ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 07-08-2019

821 07 ສ.ຫ. 2019 ຫົວຂໍ້ຂ່າວອື່ນໆ

    ພົບ​ກັນ​ມື້­ນີ້ ມີ​ຂ່າວ​ກ່ຽວ​ກັບ​ມາດ​ຕະ­ການ​ຂອງ​ຈີນ​ໃນ​ການ​ປາບ​ປາມ​ອາ​ຊະ​ຍາ​ກຳ ກ່ຽວ​ກັບ ຄວາມ​ປອດ​ໄພ​ດ້ານ​ອາ­ຫານ ບັນ­ຫາ​ການ​ຂາດ ເຂີນ​ແຮງ​ງານ​ຢູ່​ຍີ່­ປຸ່ນ ແລະ ເລື່ອງ​ເປົ້າ​ໝາຍ​ຫຼຸດ­ຜ່ອນ​ຄວາມ­ທຸກ​ຍາກ​ຢູ່​ນະ­ຄອນ​ໂຮ່​ຈີ​ມິງ ຫວຽດ­ນາມ.

    ທີ່ ສປ ຈີນ: ຂ່າວ​ຕ່າງ­ປະ­ເທດ​ຫວ່າງ​ບໍ່​ດົນ​ມາ​ນີ້​ໃຫ້​ຮູ້​ວ່າ ທາງ​ການ ສປ ຈີນ ໄດ້​ເພີ່ມ​ຄວາມ​ພະ­ຍາ­ຍາມ​ໃນ​ການ​ປາບ​ປາມ​ອາ​ຊະ​ຍາ​ກຳ ກ່ຽວ​ກັບ​ຄວາມ​ປອດ​ໄພ​ດ້ານ​ອາ­ຫານ ທີ່​ສົ່ງ​ຜົນ​ກະ­ທົບ​ຕໍ່​ສຸ­ຂະ­ພາບ​ຂອງ​ໄວ​ເດັກ​ຈີນ ແຜນ­ການ​ປາບ​ປາມ​ດັ່ງ­ກ່າວ​ໄດ້​ຮັບ​ການ​ຊີ້​ນຳ-ນຳ­ພາ​ໂດຍ​ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ຊຶ່ງ​ມີ​ຄຳ​ເຫັນ​ກ່ຽວ​ກັບ​ບັນ­ຫາ​ນີ້​ວ່າ ໄວ​ເດັກ​ແມ່ນ​ໄວ​ທີ່­ຢູ່​ໃນ​ໄລ­ຍະ​ຈະ­ເລີນ​ເຕີບ​ໂຕ ທີ່​ມີ​ຄວາມ​ສຳ­ຄັນ​ຍິ່ງ​ໃນ​ຍ່ານ​ຊີ­ວິດ​ຂອງ​ຄົນ​ເຮົາ ດັ່ງ­ນັ້ນ ການ​ຮັບ­ປະ­ກັນ​ຄວາມ​ປອດ​ໄພ​ດ້ານ​ອາ­ຫານ​ສຳ­ລັບ​ໄວ​ເດັກ ຕ້ອງ​ເປັນ​ບັນ­ຫາ​ບຸ­ລິ­ມະ­ສິດ ຂ່າວ​ບອກ​ວ່າ ສະ­ຖິ­ຕິ​ຂອງ​ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ໄດ້​ຊີ້​ໃຫ້​ເຫັນ​ວ່າ ນັບ​ແຕ່​ປີ 2018 ເປັນ­ຕົ້ນ​ມາ ທາງ​ອົງ­ການ​ໄອ​ຍະ​ການ ໄດ້​ດຳ­ເນີນ​ຄະ­ດີ​ກັບ​ບຸກ­ຄົນ​ຈຳ­ນວນ 64 ຄົນ ທີ່​ມີ​ຄວາມ​ຜິດ​ຖານ​ໄດ້​ຜະ­ລິດ ແລະ ຈຳ­ໜ່າຍ​ອາ­ຫານ​ທີ່​ບໍ່​ໄດ້​ມາດ­ຕະ­ຖານ​ໃຫ້​ເດັກ­ນ້ອຍ.

    ທີ່ ຍີ່­ປຸ່ນ: ໃນ​ຊຸມ​ປີ​ຫຼັງໆ​ມາ​ນີ້ ທາງ​ການ​ຍີ່­ປຸ່ນ ໄດ້​ດຳ­ເນີນ​ການ​ຢ່າງ​ຈິງ​ຈັງ ເພື່ອ​ແກ້​ໄຂ​ບັນ­ຫາ​ຂາດ­ເຂີນ​ແຮງ​ງານ ຍ້ອນ​ຈຳ­ນວນ​ຄົນ​ເຖົ້າ​ເພີ່ມ​ຂຶ້ນ ສ່ວນ​ຈຳ­ນວນ​ເດັກ​ເກີດ​ໃໝ່​ນັ້ນ ພັດ​ນັບ​ມື້​ຫຼຸດ​ໜ້ອຍ​ຖອຍ​ລົງ ດັ່ງ​ມີ​ຂ່າວ​ອອກ​ມາ​ໃນ​ວັນ​ທີ 23 ເດືອນ​ພຶດ­ສະ­ພາ​ປີ​ນີ້​ວ່າ ລັດ­ຖະ­ບານ​ຍີ່­ປຸ່ນ ໄດ້​ກະ­ກຽມ​ສະ­ເໜີ​ແຜນ​ປັບ​ຂຶ້ນ​ອາ­ຍຸ​ເຂົ້າ​ບຳ­ນານ ເພື່ອ​ໃຫ້​ພະ­ນັກ­ງານ​ໃນ​ຂະ­ແໜງ​ທຸ­ລະ​ກິດ​ສາ­ມາດ​ອອກ­ແຮງ​ງານ​ໄດ້​ຈົນ​ເຖິງ​ອາ­ຍຸ 70 ປີ ນອກ­ຈາກ​ເພື່ອ​ແກ້​ໄຂ​ບັນ­ຫາ​ຂາດ­ເຂີນ​ແຮງ​ງານ​ແລ້ວ ການ​ປັບ​ຂຶ້ນ​ອາ­ຍຸ​ເຂົ້າ​ບຳ­ນານ​ຍັງ​ຈະ​ຊ່ວຍ​ໃຫ້​ພາກ​ທຸ­ລະ​ກິດ​ຜ່ານ​ຜ່າ​ພາ­ລະ​ດ້ານ​ສະ­ຫວັດ­ດີ​ການ​ສັງ­ຄົມ ໃນ​ປັດ­ຈຸ­ບັນ ບໍ­ລິ­ສັດ​ຕ່າງໆ​ຂອງ​ຍີ່­ປຸ່ນ ອະ­ນຸ­ຍາດ​ໃຫ້​ພະ­ນັກ­ງານ​ສືບ­ຕໍ່​ເຮັດ​ວຽກ​ໄດ້​ເຖິງ​ອາ­ຍຸ 65 ປີ ຄາດ​ວ່າ​ຂໍ້​ສະ­ເໜີ​ຂອງ​ລັດ­ຖະ­ບານ​ໃຫ້​ພາກ​ທຸ­ລະ​ກິດ​ປັບ​ຂຶ້ນ​ອາ­ຍຸ​ເຂົ້າ​ບຳ­ນານ​ນີ້ ມີ​ທ່າ​ອ່ຽງ​ຈະ​ກາຍ­ເປັນ​ມາດ​ຕະ­ການ​ບັງ­ຄັບ​ໃນ­ຕໍ່­ໜ້າ.

    ທີ່ ຫວຽດ­ນາມ: ຂ່າວ​ຕ່າງ­ປະ­ເທດ ໃນ​ທ້າຍ​ເດືອນ​ພຶດ­ສະ­ພາ​ປີ​ນີ້​ໃຫ້​ຮູ້​ວ່າ ທາງ​ການ​ນະ­ຄອນ​ໂຮ່​ຈີ​ມິງ ໄດ້​ຕັ້ງ​ເປົ້າ​ໝາຍ​ຫຼຸດ­ຜ່ອນ​ຄວາມ­ທຸກ​ຍາກ ຢູ່​ນະ­ຄອນ​ພາຍ​ໃນ​ປີ 2020 ເຊິ່ງ​ຄາດ​ວ່າ​ເປົ້າ​ໝາຍ​ຫຼຸດ­ຜ່ອນ​ຄວາມ­ທຸກ​ຍາກ​ນີ້ ຈະ​ເຮັດ​ໃຫ້​ປະ­ຊາ­ຊົນ​ມີ​ລາຍ​ຮັບ​ສະ­ເລ່ຍ 28 ລ້ານ​ດົງ​ຕໍ່​ຄົນ​ຕໍ່​ປີ ເພື່ອ​ບັນ­ລຸ​ເປົ້າ​ໝາຍ​ດັ່ງ­ກ່າວ ບັນ­ດາ​ເຈົ້າ​ໜ້າ­ທີ່ ທີ່​ຮັບ­ຜິດ­ຊອບ​ຕ້ອງ​ຮູ້ ແລະ ເຂົ້າ­ໃຈ​ຢ່າງ​ຈະ­ແຈ້ງ ກ່ຽວ​ກັບ​ຮູບ​ແບບ​ຕ່າງໆ​ຂອງ​ຄວາມ­ທຸກ​ຍາກ ໄປ​ຄຽງ​ຄູ່​ກັບ​ນະ­ໂຍ­ບາຍ​ເຝິກ­ອົບ­ຮົມ​ດ້ານ​ວິ­ຊາ​ຊີບ ການ​ສຶກ​ສາ ການ​ບໍ­ລິ­ຫານ​ດ້ານ​ສຸ­ຂະ­ພາບ ແລະ ທີ່​ພັກ​ພາ​ອາ­ໄສ ສຳ­ລັບ​ປະ­ຊາ­ຊົນ​ທີ່​ທຸກ​ຍາກ ໃນ​ປັດ­ຈຸ­ບັນ​ຢູ່​ນະ­ຄອນ​ໂຮ່​ຈີ​ມິງ ມີ​ຄອບ­ຄົວ​ທຸກ​ຍາກ​ປະ­ມານ 103.000 ຄອບ­ຄົວ ເທົ່າ​ກັບ 4,6% ຂອງ​ຄອບ­ຄົວ​ທັງ​ໝົດ.

ຂ່າວທີ່ກ່ຽວຂ້ອງ