ຂ່າວຫຼ້າສຸດ

ສົ່ງເສີມຍົກສູງລະດັບຊີວິດການເປັນຢູ່ຂອງປະຊາຊົນ ໃນອະນຸພາກພື້ນແມ່ນ້ຳຂອງ

634 05 ສ.ຫ. 2019 ຂ່າວໜ້າ​ໜຶ່ງ
ສົ່ງເສີມຍົກສູງລະດັບຊີວິດການເປັນຢູ່ຂອງປະຊາຊົນ ໃນອະນຸພາກພື້ນແມ່ນ້ຳຂອງ

    ວັນ​ທີ 1 ສິງ­ຫາ 2019 ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ໄດ້​ນຳ­ພາ​ຄະ­ນະ​ຜູ້​ແທນ​ລາວ ເຂົ້າ​ຮ່ວມ​ກອງ​ປະ­ຊຸມ​ລັດ­ຖະ­ມົນ­ຕີ​ຕ່າງ­ປະ­ເທດ​ຂອບ​ການ​ຮ່ວມ​ມື​ແມ່­ນ້ຳ​ຂອງ​ຕອນ​ລຸ່ມ-ສ ອາ​ເມ​ຣິ​ກາ ຄັ້ງ​ທີ 12 ແລະ ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ຄົງ​ຄາ ຄັ້ງ​ທີ 10 ທີ່​ບາງ­ກອກ​ປະ­ເທດ​ໄທ ມີ​ລັດ­ຖະ­ມົນ­ຕີ ແລະ ຄະ­ນະ​ຜູ້​ແທນ​ຈາກ​ປະ­ເທດ​ແມ່­ນ້ຳ​ຂອງ (ກຳ­ປູ­ເຈຍ ລາວ ມຽນ​ມາ ໄທ ຫວຽດ­ນາມ) ແລະ ບັນ­ດາ​ຄູ່​ຮ່ວມ​ພັດ­ທະ­ນາ (ສ ອາ​ເມ​ຣິ​ກາ ແລະ ອິນ​ເດຍ) ລວມ​ທັງ​ກອງ​ເລ­ຂາ​ອາ​ຊຽນ​ເຂົ້າ​ຮ່ວມ.

    ກອງ​ປະ­ຊຸມ​ເປັນ​ປະ­ທານ​ຮ່ວມ​ລະ­ຫວ່າງ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ​ໄທ ແລະ ອາ​ເມ​ຣິ​ກາ ກອງ​ປະ­ຊຸມ​ໄດ້​ສະ­ແດງ​ຄວາມ​ຍິນ​ດີ​ຕໍ່​ໝາກ­ຜົນ​ຂອງ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ແຜນ​ວຽກ ແລະ ໂຄງ­ການ​ຕ່າງໆ​ພາຍ​ໃຕ້​ຂອບ​ຮ່ວມ​ມື​ດັ່ງ­ກ່າວ ໃນ​ໄລ­ຍະ 10 ປີ ຜ່ານ​ມາ ໃນ​ນັ້ນ ລາວ​ເຮົາ​ໄດ້​ຮ່ວມ​ກັບ​ອາ​ເມ​ຣິ​ກາ​ສຳ­ເລັດ​ການ­ຈັດ­ຕັ້ງ​ປະ­ຕິ­ບັດ​ບັນ­ດາ​ໂຄງ­ການ​ອົບ­ຮົມ​ດ້ານ​ເຕັກ­ນິກ​ວິ­ຊາ​ການ​ແບບ​ຕໍ່​ເນື່ອງ ເພື່ອ​ຍົກ​ລະ­ດັບ​ຄວາມ​ອາດ​ສາ­ມາດ​ໃຫ້​ແກ່​ບຸ​ຄະ­ລາ​ກອນ​ຂອງ​ລາວ ເຊິ່ງ​ບັນ­ດາ​ໂຄງ­ການ​ທີ່​ພົ້ນ​ເດັ່ນ​ລວມ​ມີ: ໂຄງ­ການ​ອົບ­ຮົມ​ພາ­ສາ​ອັງ­ກິດ ສະ­ເພາະ​ດ້ານ​ໃຫ້​ແກ່​ພະ­ນັກ­ງານ​ລັດ­ຖະ­ກອນ ຢູ່​ສະ​ຖາ​ບັນ​ການ​ຕ່າງ­ປະ­ເທດ ໃນ​ແຕ່​ລະ​ປີ 2011-2017 ໂຄງ­ການ​ພື້ນ­ຖານ​ໂຄງ​ລ່າງ​ທີ່​ທັນ​ສະ­ໄໝ​ສຳ­ລັບ​ແມ່­ນ້ຳ​ຂອງ ຢູ່​ກະ­ຊວງ​ພະ­ລັງ­ງານ ແລະ ບໍ່​ແຮ່ 5 ໂຄງ­ການ ປີ 2014-2017 ລວມ​ມູນ​ຄ່າ​ຫຼາຍ​ກວ່າ 1,75 ລ້ານ​ໂດ​ລາ ໂຄງ­ການ​ເຊື່ອມ​ຈອດ​ແມ່­ນ້ຳ​ຂອງ ໂດຍ​ຜ່ານ​ການ​ສຶກ​ສາ ແລະ ອົບ­ຮົມ 1 ໂຄງ­ການ ສຳ­ລັບ​ສົກ​ປີ 2016-2017 ຢູ່​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ແລະ ປີ 2017 ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ແລະ ອົງ­ການ ການ​ສຶກ​ສາ​ໂລກ​ໄດ້​ຮ່ວມ​ສ້າງ­ຕັ້ງ​ສູນ​ອົບ­ຮົມ​ຝີ​ມື​ແຮງ​ງານ ສຳ­ລັບ​ຜູ້​ປະ­ກອບ​ການ​ເພດ​ຍິງ ຢູ່​ນະ­ຄອນ­ຫຼວງ​ວຽງ​ຈັນ ນອກ​ນີ້ ບັນ­ດາ​ລັດ­ຖະ­ມົນ­ຕີ​ຍັງ​ໄດ້​ປຶກ­ສາ​ຫາ­ລື​ກັນ​ກ່ຽວ​ກັບ​ເອ­ກະ­ສານ​ແນວ​ຄວາມ​ຄິດ​ໃໝ່​ທີ່​ອາ​ເມ​ຣິ​ກາ ສະ­ເໜີ​ຂຶ້ນ​ຊື່­ວ່າ: “ໂຄງ­ການ​ຜົນ​ກະ­ທົບ​ຕໍ່​ສາ­ທາ­ລະ­ນະ” ພ້ອມ​ທັງ​ແລກ­ປ່ຽນ​ຄວາມ​ຄິດ​ຄວາມ​ເຫັນ ກ່ຽວ​ກັບ​ອະ­ນາ­ຄົດ​ຂອງ​ແມ່­ນ້ຳ​ຂອງ ໂດຍ​ເນັ້ນ​ໃສ່​ຂົງ­ເຂດ​ຈຸດ​ສຸມ​ຂອງ​ການ​ຮ່ວມ​ມື​ໃນ​ປີ​ຕໍ່­ໜ້າ ກອງ​ປະ­ຊຸມ​ຍັງ​ໄດ້​ຮັບ­ຮອງ​ເອົາ​ເອ­ກະ­ສານ​ສຳ­ຄັນ 2 ສະ­ບັບ ຄື: ຖະ­ແຫຼງ­ການ​ຮ່ວມ​ວ່າ​ດ້ວຍ​ການ​ສະ­ເຫຼີມ ສະ­ຫຼອງ​ຂອບ​ການ​ຮ່ວມ​ມື​ແມ່­ນ້ຳ​ຂອງ​ຕອນ​ລຸ່ມ-ອາ​ເມ​ຣິ​ກາ ຄົບ­ຮອບ 10 ປີ ແລະ ຖະ­ແຫຼງ­ການ​ຮ່ວມ ວ່າ​ດ້ວຍ​ການ​ຮັດ​ແໜ້ນ​ຄວາມ​ຮ່ວມ​ມື ລະ­ຫວ່າງ​ເພື່ອນ​ແມ່­ນ້ຳ​ຂອງ​ຕອນ​ລຸ່ມ ເພື່ອ​ເປັນ​ທິດ​ທາງ​ໃຫ້​ແກ່​ການ​ຮ່ວມ​ມື​ໃນ­ຕໍ່­ໜ້າ​ແນ­ໃສ່​ສົ່ງ­ເສີມ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ຍົກ​ສູງ​ລະ­ດັບ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ໃນ​ອະ­ນຸ​ພາກ​ພື້ນ​ແມ່­ນ້ຳ​ຂອງ​ໃຫ້​ດີ​ຂຶ້ນ​ເທື່ອ​ລະ​ກ້າວ ພິ­ເສດ ກ່ອນ​ດຳ­ເນີນ​ກອງ​ປະ­ຊຸມ​ບັນ­ດາ​ລັດ­ຖະ­ມົນ­ຕີ ແລະ ຜູ້​ເຂົ້າ​ຮ່ວມ​ທັງ​ໝົດ ໄດ້​ຮັບ​ຊົມ​ວີ​ດີ​ໂອ​ໝາກ­ຜົນ​ຂອງ​ການ​ຮ່ວມ​ມື​ໃນ​ຂອບ​ການ​ຮ່ວມ​ມື​ແມ່­ນ້ຳ​ຂອງ-ອາ​ເມ​ຣິ​ກາ ຄົບ­ຮອບ 10 ປີ ແລະ ຕອນ​ທ້າຍ​ຂອງ​ກອງ​ປະ­ຊຸມ ລັດ­ຖະ­ມົນ­ຕີ​ຍັງ​ໄດ້​ຮ່ວມ​ພິ­ທີ​ມອບ​ລາ­ງວັນ ໃຫ້​ບັນ­ດາ​ອະ­ດີດ​ນັກ​ສຶກ​ສາ​ທີ່​ດີ­ເດັ່ນ​ຂອງ LMI (LMI Outstanding Alumni Award Ceremony).

    ໃນ​ວັນ​ດຽວ​ກັນ ທ່ານ ສະ­ເຫຼີມ​ໄຊ ກົມ​ມະ​ສິດ ຍັງ​ໄດ້​ເຂົ້າ​ຮ່ວມ​ກອງ​ປະ­ຊຸມ​ລັດ­ຖະ­ມົນ­ຕີ​ຕ່າງ­ປະ­ເທດ ຂອບ​ການ​ຮ່ວມ​ມື​ແມ່­ນ້ຳ​ຂອງ-ແມ່­ນ້ຳ​ຄົງ​ຄາ ຄັ້ງ​ທີ 10 ເຊິ່ງ​ເປັນ​ປະ­ທານ​ຮ່ວມ ລະ­ຫວ່າງ​ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ຕ່າງ­ປະ­ເທດ​ຂອງ​ຫວຽດ­ນາມ ແລະ ລັດ­ຖະ­ມົນ­ຕີ​ຕ່າງ­ປະ­ເທດ​ຂອງ​ອິນ​ເດຍ ຕື່ມ​ອີກ.

ຂ່າວທີ່ກ່ຽວຂ້ອງ