ຂ່າວຫຼ້າສຸດ

ນະຄອນຫຼວງ ຂຸ້ນຂ້ຽວປັກດຳເຂົ້ານາປີ ໃຫ້ສຳເລັດກາງເດືອນສິງຫາ

580 07 ສ.ຫ. 2019 ຂ່າວໜ້າ​ໜຶ່ງ
ນະຄອນຫຼວງ ຂຸ້ນຂ້ຽວປັກດຳເຂົ້ານາປີ ໃຫ້ສຳເລັດກາງເດືອນສິງຫາ

    ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ ໃຫ້​ສຳ­ພາດ​ວັນ​ທີ 2 ສິງ­ຫາ 2019 ທີ່​ພະ​ແນກ​ດັ່ງ­ກ່າວ​ວ່າ: ໃນ​ປີ 2019 ທົ່ວ​ນະ­ຄອນ­ຫຼວງ​ວຽງ​ຈັນ ມີ​ເນື້ອ­ທີ່​ແຜນ­ການ​ປູກ​ເຂົ້າ ທັງ​ໝົດ 68.273 ເຮັກ­ຕາ ໃນ​ນັ້ນ ເນື້ອ­ທີ່​ແຜນ­ການ​ປູກ​ເຂົ້າ­ນາ­ແຊງ 15.900 ເຮັກ­ຕາ ປັກ​ດຳ​ໄດ້ 14,23 ເຮັກ­ຕາ ເທົ່າ​ກັບ 89,50 ເຮັກ­ຕາ ເກັບ​ກ່ຽວ​ໄດ້ 14.222 ເຮັກ­ຕາ ເທົ່າ​ກັບ 99,94% ສະ­ມັດ​ທະ​ພາບ 5,18 ໂຕນ​ຕໍ່​ເຮັກ­ຕາ ຜົນ​ຜະ­ລິດ 73.669 ໂຕນ ບໍ່​ສາ­ມາດ​ປະ­ຕິ­ບັດ​ໄດ້​ຕາມ​ແຜນ­ການ ຍ້ອນ​ລະ­ບົບ​ຊົນ­ລະ­ປະ­ທານ​ເກົ່າ​ແກ່ ຊຸດ­ໂຊມ ແລະ ສ້ອມ­ແປງ​ບໍ່​ທ່ວງ​ທັນ​ກັບ​ລະ­ດູ​ການ​ຜະ­ລິດ ແລະ ນາ­ປີ ມີ​ເນື້ອ­ທີ່​ແຜນ­ການ​ຈຳ­ນວນ 52.373 ເຮັກ­ຕາ ຕ້ອງ­ການ​ໃຊ້​ແນວ​ພັນ​ເຂົ້າ​ທັງ​ໝົດ 4.189 ໂຕນ ມາ​ຮອດ​ປັດ­ຈຸ­ບັນ ປູກ​ເຂົ້າ​ໄດ້​ທັງ​ໝົດ 42.581 ເຮັກ­ຕາ ເທົ່າ​ກັບ 81,30% ໃນ​ນີ້ ເມືອງ​ຈັນ­ທະ​ບູ​ລີ 208 ເຮັກ­ຕາ ສີ​ໂຄດ​ຕະ­ບອງ 1.152 ເຮັກ­ຕາ ໄຊ​ເຊດ​ຖາ 1.599 ເຮັກ­ຕາ ສີ​ສັດ­ຕະ​ນາກ 32 ເຮັກ­ຕາ ນາ​ຊາຍ​ທອງ 6.650 ເຮັກ­ຕາ ໄຊ​ທາ­ນີ 14.414 ເຮັກ­ຕາ ຫາດ​ຊາຍ​ຟອງ 5.647 ເຮັກ­ຕາ ສັງ​ທອງ 2.741 ເຮັກ­ຕາ ແລະ ເມືອງ​ປາກ​ງື່ມ 10.086 ເຮັກ­ຕາ ເຊິ່ງ​ຄາດ​ວ່າ​ຈະ​ປັກ​ດຳ​ໃຫ້​ສຳ­ເລັດ 100% ໃນ​ກາງ​ເດືອນ​ສິງ­ຫາ​ນີ້.

    ການ​ປູກ​ພືດ​ຜັກ​ລະ­ດູ­ຝົນ ມີ​ເນື້ອ­ທີ່​ແຜນ­ການ 3.930 ເຮັກ­ຕາ ມາ​ຮອດ​ປັດ­ຈຸ­ບັນ ສາ­ມາດ​ປະ­ຕິ­ບັດ​ໄດ້ ທັງ​ໝົດ 2.242 ເຮັກ­ຕາ ເທົ່າ​ກັບ 57,05% ໃນ​ນັ້ນ ເມືອງ​ສີ​ໂຄດ​ຕະ­ບອງ 218 ເຮັກ­ຕາ ໄຊ​ເຊດ​ຖາ 24 ເຮັກ­ຕາ ນາ​ຊາຍ​ທອງ 205 ເຮັກ­ຕາ ເມືອງ​ໄຊ​ທາ­ນີ 688 ເຮັກ­ຕາ ຫາດ​ຊາຍ​ຟອງ 515 ເຮັກ­ຕາ ສັງ​ທອງ 329 ເຮັກ­ຕາ ແລະ ເມືອງ​ປາກ​ງື່ມ 263 ເຮັກ­ຕາ.

    ສຳ­ລັບ​ການ​ປັກ​ດຳ​ເຂົ້າ­ນາ​ປີ​ນີ້ ມີ​ການ​ລ່າ​ຊ້າ​ຍ້ອນ​ສະ­ພາບ​ອາ­ກາດ​ມີ​ການ​ປ່ຽນ­ແປງ ເຊັ່ນ: ຝົນ​ບໍ່​ຕົກ​ຖິ້ມ​ຊ່ວງ​ໄລ­ຍະ​ຍາວ​ແຕ່​ເດືອນ​ມິ­ຖຸ­ນາ​ຫາ​ກາງ​ເດືອນ​ກໍ­ລະ­ກົດ ແລະ ປະ­ລິ­ມານ​ນ້ຳ​ຝົນ­ຕົກ​ໜ້ອຍ ເຮັດ​ໃຫ້​ພື້ນ​ທີ່​ການ​ຜະ­ລິດ​ນອກ​ເຂດ​ຊົນ­ລະ­ປະ­ທານ​ມີ​ຄວາມ​ແຫ້ງ­ແລ້ງ ບໍ່​ສາ­ມາດ​ເຮັດ​ການ​ຜະ­ລິດ​ໄດ້ ເປັນ­ຕົ້ນ ເນື້ອ­ທີ່​ປູກ​ເຂົ້າ ນອກ​ນັ້ນ ການ​ເຮັດ​ນາ­ຫວ່ານ​ໃນ​ຫຼາຍ​ພື້ນ​ທີ່​ໃນ​ນະ­ຄອນ­ຫຼວງ​ວຽງ​ຈັນ ເຫັນ​ວ່າ​ມີ​ການ​ຂາດ​ນ້ຳ ເຮັດ​ໃຫ້​ມີ​ຄວາມ​ສ່ຽງ ເຊັ່ນ: ວັດ​ສະ​ພືດ ແລະ ແມງ­ໄມ້​ສັດ­ຕູ​ພືດ​ລະ­ບາດ ຕໍ່​ກັບ​ບັນ­ຫາ​ດັ່ງ­ກ່າວ​ໄລ­ຍະ​ຜ່ານ​ມາ ພະ​ແນກ​ກະ­ສິ­ກຳ ແລະ ປ່າ­ໄມ້ ໄດ້​ອອກ​ຂໍ້​ຕົກ­ລົງ​ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ລົງ​ຊຸກ­ຍູ້​ການ​ຜະ­ລິດ​ລະ­ດູ­ຝົນ ໂດຍ​ຄະ­ນະ​ດັ່ງ­ກ່າວ​ມີ­ໜ້າ​ທີ່​ໃນ​ການ​ລົງ​ຊຸກ­ຍູ້​ການ​ຜະ­ລິດ​ຮ່ວມ​ກັບ​ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ ບ້ານ ແລະ ກຸ່ມ​ບ້ານ​ທີ່​ດຳ­ເນີນ​ການ​ຜະ­ລິດ ນຳ​ເອົາ​ເຕັກ­ນິກ​ວິ­ຊາ​ການ​ລົງ​ໄປ​ແນະ­ນຳ ແລະ ແກ້​ໄຂ​ບັນ­ຫາ​ຊ່ວຍ​ຊາວ​ກະ­ສິ­ກອນ​ໃຫ້​ທ່ວງ​ທັນ​ກັບ​ສະ­ພາບ​ການ.

ຂ່າວທີ່ກ່ຽວຂ້ອງ