ຂ່າວຫຼ້າສຸດ

ໂຄງການຕະຝັ່ງເຈື່ອນໄລຍະ 2 ຈະລົງມືກໍ່ສ້າງຕົ້ນປີໜ້າ

934 07 ສ.ຫ. 2019 ຂ່າວໜ້າ​ໜຶ່ງ

    ນະ­ຄອນ­ຫຼວງ​ວຽງ​ຈັນ ກຽມ​ເປີດ​ຊອງ​ປະ­ມູນ​ຫາ​ບໍ­ລິ­ສັດ​ທີ່​ເໝາະ​ສົມ ເພື່ອ​ລົງ­ມື​ກໍ່­ສ້າງ​ໂຄງ­ການ​ຕາ­ຝັ່ງ​ເຈື່ອນ​ໄລ­ຍະ 2 ແຕ່​ເຂດ​ຫຼັກ 3 ຫາ ຫາດ​ດອກ​ແກ້ວ ຍາວ​ປະ­ມານ 12 ກິ­ໂລ­ແມັດ ເຊິ່ງ​ໂຄງ­ການ​ນີ້​ຈະ​ເລີ່ມ​ລົງ­ມື​ກໍ່­ສ້າງ​ໃນ​ຕົ້ນ​ປີ­ໜ້າ.

    ໃນ​ປີ 2018 ນ້ຳ­ຂອງ​ໄດ້​ໄຫຼ​ລົ້ນ​ຕາ­ຝັ່ງ​ເຂົ້າ​ມາ​ຫຼາຍ​ບ້ານ ໃນ​ນະ­ຄອນ­ຫຼວງ​ວຽງ​ຈັນ ນັບ​ແຕ່​ເຂດ​ບ້ານ​ໜອງ​ດາ ເມືອງ​ສີ​ໂຄດ​ຕະ­ບອງ ແລະ ໄດ້​ມີ​ການ​ເຝົ້າ​ລະ­ວັງ​ຢູ່​ຫຼາຍ​ເຂດ ໂດຍ​ສະ­ເພາະ ເຂດ​ດອນ​ຈັນ ເຂດ​ຫຼັກ 3 ວິ­ທະ­ຍາ­ໄລ​ເຕັກ­ນິກ ລາວ-ເຢຍ​ລະ​ມັນ ແລະ ເຂດ​ຫຼັກ 4 ທ່າ­ເຮືອ​ເກົ່າ ລົງ​ໄປ​ຫາ​ແກ້ງ​ປາ​ຢ້າງ ດອນ​ເກີດ ແລະ ອີກ​ຫຼາຍ​ບ້ານ ຂອງ​ເມືອງ​ຫາດ​ຊາຍ​ຟອງ ເຊິ່ງ​ໄດ້​ໃຊ້​ງົບ­ປະ­ມານ​ພໍ​ສົມ­ຄວນ ໃນ​ການ​ກະ­ກຽມ​ຮັບ​ມື​ກັບ ເຫດ­ການ​ຄັ້ງ​ນັ້ນ ແລະ ໄດ້​ສ້າງ​ຄວາມ​ເສຍ​ຫາຍ​ໃຫ້​ຜົນ­ລະ­ປູກ​ຂອງ​ປະ­ຊາ­ຊົນ​ເຂດ​ແຄມ​ຂອງ​ເກືອບ​ທຸກ​ບ້ານ.

    ທ່ານ ພູ​ຂົງ ບັນ­ນະ​ວົງ ຫົວ­ໜ້າ​ພະ​ແນກ​ແຜນ­ການ ແລະ ການ​ລົງ­ທຶນ ນະ­ຄອນ­ຫຼວງ​ວຽງ​ຈັນ ລາຍ​ງານ​ໃນ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 7 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ ຄັ້ງ​ທີ 1 ທີ່​ດຳ­ເນີນ​ລະ­ຫວ່າງ ວັນ​ທີ 24-26 ກໍ­ລະ­ກົດ 2019 ວ່າ:  ນະ­ຄອນ­ຫຼວງ​ວຽງ​ຈັນ ກຽມ​ຈັດ​ປະ­ມູນ​ໂຄງ­ການ​ກໍ່­ສ້າງ​ປ້ອງ​ກັນ​ຕາ­ຝັ່ງ​ເຈື່ອນ ໄລ­ຍະ 2 ນັບ​ແຕ່​ເຂດ​ຫຼັກ 3 ຫາ​ຫາດ​ດອກ​ແກ້ວ  ເຊິ່ງ​ໂຄງ­ການ​ດັ່ງ­ກ່າວ ໄດ້​ຮັບ​ເງິນ​ກູ້​ດອກ​ເບ້ຍ​ຕ່ຳ​ຈາກ ສ ເກົາ­ຫຼີ ມູນ​ຄ່າ 67 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 582,69 ຕື້​ກີບ ເຊິ່ງ​ຈະ​ເລີ່ມ​ລົງ­ມື​ກໍ່­ສ້າງ ໃນ​ຕົ້ນ​ປີ 2020.

    ໂຄງ­ການ​ປ້ອງ​ກັນ​ຕາ­ຝັ່ງ​ເຈື່ອນ​ແມ່­ນ້ຳ​ຂອງ ຢູ່​ນະ­ຄອນ­ຫຼວງ​ວຽງ​ຈັນ ໄລ­ຍະ 2 ເປັນ​ໂຄງ­ການ​ສືບ­ຕໍ່ ໂຄງ­ການ​ໄລ­ຍະ 1 ທີ່ ສ ເກົາ­ຫຼີ ໃຫ້­ການ​ສະ­ໜັບ­ສະ­ໜູນ​ທຶນ ຈັດ​ຕັ້ງ​ປະ­ຕິ­ບັດ ແຕ່​ປີ 2008 ເປັນ­ຕົ້ນ​ມາ ເຊິ່ງ​ໂຄງ­ການ​ດັ່ງ­ກ່າວ ສາ­ມາດ​ຊ່ວຍ​ປ້ອງ​ກັນ​ນ້ຳ​ຖ້ວມ​ເຂດ​ແຄມ​ແມ່­ນ້ຳ​ຂອງ ແລະ ຍັງ​ປະ­ກອບ­ສ່ວນ​ໃນ​ການ​ພັດ­ທະ­ນາ​ເສດ­ຖະ­ກິດ ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ໃນ​ນະ­ຄອນ­ຫຼວງ​ວຽງ​ຈັນ ໃຫ້​ດີ​ຂຶ້ນ ສາ­ມາດ​ດຶງ​ດູດ​ນັກ​ທ່ອງ​ທ່ຽວ ແລະ ນັກ​ລົງ­ທຶນ​ໃຫ້​ເພິ່ມ​ຂຶ້ນ.

ຂ່າວທີ່ກ່ຽວຂ້ອງ