ຂ່າວຫຼ້າສຸດ

ຍົກລະດັບວຽກງານຕິດຕາມໂພຊະນາການເດັກອະນຸບານ

579 07 ສ.ຫ. 2019 ຂ່າວໜ້າ​ໜຶ່ງ
ຍົກລະດັບວຽກງານຕິດຕາມໂພຊະນາການເດັກອະນຸບານ

    ໃນ​ວັນ​ທີ 2-7 ສິງ­ຫາ 2019 ພະ​ແນກ​ສຶກ​ສາ​ທິ​ການ ແລະ ກີ­ລາ ແຂວງ​ຈຳ­ປາ​ສັກ ແລະ ແຂວງ​ສະ­ຫວັນ​ນະ​ເຂດ ຮ່ວມ​ກັບ​ມະ­ຫາ​ໄລ​ມະ­ຫິ​ດົນ​ຈາກ​ປະ­ເທດ​ໄທ ຈັດ​ເຝິກ­ອົບ­ຮົມ​ໂພ­ຊະ​ນາ​ການ​ອາ­ຫານ​ທ່ຽງ​ໃນ​ໂຮງ­ຮຽນ ແລະ ການ​ນຳ​ໃຊ້​ໂປຣ​ແກຣມ​ຄອມ​ພິວ​ເຕີ ເພື່ອ​ຕິດ­ຕາມ​ໂພ­ຊະ​ນາ​ການ​ໃນ​ເດັກ​ຊັ້ນ​ຂຶ້ນ ທີ່​ນະ­ຄອນ​ປາກ​ເຊ ແລະ ນະ­ຄອນ​ໄກ­ສອນ​ພົມ­ວິ­ຫານ ໂດຍ​ເປັນ​ປະ­ທານ​ຂອງ​ທ່ານ ສີ ພັນ­ທະ​ວົງ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ແຂວງ​ຈຳ­ປາ​ສັກ ທ່ານ ສີ​ອຸ­ດອນ ທອງ​ສຸ­ວັນ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ແຂວງ​ສະ­ຫວັນ​ນະ​ເຂດ ທ່ານ ກິ​ຕິ ສັນ​ຈະ­ເລີນ​ພົງ ຮອງ​ຜູ້­ອຳ­ນວຍ­ການ​ສະ​ຖາ​ບັນ​ໂພ­ຊະ​ນາ​ການ ແລະ ທ່ານ ເສກ​ສັນ ໃຈ​ຄົງ ຜູ້​ຈັດ­ການ​ອາ­ວຸ­ໂສ​ດ້ານ​ການ​ພັດ­ທະ­ນາ ບໍ­ລິ­ສັດ ດາ​ນອນ​ເອີ​ລີ​ໄລ​ນິວ​ຕິ​ຊັນ ມີ​ບັນ­ດາ​ພະ­ນັກ­ງານ​ພະ​ແນກ​ສຶກ​ສາ ແລະ ຫ້ອງ­ການ​ສຶກ​ສາ​ສອງ​ນະ­ຄອນ ຜູ້­ອຳ­ນວຍ­ການ​ໂຮງ­ຮຽນ ຄູ​ຮັບ­ຜິດ­ຊອບ​ຊັ້ນ​ອະ­ນຸ­ບານ ແລະ ຮັບ­ຜິດ­ຊອບ​ດ້ານ​ໂພ­ຊະ​ນາ​ການ​ໂຮງ­ຮຽນ​ອະ­ນຸ­ບານ ເຂົ້າ​ຮ່ວມ 200 ກວ່າ​ຄົນ.

    ຊຸດ​ອົບ­ຮົມ​ຄັ້ງ​ນີ້ ເນັ້ນ​ເຖິງ​ເດັກ​ທີ່​ເປັນ​ຊັບ­ພະ­ຍາ­ກອນ​ສຳ­ຄັນ ການ​ພັດ­ທະ­ນາ​ປະ­ເທດ​ຊາດ​ໃນ​ອະ­ນາ­ຄົດ ໃນ​ນັ້ນ ການ​ເຕີບ​ໂຕ ແລະ ສະ­ຖາ­ນະ​ພາບ​ທາງ​ໂພ­ຊະ​ນາ​ການ​ຂອງ​ເດັກ​ໃນ​ໄລ­ຍະ​ໂຮງ­ຮຽນ​ອະ­ນຸ­ບານ ແມ່ນ​ຕົວ​ຊີ້​ວັດ​ຂອງ​ພາ­ວະ​ເສດ​ຖະ ກິດ​ໃນ​ອະ­ນາ­ຄົດ ໂພ­ຊະ​ນາ​ການ​ທີ່​ດີ ແລະ ສຸ­ຂະ­ພາບ​ແຂງ­ແຮງ ແມ່ນ​ພື້ນ­ຖານ​ສຳ­ຄັນ​ທີ່​ຈະ​ສົ່ງ­ເສີມ​ໃຫ້​ເດັກ­ນ້ອຍ​ທຸກ​ຄົນ ມີ​ການ​ຈະ­ເລີນ​ເຕີບ​ໃຫຍ່ ແລະ ພັດ­ທະ­ນາ​ຕົນ​ເອງ​ໄດ້​ຢ່າງ​ມີ​ປະ­ສິດ­ທິ­ພາບ ເຊິ່ງ​ບັນ­ຫາ​ການ​ຂາດ​ສານ​ອາ­ຫານ​ແມ່ນ​ສິ່ງ​ຈະ​ນຳ­ໄປ​ສູ່​ການ​ມີ​ນ້ຳ­ໜັກ ແລະ ຄວາມ​ສູງ​ຕ່ຳ​ກວ່າ​ມາດ­ຕະ­ຖານ ສົ່ງ​ຜົນ​ກະ­ທົບ​ຕໍ່​ການ​ຈະ­ເລີນ​ເຕີບ​ໃຫຍ່ ແລະ ການ​ຮຽນ​ຮູ້​ຂອງ​ເດັກ ເຮັດ​ໃຫ້​ບໍ່​ສາ­ມາດ​ມີ​ການ​ພັດ­ທະ­ນາ​ໄດ້​ຢ່າງ​ມີ​ປະ­ສິດ­ທິ­ພາບ.

    ການ​ເຝິກ­ອົບ­ຮົມ​ຄັ້ງ​ນີ້ ຈຶ່ງ​ເປັນ​ຈຸດ​ເລີ່ມ​ຕົ້ນ​ການ​ພັດ­ທະ­ນາ​ຄຸນ​ນະ​ພາບ​ຂອງ​ອາ­ຫານ​ທ່ຽງ​ໃນ​ໂຮງ­ຮຽນ​ອະ­ນຸ­ບານ ໃນ​ນີ້​ທາງ​ກົມ​ຍັງ​ມີ​ໂຄງ­ການ​ສືບ­ຕໍ່​ຮ່ວມ​ມື ກັບ​ທາງ​ສະ​ຖາ​ບັນ​ໂພ­ຊະ​ນາ​ການ​ມະ­ຫາ​ໄລ​ມະ­ຫິ​ດົນ ເພື່ອ​ດຳ­ເນີນ​ວຽກ​ງານ​ໃນ​ຫຼາຍ​ຫົວ­ຂໍ້ ກ່ຽວ​ກັບ​ທາງ​ດ້ານ​ໂພ­ຊະ​ນາ​ການ ເພື່ອ​ໃຫ້​ໝັ້ນ​ໃຈ​ວ່າ ເດັກ­ນ້ອຍ​ທຸກ​ຄົນ​ຈະ​ມີ​ໂອ­ກາດ​ໄດ້​ຮັບ​ສານ​ອາ­ຫານ​ທີ່​ຄົບ​ຖ້ວນ  ເໝາະ​ສົມ​ຕາມ​ໄວ ເພື່ອ​ໃຫ້​ເຂົາ­ເຈົ້າ​ມີ​ການ​ຈະ­ເລີນ​ເຕີບ​ໃຫຍ່ ແລະ ພັດ­ທະ­ນາ​ການ​ທີ່​ມີ​ປະ­ສິດ­ທິ­ພາບ​ຕໍ່​ໄປ.

ຂ່າວທີ່ກ່ຽວຂ້ອງ