ເຂື່ອນໄຊຍະບູລີ ບໍ່ໄດ້ເປັນສາເຫດພາໃຫ້ນ້ຳຂອງແຫ້ງ

545 05 ສ.ຫ. 2019 ຂ່າວໜ້າ​ໜຶ່ງ
ເຂື່ອນໄຊຍະບູລີ ບໍ່ໄດ້ເປັນສາເຫດພາໃຫ້ນ້ຳຂອງແຫ້ງ

    ທ່ານ ສົມ​ພິດ ແກ້ວ​ວິ­ຈິດ ຫົວ­ໜ້າ​ກົມ​ທຸ­ລະ​ກິດ​ພະ­ລັງ­ງານ ກະ­ຊວງ​ພະ­ລັງ­ງານ ແລະ ບໍ່​ແຮ່ ຊີ້​ແຈງ​ກ່ຽວ​ກັບ​ສະ­ພາບ​ນ້ຳ­ຂອງ​ບົກ​ແຫ້ງ ວັນ​ທີ 1 ສິງ­ຫາ 2019 ຢູ່​ກົມ​ດັ່ງ­ກ່າວ ວ່າ: ສະ­ພາບ​ນ້ຳ­ຂອງ​ບົກ​ແຫ້ງ​ໃນ​ໄລ­ຍະ​ຜ່ານ​ມາ ບໍ່​ໄດ້​ເປັນ​ຍ້ອນ​ການ​ບໍ­ລິ­ຫານ​ຈັດ­ການ​ນ້ຳ­ຂອງ​ໂຄງ­ການ​ເຂື່ອນ​ໄຟ­ຟ້າ​ນ້ຳ­ຂອງ​ໄຊ​ຍະ​ບູ​ລີ ແຕ່​ເປັນ​ຍ້ອນ​ສະ­ພາບ​ດິນ​ຟ້າ​ອາ­ກາດ​ບໍ່​ອຳ­ນວຍ​ດັ່ງ​ປີ​ຜ່ານໆ​ມາ ມີ​ຝົນ­ຕົກ​ໜ້ອຍ ເຮັດ​ໃຫ້​ລະ­ດັບ​ນ້ຳ​ທີ່​ໄຫຼ​ຈາກ​ແມ່­ນ້ຳ​ສາຍ​ຕ່າງໆ​ປ່ອງ​ໃສ່​ແມ່­ນ້ຳ​ຂອງ​ຕອນ​ເທິງ​ມີ​ໜ້ອຍ ເຊິ່ງ​ບໍ່​ພຽງ​ນ້ຳ­ຂອງ​ທີ່​ບົກ​ແຫ້ງ ອ່າງ​ນ້ຳ​ງື່ມ ນ້ຳ​ເທີນ ແລະ ແມ່­ນ້ຳ​ສາຍ​ອື່ນໆ ລວມ​ທັງ​ທົ່ງ​ນາ ບວກ ໜອງ ຢູ່​ເຂດ​ຕ່າງໆ ກໍ​ສະ­ພາບ​ບົກ​ແຫ້ງ​ເຊັ່ນ​ດຽວ​ກັນ.

    ໂຄງ­ການ​ເຂື່ອນ​ໄຟ­ຟ້າ​ນ້ຳ­ຂອງ​ໄຊ​ຍະ​ບູ​ລີ ເປັນ​ໂຄງ­ການ​ທີ່​ມີ​ຜົນ​ປະ­ໂຫຍດ​ສູງ ໂດຍ​ສະ­ເພາະ ຄວາມ​ສະ­ຖຽນ​ລະ​ພາບ​ດ້ານ​ພະ­ລັງ­ງານ​ໄຟ­ຟ້າ ການ​ສ້າງ​ລາຍ​ຮັບ​ທາງ​ກົງ​ໃຫ້​ລັດ­ຖະ­ບານ​ຈາກ​ຄ່າ​ພາກ​ຫຼວງ ແລະ ອາ­ກອນ​ຕ່າງໆ​ສະ­ເລ່ຍ 135 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 1.176 ຕື້​ກີບ​ຕໍ່​ປີ ນອກ​ນີ້ ຍັງ​ນຳ​ເອົາ​ການ​ພັດ­ທະ­ນາ​ດ້ານ​ຕ່າງໆ​ໄປ​ສູ່​ທ້ອງ­ຖິ່ນ ເຮັດ​ໃຫ້​ປະ­ຊາ­ຊົນ​ໄດ້​ເຂົ້າ​ເຖິງ​ສາ​ທາ​ລະ​ນຸ​ປະ​ໂພກ​ຫຼາຍ​ຂຶ້ນ ສ້າງ​ວຽກ​ເຮັດ​ງານ​ທຳ-ສ້າງ​ລາຍ​ຮັບ​ທີ່​ໝັ້ນ­ຄົງ​ໃຫ້​ປະ­ຊາ­ຊົນ ແລະ ພາຍ­ຫຼັງ​ໝົດ​ອາ­ຍຸ​ສຳ​ປະ­ທານ 29 ປີ ຈະ​ມອບ​ໃຫ້​ລັດ­ຖະ­ບານ​ຄຸ້ມ​ຄອງ 100% ໂຄງ­ການ​ເຂື່ອນ​ໄຟ­ຟ້າ​ນ້ຳ­ຂອງ​ໄຊ​ຍະ​ບູ​ລີ ຕັ້ງ​ຢູ່​ນ້ຳ­ຂອງ​ເຂດ​ຊາຍ​ແດນ ລະ­ຫວ່າງ​ເມືອງ​ໄຊ​ຍະ​ບູ​ລີ ແຂວງ​ໄຊ​ຍະ​ບູ​ລີ-ເມືອງ​ນານ ແຂວງ​ຫຼວງ​ພະ​ບາງ ເປັນ​ເຂື່ອນ​ຄອນ​ກຣີດ ສູງ 32,8 ແມັດ ຍາວ 820 ແມັດ ລະ­ດັບ​ນ້ຳ​ສູງ​ສຸດ​ໜ້າ​ເຂື່ອນ 275 ແມັດ ລະ­ດັບ​ນ້ຳ​ຕ່ຳ​ສຸດ​ທ້າຍ​ເຂື່ອນ 246,5 ແມັດ (ເທິງ​ລະ­ດັບ​ໜ້າ­ນ້ຳ​ທະ­ເລ​ປານ​ກາງ) ມີ​ຊ່ອງ​ທາງ​ສັນ­ຈອນ​ຂຶ້ນ-ລົງ​ຂອງ​ເຮືອ​ຂະ­ໜາດ​ນ້ອຍ-500 ໂຕນ ປະ­ຕູ​ລະ­ບາຍ​ນ້ຳ​ລົ້ນ 11 ປ່ອງ ຈັກ​ປັ່ນ​ໄຟ­ຟ້າ 8 ໜ່ວຍ ກຳ­ລັງ​ຕິດ​ຕັ້ງ 1.285 ເມ​ກາ​ວັດ ຜະ­ລິດ​ກະ­ແສ​ໄຟ­ຟ້າ​ສະ­ເລ່ຍ 7.370 ຈີ​ກາ​ວັດ​ໂມງ​ຕໍ່​ປີ ແລະ ມີ​ລະ­ບົບ​ທາງ​ຜ່ານ​ປາ​ຂຶ້ນ-ລົງ ເລີ່ມ​ກໍ່­ສ້າງ​ປີ 2012 ເປັນ­ຕົ້ນ​ມາ ປັດ­ຈຸ­ບັນ ຄືບ​ໜ້າ 99% ແລະ ຈະ​ເລີ່ມ​ຜະ­ລິດ​ໃນ​ເດືອນ​ຕຸ­ລາ 2019.

    ໂຄງ­ການ​ນີ້ ເປັນ​ປະ­ເພດ​ເຂື່ອນ​ທີ່​ຖືກ​ອອກ​ແບບ​ຕາມ​ມາດ­ຕະ­ຖານ​ສາ­ກົນ ແລະ ຕາມ​ກົນ​ໄກ​ເງື່ອນ­ໄຂ​ພັນ­ທະ​ຂອງ​ສົນ­ທິ­ສັນ­ຍາ​ແມ່­ນ້ຳ​ຂອງ 1995 ຄື​ເປັນ​ປະ­ເພດ​ຝາຍ​ນ້ຳ​ລົ້ນ (ບໍ່​ມີ​ອ່າງ­ເກັບ­ນ້ຳ) ເຊິ່ງ​ບໍ່​ສາ­ມາດ​ກັກ​ເກັບ​ນ້ຳ​ໄວ້​ໄດ້ ນັບ​ແຕ່​ເດືອນ​ສິງ­ຫາ-ທັນ­ວາ 2018 ມີ​ນ້ຳ​ພຽງ­ພໍ​ຕາມ​ກຳ­ນົດ ແລະ ບໍ່​ໄດ້​ກັກ​ເກັບ​ນ້ຳ​ເພີ່ມ ເນື່ອງ​ຈາກ​ບໍ່​ມີ​ຜົນ​ກະ­ທົບ​ດ້ານ​ດີ​ຕໍ່​ການ​ດຳ­ເນີນ​ງານ ໝາ­ຍວ່າ​ເມື່ອ​ນ້ຳ­ໜ້າ​ເຂື່ອນ​ຢູ່​ໃນ​ລະ­ດັບ​ທີ່​ກຳ­ນົດ ປະ­ລິ­ມານ​ນ້ຳ​ໄຫຼ​ເຂົ້າ ແລະ ໄຫຼ​ອອກ​ຈະ​ບໍ່​ຕ່າງ​ກັນ​ຫຼາຍ ອີງ​ຕາມ​ການ​ຕິດ­ຕາມ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ຕົວ​ຈິງ ແລະ ການ​ລາຍ​ງານ​ຈາກ​ບໍ­ລິ­ສັດ​ໃຫ້​ຮູ້​ວັນ​ທີ 21 ກໍ­ລະ­ກົດ 2019 ບໍ​ລິ​ມາດ​ນ້ຳ​ໄຫຼ​ເຂົ້າ 1.652 ແມັດ​ກ້ອນ​ຕໍ່​ວິ­ນາ­ທີ ແລະ ນ້ຳ​ໄຫຼ​ອອກ​ຜ່ານ​ເຄື່ອງ​ກຳ­ເນີດ​ໄຟ­ຟ້າ 1.761 ແມັດ​ກ້ອນ​ຕໍ່​ວິ­ນາ­ທີ ສຳ­ລັບ​ສະ­ພາບ​ນ້ຳ­ຂອງ​ບົກ​ແຫ້ງ ແລະ ມີ​ຂໍ້​ສົງ­ໄສ​ວ່າ ເກີດ​ຈາກ​ໂຄງ­ການ​ເຂື່ອນ​ໄຟ­ຟ້າ​ນ້ຳ­ຂອງ​ໄຊ​ຍະ​ບູ​ລີ ກັກ​ເກັບ​ນ້ຳ​ເພື່ອ​ຮັກ­ສາ​ລະ­ດັບ​ນ້ຳ​ໃນ​ການ​ແລ່ນ​ທົດ​ລອງ​ເຄື່ອງ​ຈັກ​ປັ່ນ​ໄຟ ແມ່ນ​ບໍ່​ມີ​ຄວາມ​ເປັນ​ຈິງ ເນື່ອງ​ຈາກ​ສະ­ພາບ​ນ້ຳ­ຂອງ​ເບື້ອງ​ເທິງ ແລະ ເບື້ອງ​ລຸ່ມ​ເຂື່ອນ ມີ​ການ​ບົກ​ແຫ້ງ​ເຊັ່ນ​ດຽວ​ກັນ ພ້ອມ​ນີ້ ສາ­ຂາ​ແມ່­ນ້ຳ​ຂອງ​ຕອນ​ເທິງ ເຊັ່ນ: ນ້ຳ​ທາ ນ້ຳ​ອູ ນ້ຳ​ຄານ ແລະ ສາຍ​ນ້ຳ​ອື່ນໆ ກໍ​ມີ​ປະ­ລິ­ມານ​ນ້ຳ​ໄຫຼ​ເຂົ້າ​ອ່າງ​ໜ້ອຍ ຍ້ອນ​ປີ​ນີ້​ຝົນ­ຕົກ​ບໍ່​ຫຼາຍ.

ຂ່າວທີ່ກ່ຽວຂ້ອງ