ຂ່າວຫຼ້າສຸດ

ໂຮມຊຸມນຸມສະຫຼອງ ວັນສ້າງຕັ້ງອົງການກວດສອບແຫ່ງລັດ

580 06 ສ.ຫ. 2019 ຂ່າວໜ້າ​ໜຶ່ງ
ໂຮມຊຸມນຸມສະຫຼອງ ວັນສ້າງຕັ້ງອົງການກວດສອບແຫ່ງລັດ

    ອົງ­ການ​ກວດ​ສອບ​ແຫ່ງ​ລັດ ຈັດ​ພິ­ທີ​ໂຮມ​ຊຸມ­ນຸມ​ສະ­ເຫຼີມ­ສະ­ຫຼອງ ວັນ​ສ້າງ­ຕັ້ງ​ອົງ­ການ​ກວດ​ສອບ​ແຫ່ງ​ລັດ ຄົບ­ຮອບ 21 ປີ (5 ສິງ­ຫາ 1998-5 ສິງ­ຫາ 2019) ຈັດ​ຂຶ້ນ​ວັນ​ທີ 5 ສິງ­ຫາ 2019 ຢູ່​ອົງ­ການ​ດັ່ງ­ກ່າວ ໂດຍ​ເປັນ​ປະ­ທານ​ຂອງ​ທ່ານ​ນາງ ວຽງ​ທອງ ສີ​ພັນ​ດອນ ປະ­ທານ​ອົງ­ການ​ກວດ​ສອບ​ແຫ່ງ​ລັດ ມີ​ຮອງ​ປະ­ທານ​ອົງ­ການ​ກວດ​ສອບ​ແຫ່ງ​ລັດ ອົງ­ການ​ກວດ​ສອບ​ປະ­ຈຳ​ພາກ​ກາງ ສະ​ຖາ​ບັນ​ເຝິກ­ອົບ­ຮົມ ແລະ ພະ­ນັກ­ງານ-ລັດ­ຖະ­ກອນ ເຂົ້າ​ຮ່ວມ.

    ທ່ານ ຕ້ອຍ ພົນ​ທິ​ລາດ ຫົວ­ໜ້າ​ຫ້ອງ­ການ​ອົງ­ການ​ກວດ​ສອບ​ແຫ່ງ​ລັດ ໄດ້​ຍົກ​ໃຫ້​ເຫັນ​ຄວາມ​ຈຳ­ເປັນ​ພາ­ວະ​ວິ­ໄສ​ໃນ​ການ​ສ້າງ­ຕັ້ງ​ອົງ­ການ​ກວດ​ສອບ​ແຫ່ງ​ລັດ ການ​ເຕີບ​ໃຫຍ່​ຂະ­ຫຍາຍ­ຕົວ ແລະ ຜົນ­ງານ​ທີ່​ຍາດ​ມາ​ໄດ້​ແຕ່​ລະ​ໄລ­ຍະ ໂດຍ​ສະ­ເພາະ ຜົນ­ສຳ­ເລັດ​ໃນ​ການ­ເຄື່ອນ­ໄຫວ​ວຽກ​ງານ 6 ເດືອນ​ຕົ້ນ​ປີ 2019 ຂອງ​ອົງ­ການ​ກວດ​ສອບ​ແຫ່ງ​ລັດ ໄດ້​ເອົາ­ໃຈ­ໃສ່​ເຄື່ອນ​ໄຫວ​ປະ­ຕິ­ບັດ​ວຽກ​ງານ​ຕາມ​ສິດ ແລະ ພາ­ລະ​ບົດ­ບາດ ກໍ​ຄື ມະ­ຕິ​ຂອງ​ກອງ​ປະ­ຊຸມ​ສະ­ພາ​ແຫ່ງ​ຊາດ​ກຳ­ນົດ​ອອກ ເຊິ່ງ​ປີ 2019 ໄດ້​ສຳ­ເລັດ​ດຳ­ເນີນ​ການ​ກວດ​ສອບ 65 ເປົ້າ​ໝາຍ ໃນ​ນີ້ ມີ​ກະ­ຊວງ-ອົງ­ການ ແຂວງ-ນະ­ຄອນ­ຫຼວງ 32 ເປົ້າ​ໝາຍ ໂຄງ­ການ​ເງິນ​ກູ້​ຢືມ ແລະ ຊ່ວຍ­ເຫຼືອ​ລ້າ​ຈາກ​ຕ່າງ­ປະ­ເທດ 16 ເປົ້າ​ໝາຍ ວິ​ສາ​ຫະ​ກິດ​ລັດ 11 ເປົ້າ​ໝາຍ ໂຄງ­ການ​ຈັດ​ສັນ​ພູມ­ລຳ­ເນົາ ແລະ ບ່ອນ​ທຳ​ມາ​ຫາ​ກິນ​ຖາ­ວອນ ໂຄງ­ການ​ລົງ­ທຶນ ແລະ ທະ­ນາ­ຄານ​ຂອງ​ລັດ​ພາກ­ສ່ວນ​ລະ 1 ເປົ້າ​ໝາຍ ວຽກ​ງານ 3 ສ້າງ ແລະ ຈັດ​ຊື້-ຈັດ​ຈ້າງ​ຂອງ​ທະ​ນານ​ຄານ​ລັດ 2 ເປົ້າ​ໝາຍ ອອກ​ບົດ​ແຈ້ງ​ຜົນ​ການ​ກວດ​ສອບ 51 ເປົ້າ​ໝາຍ ເຊິ່ງ​ການ​ດຳ­ເນີນ​ການ​ກວດ​ສອບ​ໄດ້​ປະ­ຕິ­ບັດ​ຕາມ​ກົດ  ໝາຍ ວ່າ​ດ້ວຍ​ການ​ກວດ​ສອບ​ແຫ່ງ​ລັດ ແລະ ຫຼັກ​ວິ­ຊາ​ສະ­ເພາະ ຄື: ກວດ​ສອບ​ເອ­ກະ­ສານ​ລາຍ​ງານ​ການ​ເງິນ ກວດ​ສອບ​ຄວາມ​ສອດ­ຄ່ອງ​ຕາມ​ລະ­ບຽບ​ກົດ­ໝາຍ ແລະ ຜົນ​ການ­ຈັດ­ຕັ້ງ​ປະ­ຕິ­ບັດ.

    ສຳ­ເລັດ​ການ​ລາຍ​ງານ​ຜົນ​ການ​ການ​ກວດ​ສອບ​ເອ­ກະ­ສານ​ການ​ເງິນ​ຂອງ​ວິ​ສາ​ຫະ​ກິດ​ລັດ ແລະ ທະ­ນາ­ຄານ ປະ­ຈຳ​ປີ 2018 ເພື່ອ​ລາຍ​ງານ​ຕໍ່​ຄະ­ນະ​ປະ­ຈຳ​ສະ­ພາ​ແຫ່ງ​ຊາດ ຈັດ​ກອງ​ປະ­ຊຸມ​ເປີດ​ກວ້າງ ວຽກ​ງານ​ກວດ​ສອບ​ງົບ­ປະ­ມານ​ແຫ່ງ​ລັດ ປະ­ຈຳ​ປີ 2018 ສຳ­ເລັດ​ການ​ກຳ­ນົດ​ວິ­ໄສ​ທັດ ຮອດ​ປີ 2030 ຍຸດ​ທະ​ສາດ​ການ​ພັດ­ທະ­ນາ ຮອດ​ປີ 2025 ແລະ ແຜນ​ພັດ­ທະ­ນາ​ອົງ­ການ​ກວດ​ສອບ​ແຫ່ງ​ລັດ ຮອດ​ປີ 2021 ສຳ­ເລັດ​ການ​ລົງ​ນາມ​ບົດ​ບັນ­ທຶກ​ການ​ປະ­ສານ​ງານ ລະ­ຫວ່າງ​ອົງ­ການ​ກວດ​ສອບ​ແຫ່ງ​ລັດ ກັບ​ກະ­ຊວງ​ແຜນ­ການ ແລະ ການ​ລົງ­ທຶນ ແລະ ກະ­ຊວງ​ການ​ເງິນ ຄົ້ນ­ຄວ້າ​ການ​ຜັນ​ຂະ­ຫຍາຍ​ມາດ­ຕາ 19 (ການ​ແກ້​ໄຂ​ການ​ລະ­ເມີດ) ກົດ­ໝາຍ​ວ່າ​ດ້ວຍ​ການ​ກວດ​ສອບ ແລະ ສ້າງ​ບົດ​ບັນ­ທຶກ​ການ​ປະ­ສານ​ງານ ລະ­ຫວ່າງ​ອົງ­ການ​ກວດ​ສອບ​ປະ­ຈຳ​ພາກ​ກາງ ກັບ​ສະ­ພາ​ປະ­ຊາ­ຊົນ​ຂັ້ນ​ແຂວງ-ນະ­ຄອນ­ຫຼວງ ແລະ​ ອື່ນໆ ເພື່ອ​ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ແຕ່​ລະ​ດ້ານ​ມີ​ຄວາມ​ຖືກ­ຕ້ອງ ສອດ­ຄ່ອງ​ຫຼາຍ​ຂຶ້ນ.

    ໃນ​ພິ­ທີ​ຍັງ​ໄດ້​ມີ​ການ​ມອບ​ໃບ​ຍ້ອງ­ຍໍ​ໃຫ້​ພະ­ນັກ­ງານ-ລັດ­ຖະ­ກອນ ອົງ­ການ​ກວດ​ສອບ​ແຫ່ງ​ລັດ ແລະ ອົງ­ການ​ກວດ​ສອບ ປະ­ຈຳ 3 ພາກ ທີ່​ມີ​ຜົນ­ງານ​ດີ­ເດັ່ນ​ໃນ​ການ­ເຄື່ອນ­ໄຫວ​ວຽກ​ງານ ໄລ­ຍະ​ຜ່ານ​ມາ 100 ທ່ານ ຍິງ 42 ທ່ານ  ແລະ ຮັບ​ຟັງ​ການ​ໂອ້​ລົມ​ຈາກ​ປະ­ທານ​ອົງ­ການ​ກວດ​ສອບ​ແຫ່ງ​ລັດ​ຕື່ມ​ອີກ.

ຂ່າວທີ່ກ່ຽວຂ້ອງ