ຂ່າວຫຼ້າສຸດ

ຕະລຸມບອນທຳລາຍແຫຼ່ງເພາະພັນຍຸງລາຍ

487 06 ສ.ຫ. 2019 ຂ່າວໜ້າ​ໜຶ່ງ
ຕະລຸມບອນທຳລາຍແຫຼ່ງເພາະພັນຍຸງລາຍ

    ກະ­ຊວງ​ສາ­ທາ­ລະ­ນະ​ສຸກ ຮ່ວມ​ກັບ​ພະ​ແນກ​ສາ­ທາ­ລະ­ນະ​ສຸກ ນະ­ຄອນ­ຫຼວງ​ວຽງ​ຈັນ ຫ້ອງ­ການ​ສາ​ທາ​ລະນະ​ສຸກ ເມືອງ​ໄຊ​ເສດ​ຖາ ອຳ­ນາດ​ການ​ປົກ­ຄອງ ບ້ານ​ແສງ​ສະ­ຫວ່າງ ນຳ­ພາ​ປະ­ຊາ­ຊົນ​ສ້າງ​ຂະ​ບວນ​ການ​ຕະ­ລຸມ­ບອນ​ທຳ­ລາຍ​ແຫຼ່ງ​ເພາະ​ພັນ​ຍຸງ​ລາຍ ໂດຍ​ເລັ່ງ​ໃສ່​ປະ­ຕິ­ບັດ 5ປ ເພື່ອ​ທຳ­ລາຍ​ແຫຼ່ງ​ເພາະ​ພັນ​ຂອງ​ຍຸງ​ລາຍ ທີ່​ເປັນ​ພາ­ຫະ­ນະ​ນຳ​ເຊື້ອ​ໄຂ້­ຍຸງ​ລາຍ​ສູ່​ຄົນ ພາຍ­ຫຼັງ​ໄດ້​ພົບ​ຜູ້​ຕິດ­ເຊື້ອ​ໄຂ້­ຍຸງ​ລາຍ​ສະ​ສົມ ໃນ​ນະ­ຄອນ­ຫຼວງ​ວຽງ​ຈັນ 4.625 ກໍ­ລະ­ນີ ເສຍ​ຊີ­ວິດ 12 ຄົນ

    ຂະ​ບວນ​ການ​ຕະ­ລຸມ­ບອນ​ຄັ້ງ​ນີ້ ຈັດ​ຂຶ້ນ​ວັນ​ທີ 3 ສິງ­ຫາ 2019 ຢູ່​ບ້ານ​ແສງ​ສະ­ຫວ່າງ ເມືອງ​ໄຊ​ເສດ​ຖາ ນະ­ຄອນ­ຫຼວງ​ວຽງ​ຈັນ ເຊິ່ງ​ນຳ​ໂດຍ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນະ­ຄອນ­ຫຼວງ​ວຽງ​ຈັນ ແລະ ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ.

    ປີ 2019 ເປັນ​ປີ​ທີ່​ພະ­ຍາດ​ໄຂ້­ຍຸງ​ລາຍ​ໄດ້​ແຜ່​ລະ­ບາດ​ໜັກ​ຢູ່​ໃນ​ທົ່ວ​ປະ­ເທດ ແລະ ມີ​ທ່າ​ອ່ຽງ​ເພີ່ມ​ຂຶ້ນ​ໃນ​ນະ­ຄອນ­ຫຼວງ​ວຽງ​ຈັນ ໂດຍ​ສະ­ເພາະ ເມືອງ​ໄຊ​ເສດ​ຖາ ເປັນ​ເມືອງ​ໜຶ່ງ ຮອງ​ຈາກ​ເມືອງ​ໄຊ​ທາ­ນີ ທີ່​ມີ​ການ​ລະ­ບາດ​ກວມ​ເອົາ​ຫຼາຍ​ບ້ານ ຜູ້​ຕິດ­ເຊື້ອ​ໄຂ້­ຍຸງ​ລາຍ 953 ກໍ­ລະ­ນີ ເສຍ​ຊີ­ວິດ 2 ຄົນ ອີງ​ຕາມ​ການ​ປະ​ເມີນ​ການ​ສຳ​ຫຼວດ​ໜອນ​ນ້ຳ ບ້ານ​ທີ່​ມີ​ຄວາມ​ສ່ຽງ​ສູງ​ທີ່​ຈະ​ເກີດ​ພະ­ຍາດ​ໄຂ້­ຍຸງ​ລາຍ ປະ­ກອບ​ມີ: ບ້ານ​ຊຳ​ເຄ້ ແສງ​ສະ­ຫວ່າງ ໂຊກ​ຄຳ ອາ​ມອນ ຮ່ອງ​ສຸ­ພາບ ວັງ​ຊາຍ ຊຽງ​ດາ ຄຳ​ສະ­ຫວາດ ໂພນ​ທັນ ແລະ ບ້ານ​ໂນນ​ສະ­ຫວ່າງ ໃນ​ນີ້​ບ້ານ​ແສງ​ສະ­ຫວ່າງ ເປັນ​ບ້ານ​ທີ່​ມີ​ຄວາມ​ໝາ​ແໜ້ນ​ຂອງ​ໜອນ​ຍຸງ ທີ່​ຕ້ອງ​ໄດ້​ຮ່ວມ​ກັນ​ຕະ­ລຸມ­ບອນ​ຕັດ​ວົງ​ຈອນ ໜອນ​ນ້ຳ​ຍຸງ​ລາຍ ພ້ອມ​ທັງ​ໂຄ­ສະ­ນາ​ໃຫ້​ສຸ​ຂະ​ສຶກ​ສາ ໂດຍ​ສະ­ເພາະ ການ​ປະ­ຕິ­ບັດ​ຫຼັກ­ການ 5ປ ໄປ​ພ້ອມ​ກັບ​ການ​ໂຄ­ສະ­ນາ​ຜົນ​ຮ້າຍ​ຂອງ​ພະ­ຍາດ​ໄຂ້­ຍຸງ​ລາຍ.

    ເພື່ອ​ປ້ອງ​ກັນ ແລະ ຄວບ​ຄຸມ­ພະ​ຍາດ​ໄຂ້­ຍຸງ​ລາຍ ໃນ​ໄລ­ຍະ​ຜ່ານ​ມາ ຫ້ອງ­ການ​ສາ­ທາ­ລະ­ນະ​ສຸກ ເມືອງ​ໄຊ​ເສດ​ຖາ ໄດ້​ລົງ​ທຳ­ລາຍ​ແຫຼ່ງ​ເພາະ​ພັນ​ຂອງ​ໜອນ​ນ້ຳ​ຍຸງ​ລາຍ ໂດຍ​ສົມ­ທົບ​ກັບ​ການ­ຈັດ­ຕັ້ງ​ບ້ານ ໄດ້ 104 ຄັ້ງ ພົ່ນ​ຢາ​ຂ້າ​ຍຸງ​ໂຕ​ແກ່ 35 ຄັ້ງ ນອກ​ນີ້ ຄະ­ນະ​ແພດ​ໝໍ​ຍັງ​ໄດ້​ລົງ​ໃຫ້​ສຸ​ຂະ​ສຶກ​ສາ​ແກ່​ປະ­ຊາ­ຊົນ 1.005 ຄົນ ໃນ 18 ບ້ານ ສ້າງ­ສັນ​ຍາ​ຄອບ­ຄົວ 3.506 ຫຼັງ­ຄາ​ເຮືອນ ລະ­ດົມ​ໃຫ້​ປະ­ຊາ­ຊົນ​ລ້ຽງ​ປາ​ຫາງ​ນົກ​ຍຸງ 6.102 ອ່າງ.

ຂ່າວທີ່ກ່ຽວຂ້ອງ