ຂ່າວຫຼ້າສຸດ

ຢູ-15 ລາວ ຊະນະ ກຳປູເຈຍ ສົ່ງທ້າຍຊີງແຊັມອາຊຽນ

422 07 ສ.ຫ. 2019 ວົງຈອນກີລາ
ຢູ-15 ລາວ ຊະນະ ກຳປູເຈຍ ສົ່ງທ້າຍຊີງແຊັມອາຊຽນ

    ການ​ແຂ່ງ­ຂັນ​ເຕະ­ບານ​ຊາຍ ຮຸ່ນ​ອາ­ຍຸ​ບໍ່​ເກີນ 15 ປີ ຊີງ​ແຊັມ​ອາ​ຊຽນ 2019 ທີ່​ແຂວງ​ຊົນ​ບູ​ຣີ ປະ­ເທດ​ໄທ ລະ­ຫວ່າງ ວັນ​ທີ 27 ກໍ­ລະ­ກົດ ຫາ​ວັນ​ທີ 9 ສິງ­ຫາ 2019 ໃນ​ວັນ​ທີ 5 ສິງ­ຫາ ຢູ-15 ປີ ທີມ​ຊາດ​ລາວ ລົງ​ສະ­ໜາມ​ນັດ​ສຸດ​ທ້າຍ​ຂອງ​ກຸ່ມ B ພົບ​ກັບ ຢູ-15 ປີ ທີມ​ຊາດ​ກຳ­ປູ­ເຈຍ ຜົນ​ປາ­ກົດ​ວ່າ: ທີມ​ຊາດ​ລາວ ເອົາ​ຊະ­ນະ ກຳ­ປູ­ເຈຍ ສົ່ງ​ທ້າຍ 3-0 ຈາກ​ການ​ຍິງ​ຂອງ ທິບ​ພະ­ຈັນ ຄຳ­ໃບ​ອ່ອນ ກອງ​ໜ້າ​ຈາກ​ສະ­ໂມ­ສອນ ໄອ​ດີ​ຊີ ຈຳ­ປາ​ສັກ ຢູ​ໄນ​ເຕັດ ນາ­ທີໆ 9 ກາຍ­ເປັນ​ປະ­ຕູ​ທີ 4 ຂອງ​ທິບ​ພະ­ຈັນ ໃນ​ການ​ແຂ່ງ­ຂັນ​ຄັ້ງ​ນີ້ ຕໍ່​ຈາກ​ການ​ຍິງ​ສອງ​ປະ­ຕູ ນັດ​ຊະ­ນະ​ບຣູ​ໄນ 3-0 ແລະ ສະ­ເໝີ​ກັບ ມາ​ເລ​ເຊຍ 1-1 ອີກ​ສອງ​ປະ­ຕູ​ໄດ້​ຈາກ ດາ​ໝຸດ ທອງ­ຄຳ​ສະ​ຫວັດ ອີກ​ໜຶ່ງ​ນັກ​ເຕະ​ຈາກ ໄອ​ດີ​ຊີ ຈຳ­ປາ​ສັກ ຢູ​ໄນ​ເຕັດ ນາ­ທີໆ 27 ແລະ ປິດ​ທ້າຍ​ຈາກ ພົມ­ມາ ໂຄດ​ພູ­ທອນ ກອງ​ໜ້າ​ຈາກ​ສະ­ໂມ­ສອນ ເອ​ສຣາ ນາ­ທີໆ 80.

    ສ່ວນ​ຜົນ​ອີກ​ສອງ​ຄູ່​ໃນ​ກຸ່ມ​ດຽວ​ກັນ ໄທ ເຈົ້າ­ພາບ ສະ­ເໝີ​ກັບ ມາ​ເລ​ເຊຍ 1-1 ກອດ​ຄໍ​ກັນ​ເຂົ້າ​ຮອບ​ຕໍ່​ໄປ ສ່ວນ​ອົດ​ສະ​ຕຣາ​ລີ ຊະ­ນະ ບຣູ​ໄນ 4-0 ຕົກ​ຮອບ​ທັງ​ສອງ​ທີມ ສະ­ຫຼຸບ​ຕາ­ຕະ­ລາງ​ຄະ­ແນນ ຈົບ 5 ນັດ​ກຸ່ມ B: ທີ 1 ມາ​ເລ​ເຊຍ ມີ 11 ຄະ­ແນນ ປະ­ຕູ​ໄດ້​ເສຍ +13 ທີ 2 ໄທ ມີ 11 ມີ​ປະ­ຕູ​ໄດ້​ເສຍ +11 ທັງ​ສອງ​ທີມ​ເຂົ້າ​ຮອບ​ຮອງ​ຊະ­ນະ​ເລີດ​ຕໍ່​ໄປ ຂະ­ນະ​ທີ່ ອົດ​ສະ​ຕຣາ​ລີ ມີ 10 ຄະ­ແນນ ລາວ ມີ 7 ຄະ­ແນນ ກຳ­ປູ­ເຈຍ ແລະ ບຣູ​ໄນ ມີ 1 ຄະ­ແນນ​ເທົ່າ​ກັນ ຕົກ​ຮອບ​ທັງ 4 ທີມ.

    ສຳ­ລັບ​ຜົນ­ງານ​ຂອງ ຢູ-15 ປີ ທີມ​ຊາດ​ລາວ ແຂ່ງ 5 ນັດ​ໃນ​ກຸ່ມ B ເສຍ​ໃຫ້ ໄທ 1-2 ເສຍ​ໃຫ້ ອົດ​ສະ​ຕຣາ​ລີ 0-3 ຊະ­ນະ ບຣູ​ໄນ 3-0 ສະ­ເໝີ​ກັບ ມາ​ເລ​ເຊຍ 1-1 ແລະ ຊະ­ນະ ກຳ­ປູ­ເຈຍ 3-0 ຍິງ​ໄດ້ 8 ປະ­ຕູ ເສຍ 6 ປະ­ຕູ.

    ສ່ວນ​ຮອບ​ຮອງ​ຊະ­ນະ​ເລີດ ຈະ​ແຂ່ງ​ໃນ​ວັນ​ທີ 7 ສິງ­ຫາ​ນີ້ ຄູ່​ທີ 1 ອິນ​ໂດ​ເນ​ເຊຍ ແຊັມ​ເກົ່າ ພົບ ໄທ ທັງ​ເປັນ​ຮອງ​ແຊັມ​ປີ­ຜ່ານ­ມາ ເວ­ລາ 15:00 ໂມງ ຄູ່​ທີ 2 ມາ​ເລ​ເຊຍ ພົບ ຫວຽດ­ນາມ ເວ­ລາ 18:00 ໂມງ.

ຂ່າວທີ່ກ່ຽວຂ້ອງ