ມີນັກສຶກສາສອບເສັງຄັດເລືອກເຂົ້າຮຽນ ມຊ 15 ພັນຄົນ ໃນສົກສຶກສາ 2019-2020

575 05 ສ.ຫ. 2019 ຂ່າວໜ້າ​ໜຶ່ງ
ມີນັກສຶກສາສອບເສັງຄັດເລືອກເຂົ້າຮຽນ ມຊ  15 ພັນຄົນ ໃນສົກສຶກສາ 2019-2020

    ວັນ​ທີ 3 ສິງ­ຫາ 2019 ຜ່ານ​ມາ​ນີ້ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ໄດ້​ຈັດ­ການ​ສອບ­ເສັງ​ຄັດ​ເລືອກ​ເອົາ​ນັກ​ສຶກ​ສາ​ເຂົ້າ​ຮຽນ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ປະ­ຈຳ​ສົກ​ສຶກ​ສາ 2019-2020 ໂດຍ​ການ​ເຂົ້າ​ຮ່ວມ​ສັງ­ເກດ​ການ​ຂອງ​ທ່ານ ຮສ. ປອ. ກອງ​ສີ ແສງ​ມະ­ນີ ຮອງ​ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ ແລະ ທ່ານ ສຈ. ປອ. ສົມ​ສີ ຍໍ​ພັນ​ໄຊ ອະ­ທິ­ການ​ບໍ­ດີ  ມຊ ພ້ອມ​ດ້ວຍ​ຄະ­ນະ​ຊີ້​ນຳ​ການ​ສອບ­ເສັງ ທີ່​ສູນ​ການ​ສອບ­ເສັງ​ໃຫຍ່ ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ວິ­ທະ­ຍາ​ເຂດ​ດົງ​ໂດກ).

    ການ​ຈັດ­ການ​ສອບ­ເສັງ​ໃນ​ຄັ້ງ​ນີ້​ໄດ້​ແບ່ງ​ອອກ​ເປັນ 3 ກຸ່ມ ຄື ກຸ່ມ A ຕອນ​ເຊົ້າ​ສອບ­ເສັງ​ວິ­ຊາ ຄະ­ນິດ­ສາດ ສາຍ A +ພາ­ສາ​ລາວ-ວັນ­ນະ­ຄະ­ດີ ຕອນ​ບ່າຍ ສອບ­ເສັງ​ວິ­ຊາ​ຟິ​ຊິກ​ສາດ + ເຄ​ມີ​ສາດ + ຊີ­ວະ​ສາດ ກຸ່ມ B ຕອນ​ເຊົ້າ ສອບ­ເສັງ​ວິ­ຊາ​ຄະ­ນິດ­ສາດ​ສາຍ B+ ພາ­ສາ​ລາວ-ວັນ­ນະ­ຄະ­ດີ ຕອນ​ບ່າຍ ສອບ­ເສັງ​ວິ­ຊາ​ພູມ​ສາດ + ປະ­ຫວັດ­ສາດ ກຸ່ມ C ຕອນ​ເຊົ້າ​ສອບ­ເສັງ​ວິ­ຊາ ຄະ­ນິດ­ສາດ​ສາຍ C+ເຄ​ມີ​ສາດ + ຊີ­ວະ​ສາດ ຕອນ​ບ່າຍ ສອບ­ເສັງ​ວິ­ຊາ​ພູມ​ສາດ + ປະ­ຫວັດ­ສາດ + ພາ­ສາ​ລາວ-ວັນ­ນະ­ຄະ­ດີ ເຊິ່ງ​ການ​ສອບ­ເສັງ​ໃນ​ພາກ​ເຊົ້າ ເລີ່ມ​ແຕ່​ເວ­ລາ 9:00 – 11:00 ໂມງ ສ່ວນ​ຕອນ​ບ່າຍ​ແມ່ນ​ເລີ່ມ​ແຕ່​ເວ­ລາ 14:00 – 16:00 ໂມງ (ສ່ວນ​ສາຍ B ແລະ C ແມ່ນ​ເລີ່ມ​ແຕ່​ເວ­ລາ 14:00 – 15:30 ໂມງ).

    ທ່ານ ຮສ.ດຣ. ຄຳ​ຜົງ ນາມ​ມະ​ວົງ​ມີ​ໄຊ​ຫົວ­ໜ້າ​ຫ້ອງ­ການ​ວິ­ຊາ​ການ ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ​ ໄດ້​ໃຫ້​ສຳ­ພາດ​ວ່າ ສະ­ພາບ​ການ​ສອບ­ເສັງ​ເຂົ້າ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ​ໃນ​ສົກ​ສຶກ​ສາ 2019-2020 ໂດຍ​ລວມ​ເຫັນ​ວ່າ​ຢູ່​ໃນ​ສະ­ພາບ​ປົກ­ກະ­ຕິ ແຕ່​ກໍ​ຍັງ​ມີ​ນັກ​ສຶກ​ສາ​ຈຳ­ນວນ​ໜ້ອຍ​ໜຶ່ງ ທີ່­ຢູ່​ເຂດ​ຫ່າງ​ໄກ​ສອກ­ຫຼີກ​ທີ່​ມາ​ຊ້າ​ເຮັດ​ໃຫ້​ເຂົ້າ​ຫ້ອງ​ສອບ­ເສັງ​ບໍ່​ທັນ​ຕາມ​ເວ­ລາ​ທີ່​ກຳ­ນົດ ແຕ່​ເຖິງ​ແນວ­ໃດ​ກໍ​ຕາມ​ການ​ສອບ­ເສັງ​ກໍ​ຖື​ວ່າ​ລຸ​ລ່ວງ​ໄປ​ດ້ວຍ​ດີ ແລະ ປະ­ສົບ​ຜົນ­ສຳ­ເລັດ ມີ​ປະ­ສິດ­ທິ­ພາບ​ຢ່າງ​ໜ້າ​ພໍ­ໃຈ ບັນ­ດາ​ກຳ­ມະ­ການ​ຄວບ​ຄຸມ​ຫ້ອງ​ສອບ­ເສັງ ແລະ​ນັກ­ຮຽນ​ທີ່​ເຂົ້າ​ສອບ­ເສັງ​ແມ່ນ​ໄດ້​ປະ­ຕິ­ບັດ​ລະ­ບຽບ​ການ​ສອບ­ເສັງ​ຢ່າງ​ເຄັ່ງ​ຄັດ ບໍ່​ມີ​ການ​ສຸດ­ຈະ­ລິດ ການ​ສອບ­ເສັງ​ແມ່ນ​ໄດ້​ແບ່ງ​ອອກ​ເປັນ 17 ຈຸດ​ສອບ­ເສັງ ມີ 647 ຫ້ອງ​ສອບ­ເສັງ ມີ​ກຳ­ມະ­ການ​ຄວບ​ຄຸມ​ຫ້ອງ​ສອບ­ເສັງ​ທັງ​ໝົດ 1.385 ທ່ານ ຈຳ­ນວນ​ນັກ​ສຶກ​ສາ​ທີ່​ທາງ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ​ຈະ​ຮັບ​ໃນ​ສົກ​ສຶກ​ສາ 2019-2020 ນີ້​ແມ່ນ​ປະ­ມານ 8.100 ຄົນ ນັບ​ທັງ​ນັກ​ສຶກ​ສາ​ທີ່​ໄດ້​ຮັບ​ທຶນ​ແບ່ງ­ປັນ (ນັກ​ສຶກ​ສາ​ໃນ​ແຜນ) ແລະ ນັກ​ສຶກ​ສາ​ທີ່​ເປັນ​ພະ­ນັກ­ງານ​ມາ​ຮຽນ​ຕໍ່; ສະ­ເພາະ​ນັກ​ສຶກ​ຮຽນ​ທີ່​ຈົບ ມ7 ທີ່​ໄດ້​ສະ­ໝັກ​ເຂົ້າ​ສອບ­ເສັງ ແມ່ນ​ຈະ​ຮັບ​ປະ­ມານ 5.000 ຄົນ ຈາກ​ຜູ້​ມີ­ໜ້າ​ສອບ­ເສັງ​ຕົວ​ຈິງ 15.000 ກວ່າ​ຄົນ​ສຳ­ລັບ​ສາ­ຂາ​ວິ­ຊາ​ຮຽນ​ທີ່​ໄດ້​ຮັບ​ຄວາມ​ນິ­ຍົມ​ຫຼາຍ​ກວ່າ​ໝູ່​ແມ່ນ​ສາ­ຂາ​ພາ­ສາ​ຈີນ ສາ­ຂາ​ພາ­ສາ​ອັງ­ກິດ ຄະ­ນະ​ອັກ­ສອນ­ສາດ​ແລະ​ສາ­ຂາ​ການ​ເງິນ-ການ​ທະ­ນາ­ຄານ ຄະ­ນະ​ເສດ­ຖະ­ສາດ ແລະ​ບໍ­ລິ­ຫານ​ທຸ­ລະ​ກິດ ສ່ວນ​ຄະ­ນະ​ທີ່​ໄດ້​ຮັບ​ຄວາມ​ນິ­ຍົມ​ຫຼາຍ​ກວ່າ​ໜູ່ ແມ່ນ​ຄະ­ນະ​ວິ­ສະ­ວະ­ກຳ​ສາດ ສຳ­ລັບ​ຜົນ​ການ​ສອບ­ເສັງ​ຄາດ​ວ່າ​ຈະ​ປະ­ກາດ​ເງ​ແຈ້ງ ໃຫ້​ຮູ້​ໃນ​ທ້າຍ​ເດືອນ ສິງ­ຫາ​ນີ້ ຈາກ​ນັ້ນ ກໍ​ຈະ​ເປີດ​ຮັບ​ການ​ລົງ­ທະ­ບຽນ ໃນ​ເດືອນ​ກັນ­ຍາ ແລະ ຈະ​ເລີ່ມ​ເຂົ້າ​ຮຽນ​ໃນ​ວັນ​ທີ 1 ຕຸ­ລາ 2019 ການ​ສອບ­ເສັງ​ໃນ​ຄັ້ງ​ນີ້ ​ແມ່ນ​ມີ​ຄວາມ​ໂປ່ງ​ໃສ​ແລະ​ສາ­ມາດ​ກວດ​ສອບ​ໄດ້ ເພາະ​ພວກ​ເຮົາ​ໄດ້​ນຳ​ໃຊ້​ລະ­ບົບ​ຄອມ​ພິວ​ເຕີ ​ບໍ່​ວ່າ​ຈະ​ເປັນ​ລະ­ບົບ​ການ​ຈັດ​ລຽງ​ຄະ­ແນນ ການ​ກວດ​ສອບ​ຫົວ​ບົດ.

ຂ່າວທີ່ກ່ຽວຂ້ອງ