ຂ່າວຫຼ້າສຸດ

ມະນີສອນ ຫັດຖະກຳເນັ້ນຄຸນນະພາບໃນການຜະລິດໂອ ຂັນ

596 07 ສ.ຫ. 2019 ຂ່າວໜ້າ​ໜຶ່ງ
ມະນີສອນ ຫັດຖະກຳເນັ້ນຄຸນນະພາບໃນການຜະລິດໂອ ຂັນ

    ໃນ​ໄລ­ຍະ 2-3 ປີ​ມາ​ນີ້ ສະ­ພາບ​ເສດ­ຖະ­ກິດ​ຢູ່​ປະ­ເທດ​ເຮົາ​ມີ​ຄວາມ​ຫຍຸ້ງ­ຍາກ​ພໍ​ສົມ­ຄວນ ເນື່ອງ​ມາ​ຈາກ​ຫຼາຍ​ປັດ​ໄຈ​ພາຍ​ໃນ ແລະ ພາຍ​ນອກ​ມາ​ກະ­ທົບ​ໃສ່ ເປັນ­ຕົ້ນ ຄ່າ​ຄອງ​ຊີບ ລາ­ຄາ​ນ້ຳ­ມັນ ແລະ ອັດ­ຕາ​ແລກ­ປ່ຽນ​ລະ­ຫວ່າງ​ເງິນ​ກີບ​ກັບ​ເງິນ­ຕາ​ຕ່າງ­ປະ­ເທດ ໂດຍ​ສະ­ເພາະ ເງິນ​ບາດ​ໄທ ແລະ ເງິນ​ໂດ​ລາ​ສະ­ຫະ­ລັດ​ຂຶ້ນ​ລົງ​ບໍ່​ປົກ­ກະ­ຕິ ຈາກ​ສະ­ພາບ​ການ​ດັ່ງ­ກ່າວ ນອກ­ຈາກ​ກະ­ທົບ​ຕໍ່​ການ​ດຳ­ລົງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ແລ້ວ ຍັງ​ກະ­ທົບ​ຕໍ່​ບັນ­ດາ​ຫົວ­ໜ່ວຍ​ທຸ­ລະ​ກິດ​ຕ່າງໆ​ເຊັ່ນ​ດຽວ​ກັນ ໃນ​ນັ້ນ ກໍ​ມີ​ຫົວ­ໜ່ວຍ​ທຸ­ລະ​ກິດ ມະ­ນີ​ສອນ ຫັດ­ຖະ­ກຳ​ຜະ­ລິດ ແລະ ຈຳ­ໜ່າຍ​ຂັນ­ເງິນ ໂອ​ເງິນ ຂັນ​ທອງ ໂອ​ທອງ ຂັນ​ສອງ​ກະ­ສັດ ແລະ ເຄື່ອງ​ທອງ​ສຳ­ລິດ ໂຮງ­ງານ​ຕັ້ງ​ຢູ່​ບ້ານ​ຂຸນ​ຕາ​ທົ່ງ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ.

    ທ່ານ​ນາງ ມະ­ນີ​ສອນ ລິດ​ດຳ­ລົງ ເຈົ້າ​ຂອງ​ທຸ­ລະ​ກິດ ມະ­ນີ​ສອນ ຫັດ­ຖະ­ກຳ ໃຫ້​ສຳ­ພາດ​ເມື່ອ​ບໍ່​ດົນ​ນີ້​ວ່າ: ເບື້ອງ​ຕົ້ນ​ພຽງ​ແຕ່​ເປັນ​ຜູ້​ຈຳ­ໜ່າຍ​ຂາຍ​ຜະ­ລິດ​ຕະ​ພັນ​ໂອ ແລະ ຂັນ ໃຫ້​ຄົນ​ອື່ນ​ເທົ່າ​ນັ້ນ ຕໍ່​ມາ​ໄດ້​ສ້າງ­ຕັ້ງ​ເປັນ​ໂຮງ­ງານ​ຜະ­ລິດ​ເອງ ເຊິ່ງ​ການ​ຜະ­ລິດ​ແມ່ນ​ຈະ​ຜະ­ລິດ​ລາຍ​ໃໝ່​ໄປ​ເລື້ອຍໆ​ແບບ​ບໍ່​ຊ້ຳ ຄື ລາຍ​ໜຶ່ງ​ຈະ​ຜະ­ລິດ​ອອກ​ມາ​ຄັ້ງ​ໜຶ່ງ ປະ­ມານ 50 ໜ່ວຍ ແຕ່​ຖ້າ​ເປັນ​ລາຍ​ເກົ່າ​ແບບ​ດັ່ງ​ເດີມ​ທີ່​ເຮັດ​ມາ​ແຕ່​ປູ່​ຍ່າ ຕາ​ຍາຍ ກໍ​ຍັງ​ຮັກ­ສາ​ໄວ້​ຜະ­ລິດ​ອອກ​ມາ​ເປັນ​ປະ​ຈຳ­ເປັນ​ການ​ຮັກ­ສາ​ວັດ­ທະ­ນະ­ທຳ​ໄວ້ ສ່ວນ​ການ​ອອກ​ແບບ​ລວ­ດລາຍ ແລະ ການ​ເກັບ​ລາຍ​ລະ­ອຽດ​ແຕ່​ລະ​ຄັ້ງ​ນັ້ນ ຈະ​ແມ່ນ​ຜູ້­ຍິງ​ເປັນ​ຜູ້​ເຮັດ ຜູ້​ຊາຍ​ຈະ​ເນັ້ນ​ໄປ​ທາງ​ດ້ານ​ແຮງ​ງານ​ເຮັດ​ຕົວ​ຈິງ​ເປັນ­ຕົ້ນ​ຕໍ ເຊິ່ງ​ເລີ່ມ​ສ້າງ­ຕັ້ງ​ໂຮງ­ງານ​ຜະ­ລິດ​ເອງ ນັບ​ແຕ່​ປີ 2000 ເປັນ­ຕົ້ນ​ມາ ແຕ່​ກ່ອນ​ໜ້າ​ນັ້ນ 30 ປີ ເປັນ​ພຽງ​ແຕ່​ຜູ້​ຈຳ­ໜ່າຍ​ໃຫ້​ຄົນ​ອື່ນ​ເທົ່າ​ນັ້ນ ຍ້ອນ​ມີ​ປະ­ສົບ​ການ​ເລື່ອງ​ນີ້ ແລະ ມີ​ທຶນ­ຮອນ​ຈຳ­ນວນ​ໜຶ່ງ ຈຶ່ງ​ໄດ້​ມາ​ສ້າງ­ຕັ້ງ​ເປັນ​ໂຮງ­ງານ ແລະ ການ​ຜະ­ລິດ​ເບື້ອງ​ຕົ້ນ ແມ່ນ​ເຮັດ​ຊ້າ­ນ້ຳ­ກ້ຽງ ຈາກ​ແຂວງ​ຫຼວງ​ພະ​ບາງ ມາ​ຍຸບ​ເປັນ​ຊ້າ­ນ້ຳ­ກ້ຽງ​ທອງ ໂດຍ​ອີງ­ໃສ່​ສະ­ພາບ​ປັດ­ຈຸ­ບັນ​ຊ້າ­ນ້ຳ­ກ້ຽງ​ນັບ​ມື້​ຈະ​ບໍ່​ມີ​ອີກ​ແລ້ວ ດັ່ງ­ນັ້ນ ຈຶ່ງ​ໄດ້​ຫັນ­ປ່ຽນ​ໄປ​ໃຊ້​ວັດ­ຖຸ​ດິບ​ແນວ​ອື່ນ​ແທນ ເນື່ອງ​ຈາກ​ວັດ­ຖຸ​ທອງ­ເຫຼືອງ​ໃນ​ປັດ­ຈຸ­ບັນ​ແມ່ນ​ມີ​ຫຼາຍ ສຳ­ລັບ​ຜະ­ລິດ​ຕະ​ພັນ​ທີ່​ຜະ­ລິດ​ໃນ​ປັດ­ຈຸ­ບັນ​ຈະ​ມີ​ຊ້າ­ນ້ຳ­ກ້ຽງ ໂອ ຂັນ​ນ້ອຍ ໃຫຍ່ ເຕົ້າ­ນ້ຳ ຕິບ­ເຂົ້າ ເຄື່ອງ­ໃຊ້​ຄົວ​ເຮືອນ ແລະ​ອື່ນໆ ປະ­ມານ 50 ລາຍ­ການ ແຕ່​ອັນ​ພິ­ເສດ​ຜະ­ລິດ​ຕະ​ພັນ​ທີ່​ຜະ­ລິດ​ອອກ​ມາ​ນັ້ນ ນອກ­ຈາກ​ຮັບ​ໃຊ້​ແນວ​ອື່ນ​ແລ້ວ ຍັງ​ເປັນ​ວັດ­ຖຸ​ໃສ່​ອາ­ຫານ​ການ​ກິນ​ໄດ້​ຕື່ມ​ອີກ ມູນ​ຄ່າ​ລາ­ຄາ​ຜະ­ລິດ​ຕະ​ພັນ​ເລີ່ມ​ແຕ່ 5 ແສນ​ກີບ ຫາ 2 ລ້ານ​ກີບ ເຊິ່ງ​ລາ­ຄາ 5 ແສນ​ກີບ ຈະ​ເປັນ​ປະ­ເພດ​ໂອ ຂັນ ແຕ່​ລາ­ຄາ​ຈະ​ຂຶ້ນ​ກັບ​ລວ­ດລາຍ ແລະ ຂະ­ໜາດ ສ່ວນ​ລາ­ຄາ 2 ລ້ານ ແມ່ນ​ປະ­ເພດ​ເຄື່ອງ​ທອງ­ເຫຼືອງ ສອດ​ສອງ​ສີ ແລະ ຂັ້ນ​ຕອນ​ການ​ຜະ­ລິດ​ມີ 32 ຂັ້ນ​ຕອນ ກ່ອນ​ຈະ​ອອກ​ມາ​ເປັນ​ຂັນ​ສົມ­ບູນ​ແບບ ໜ່ວຍ​ໜຶ່ງ​ຖື​ວ່າ​ກ່ອນ​ຈະ​ໄດ້​ຜະ­ລິດ​ຕະ​ພັນ​ອອກ​ມາ​ແມ່ນ​ຜ່ານ​ຫຼາຍ​ຂັ້ນ​ຕອນ ແລະ ໃຊ້​ແຮງ​ງານ​ຈຳ­ນວນ​ຫຼາຍ​ສົມ­ຄວນ ປັດ­ຈຸ­ບັນ ມີ­ແຮງ​ງານ 14 ຄົນ 6 ຄອບ­ຄົວ ທີ່​ອາ­ໄສ​ຢູ່​ອ້ອມ​ຂ້າງ​ໂຮງ­ງານ​ເປັນ​ແຮງ​ງານ​ໃຫ້ ແຕ່​ທຽບ­ໃສ່​ແຕ່​ກ່ອນ​ແຮງ​ງານ​ມີ 30 ກວ່າ​ຄົນ ແຕ່​ເນື່ອງ​ຈາກ​ຫຼາຍ​ປີ​ແຮງ​ງານ​ທີ່​ເປັນ​ນາຍ​ຊ່າງ​ເກົ່າ​ຈຳ­ນວນ​ໜຶ່ງ​ທີ່​ມີ​ອາ­ຍຸ​ສູງ ກໍ​ໄດ້​ເສຍ​ຊີ­ວິດ​ໄປ​ຈຶ່ງ​ຂາດ​ຜູ້​ສືບ​ທອດ ເຮັດ​ໃຫ້​ແຮງ​ງານ​ໜ້ອຍ​ລົງ​ເລື້ອຍໆ​ຍັງ​ເຫຼືອ​ແຕ່​ຊ່າງ​ໃໝ່ ເຊິ່ງ​ການ​ຜະ­ລິດ​ແມ່ນ​ເນັ້ນ​ຄຸນ​ນະ​ພາບ​ເປັນ​ຫຼັກ​ເອົາ​ຜົນ​ກຳ­ໄລ​ໜ້ອຍ ແລະ ຜະ­ລິດ​ຕະ​ພັນ​ແຕ່​ລະ​ຊະ­ນິດ​ຈະ​ມີ​ໂລ​ໂກ້​ຮູບ​ໂຕ​ນາກ​ອ້ອມ ແລະ ຈະ​ມີ​ສັນ­ຍະ­ລັກ ML ເວ­ລາ​ຂາຍ​ຜະ­ລິດ​ຕະ​ພັນ​ອອກ​ໄປ​ຈະ​ຮັບ­ປະ­ກັນ 5 ປີ ຖ້າ​ມີ​ບັນ­ຫາ​ແຕກ ຫຼື ຊຳ​ລຸດ​ບ່ອນ​ໃດ​ບ່ອນ​ໜຶ່ງ​ລູກ​ຄ້າ​ສາ­ມາດ​ມາ​ປ່ຽນ​ເອົາ​ໂຕ​ໃໝ່​ຄືນ​ໄດ້.

    ໃນ​ເມື່ອ​ກ່ອນ​ການ​ດຳ­ເນີນ​ທຸ­ລະ​ກິດ​ຜະ­ລິດ​ໂອ ຂັນ ເປັນ​ສິນ­ຄ້າ​ແມ່ນ​ໄປ​ໄດ້​ດີ ແຕ່​ຕົກ​ມາ​ປີ 2017 ເປັນ­ຕົ້ນ​ມາ​ເສດ­ຖະ­ກິດ​ຝືດ­ເຄືອງ​ຫຼາຍ ຂາຍ­ເຄື່ອງ​ບໍ່​ໄດ້​ດີ​ພໍ​ແຕ່​ໄປ​ໄດ້​ປະ​ກົບ​ປະ­ຄອງ​ໄປ​ແຕ່​ລະ​ວັນ ເນື່ອງ​ຈາກ​ລູກ​ຄ້າ​ຜູ້​ທີ່​ຊື້​ກໍ​ຕໍ່​ລາ­ຄາ​ລົງ​ຫຼາຍ ເຮັດ​ໃຫ້​ຜູ້​ຂາຍ​ມີ​ກຳ­ໄລ​ໜ້ອຍ​ລົງ ສຳ­ລັບ​ຕະ­ຫຼາດ​ແມ່ນ​ຂາຍ​ສົ່ງ ແລະ ຂາຍ­ຍ່ອຍ ຈຸດ​ຂາຍ​ແມ່ນ​ຈະ​ຂາຍ​ຢູ່​ກັບ​ເຮືອນ​ຈະ​ມີ​ຫ້ອງ​ຂາຍ ຕ່າງ​ແຂວງ ຈະ​ມີ 2 ສາ­ຂາ ຢູ່​ແຂວງ​ສະ­ຫວັນ​ນະ​ເຂດ ຄື: ຢູ່​ເຂດ​ຫຼັກ 2 ແລະ ໜ້າ​ຕະ­ຫຼາດ​ສະ­ຫວັນ​ໄຊ.

ຂ່າວທີ່ກ່ຽວຂ້ອງ