ຂ່າວຫຼ້າສຸດ

ສົ່ງເສີມປະຊາຊົນນຳໃຊ້ເຕົາປະຢັດ ສະອາດ ແລະ ເປັນມິດຕໍ່ສິ່ງແວດລ້ອມ

547 05 ສ.ຫ. 2019 ຂ່າວໜ້າ​ໜຶ່ງ
ສົ່ງເສີມປະຊາຊົນນຳໃຊ້ເຕົາປະຢັດ ສະອາດ ແລະ ເປັນມິດຕໍ່ສິ່ງແວດລ້ອມ

    ພິ­ທີ​ລົງ​ນາມ​ສັນ­ຍາ​ການ​ຊື້-ຂາຍ ການ​ຫຼຸດ­ຜ່ອນ​ມົນ​ລະ​ພິດ​ຂອງ​ໂຄງ­ການ​ສົ່ງ­ເສີມ ນຳ​ໃຊ້​ເຕົາ​ສະ­ອາດ​ໃນ ສປປ ລາວ ຈັດ​ຂຶ້ນ​ວັນ​ທີ 1 ສິງ­ຫາ 2019 ທີ່​ກະ­ຊວງ​ພະ­ລັງ­ງານ ແລະ ບໍ່​ແຮ່ ເປັນ​ກຽດ​ລົງ​ນາມ​ຂອງ​ທ່ານ ສີ​ນາ­ວາ ສຸ​ພາ­ນຸ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ແລະ ທ່ານ Nicola PONTARA ຫົວ­ໜ້າ​ຫ້ອງ­ການ​ທະ­ນາ­ຄານ​ໂລກ ປະ­ຈຳ ສປປ ລາວ ມີ​ຫົວ­ໜ້າ​ກົມ ຫ້ອງ­ການ ສະ­ຖານ​ບັນ ແລະ ຂະ­ແໜງ­ການ​ທີ່​ກ່ຽວ­ຂ້ອງ​ເຂົ້າ ຮ່ວມ.

    ທ່ານ ສີ​ນາ­ວາ ສຸ​ພາ­ນຸ​ວົງ ກ່າວ​ວ່າ: ການ​ລົງ​ນາມ​ໃນ​ຄັ້ງ​ນີ້ ຖື​ເປັນ​ການ​ລິ​ເລີ່ມ​ທີ່​ມີ​ຄວາມ​ໝາຍ​ອັນ​ສຳ­ຄັນ ແລະ ເປັນ​ໂຄງ­ການ​ທຳ​ອິດ​ທີ່​ບໍ່​ເຄີຍ​ຈັດ​ຕັ້ງ​ປະ­ຕິ­ບັດ​ຜ່ານ​ມາ​ກ່ອນ​ໃນ ສປປ ລາວ ທີ່​ໄດ້​ມີ​ການ ຊື້-ຂາຍ ການ​ຫຼຸດ­ຜ່ອນ​ມົນ​ລະ​ພິດ ແລະ ເຊື່ອ​ໝັ້ນ​ວ່າ​ໂຄງ­ການ​ນີ້ ຈະ​ເປັນ​ໂຄງ­ການ​ຕົວ​ແບບ​ສຳ­ລັບ​ໂຄງ­ການ​ອື່ນ​ໃນ​ອະ­ນາ­ຄົດ ທີ່​ຈະ​ຊ່ວຍ​ຫຼຸດ­ຜ່ອນ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ-ສັງ­ຄົມ ເພື່ອ​ໃຫ້​ບັນ­ລຸ​ເປົ້າ​ໝາຍ​ການ​ເຕີບ​ໂຕ​ສີ­ຂຽວ ຍືນ​ຍົງ ແລະ ເປັນ​ມິດ​ກັບ​ສິ່ງ­ແວ­ດລ້ອມ.

    ກະ­ຊວງ​ພະ­ລັງ­ງານ ແລະ ບໍ່​ແຮ່ ໄດ້​ຮັບ​ໂຄງ­ການ​ຊ່ວຍ­ເຫຼືອ​ລ້າ​ທາງ​ດ້ານ​ເຕັກ­ນິກ​ຈາກ​ທະ­ນາ­ຄານ​ໂລກ ເຊິ່ງ​ໄດ້​ລິ​ເລີ່ມ​ຈັດ​ຕັ້ງ​ປະ­ຕິ­ບັດ​ໂຄງ­ການ​ສົ່ງ­ເສີມ​ການ​ຜະ­ລິດ ນຳ​ໃຊ້​ເຕົາ​ປະ­ຢັດ ແລະ ສະ­ອາດ ມາ​ແຕ່​ປີ 2012 ໂດຍ​ມີ​ຈຸດ ປະ­ສົງ​ເພື່ອ​ປັບ­ປຸງ​ການ​ຊົມ­ໃຊ້​ພະ­ລັງ­ງານ​ໃນ​ຄົວ​ເຮືອນ​ໃຫ້​ມີ​ປະ­ສິດ­ທິ­ພາບ ດ້ວຍ​ການ​ຫັນ­ປ່ຽນ​ຈາກ​ການ​ນຳ​ໃຊ້​ເຕົາ​ທຳ​ມະ​ດາ ທີ່​ນຳ​ໃຊ້​ຖ່ານ ແລະ ໄມ້​ຟືນ​ທົ່ວ​ໄປ ທີ່​ຊິ້ນ​ເປືອງ​ພະ­ລັງ­ງານ​ຫຼາຍ ຫັນ​ມາ​ໃຊ້​ເຕົາ​ສະ­ອາດ​ທີ່​ນຳ​ໃຊ້​ເຊື້ອ​ໄຟ​ຊີ­ວະ​ມວນ​ອັດ​ແໜ້ນ​ແທນ ເພື່ອ​ຫຼຸດ­ຜ່ອນ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ-ສັງ­ຄົມ ໂດຍ​ສະ­ເພາະ ຫຼຸດ­ຜ່ອນ​ຄວາມ​ສ່ຽງ​ຕໍ່​ສຸ­ຂະ­ພາບ​ແມ່­ຍິງ ແລະ ເດັກ­ນ້ອຍ ຫຼຸດ­ຜ່ອນ​ເວ­ລາ ຫຼຸດ­ຜ່ອນ​ຄ່າ​ໃຊ້​ຈ່າຍ ຫຼຸດ­ຜ່ອນ​ທາດ​ອາຍ​ພິດ​ເຮືອນ​ແກ້ວ ແລະ ຫຼຸດ­ຜ່ອນ​ຝຸ່ນ​ລະ­ອອງ​ຂະ­ໜາດ​ນ້ອຍ (PM2,5) ຈາກ​ການ​ແຕ່ງ​ຢູ່​ຄົວ­ກິນ​ປະ­ຈຳ​ວັນ ໃນ 11 ເມືອງ​ຂອງ 3 ແຂວງ​ເປົ້າ​ໝາຍ ຄື:ນະ­ຄອນ­ຫຼວງ​ວຽງ​ຈັນ ແຂວງ​ສະ­ຫວັນ​ນະ​ເຂດ ແລະ ແຂວງ​ຈຳ­ປາ​ສັກ.

   ສຳ­ລັບ​ຜົນ​ປະ­ໂຫຍດ​ທີ່​ລັດ­ຖະ­ບານ​ຈະ​ໄດ້​ຈາກ​ໂຄງ­ການ ຄື: ສ້າງ​ໂອ­ກາດ​ການ​ເຂົ້າ​ເຖິງ​ແຫຼ່ງ​ທຶນ​ຈາກ​ການ​ຊື້-ຂາຍ​ການ​ຫຼຸດ­ຜ່ອນ​ມົນ​ລະ​ພິດ ລາຍ​ຮັບ​ຈາກ​ການ​ເກັບ​ພາ­ສີ-ອາ­ກອນ ສ້າງ​ຂີດ​ຄວາມ​ສາ­ມາດ​ໃຫ້​ພະ­ນັກ­ງານ-ລັດ­ຖະ­ກອນ ແລະ ຫຼຸດ­ຜ່ອນ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ ແລະ ສັງ­ຄົມ.

ຂ່າວທີ່ກ່ຽວຂ້ອງ