ­ບົບ​ຈົດ​ຈຳ​ໃບ​ໜ້າ ໃນ​ການ​ລົງ­ທະ­ບຽນ​ເຂົ້າ​ພັກ​ໃນ​ໂຮງ­ແຮມ.

ຂ່າວທີ່ກ່ຽວຂ້ອງ