ຂະບວນລົດໄຟຂົນສົ່ງສິນຄ້າ ລາວ-ໄທ ໃນການນຳເຂົ້າວັດຖຸດິບ ແລະ ສົ່ງອອກ ຜະລິດຕະພັນເພື່ອຈຳໜ່າຍ

1.081 05 ສ.ຫ. 2019 ຫົວຂໍ້ຂ່າວອື່ນໆ
ຂະບວນລົດໄຟຂົນສົ່ງສິນຄ້າ ລາວ-ໄທ ໃນການນຳເຂົ້າວັດຖຸດິບ ແລະ ສົ່ງອອກ ຜະລິດຕະພັນເພື່ອຈຳໜ່າຍ

   ເປີດການນຳໃຊ້ການຂົນສົ່ງສິນຄ້າທາງລົດໄຟ ລາວ-ໄທ ຖືເປັນບົດບາດສຳຄັນຕໍ່ການຄ້າລະຫວ່າງປະເທດ ເຊິ່ງເປັນນິມິດໝາຍອັນດີໃນການກະຈາຍ “ຜະລິດຕະພັນຂອງລາວ” ອອກສູ່ຕະຫຼາດສາກົນ ແລະ ເປັນການເປີດໂອກາດໃຫ້ແກ່ນັກລົງທືນທັງພາຍໃນ ແລະ ຕ່າງປະເທດ ທີ່ຈະໄດ້ຮັບຄວາມສະດວກໃນການຂົນສົ່ງທີ່ເພີ່ມຄວາມປອດໄພ ວ່ອງໄວທັນເວລາ ແລະ ສາມາດຂົນສົ່ງໄດ້ຫຼາຍຂື້ນ.

   ວັນທີ 1 ສິງຫາ 2019 ທີ່ ນະຄອນຫຼວງວຽງຈັນ ໄດ້ມີພິທີເປີດການນໍາໃຊ້ “ຂະບວນລົດໄຟ ຂົນສົ່ງສິນຄ້າຮອບປະຖົມມະລືກ ລາວ-ໄທ ຄັ້ງທຳອິດໃນ ສປປ ລາວ” ເຊິ່ງຈັດຂຶ້ນທີ່ສະຖານີຂົນສົ່ງລົດໄຟທ່ານາແລ້ງ ໂດຍໃນພິທີດັ່ງກ່າວ ໄດ້ເປີດການນຳໃຊ້ໂຕຈິງໃນການຂົນສົ່ງສິນຄ້າ ເຊິ່ງໃນນັ້ນບໍລິສັດເບຍລາວ ຈຳກັດ ກໍເປັນບໍລິສັດໜຶ່ງຂອງ ສປປ ລາວ ທີ່ຈະໄດ້ສົ່ງອອກຜະລິດຕະພັນຂອງຕົນດ້ວຍຂະບວນລົດໄຟຂົນ ສົ່ງສິນຄ້າ ຈາກ ສປປ ລາວຫາປະເທດໄທ ແລະ ໃນຂະບວນ ປະຖົມມະລຶກຈາກໄທມາລາວ ຄັ້ງນີ້ ຍັງໄດ້ມີການນຳເຂົ້າວັດຖຸດິບ ກໍຄື “ເຂົ້າມ່ານ” ຂອງບໍລິສັດເບຍລາວ ຈຳກັດຈຳນວນ 20 ຕູ້ຄອນເທັນເນີ້ເພື່ອມາຮັບໃຊ້ໃຫ້ແກ່ການຜະລິດ.

   ໃນປັດຈຸບັນ ບໍລິສັດເບຍລາວ ຈຳກັດ ໄດ້ມີບາດກ້າວຂະຫຍາຍການຈຳໜ່າຍຜະລິດຕະພັນອອກສູ່ຕະຫຼາດສາກົນໃນທົ່ວໂລກ ແລະ ມີທ່າອ່ຽງໃນການເຕີບໂຕ ຂຶ້ນເລື້ອຍໆ ໃນແຕ່ລະປີຜ່ານມາບໍລິສັດເບຍລາວໄດ້ນຳໃຊ້ການຂົນສົ່ງສິນຄ້າຜ່ານທາງລົດບັນທຸກ ແລະ ພົບຂໍ້ຫຍຸ້ງຍາກຫຼາຍບັນຫາໃນການຂົນສົ່ງເປັນຕົ້ນແມ່ນ: ໄລຍະເວລາໃນການຂົນສົ່ງສະພາບດິນຟ້າອາກາດ ຈຳນວນຂົນສົ່ງທີ່ຈຳກັດບໍລິສັດ ເບຍລາວ ຈຳກັດ ຮູ້ສຶກພູມໃຈທີ່ໄດ້ເຫັນມີການປັບປຸງຍົກລະດັບດ້ານວຽກງານໂລຈິສຕິກ ໂດຍສະເພາະການຂົນສົ່ງສິນຄ້າທາງລົດໄຟທີ່ ເປັນອີກປັດໄຈໜຶ່ງທີ່ ຈະຍົກລະດັບຄວາມສາມາດທາງດ້ານການຂະຫຍາຍກຳລັງການສົ່ງອອກໄປສູ່ສາກົນໃຫ້ຫຼາຍຂື້ນ ແລະ ທັນຕໍ່ເວລາ.

   ສຳລັບການຂົນສົ່ງສິນຄ້າທາງລົດໄຟ ແມ່ນຈະໄດ້ເປີດນຳໃຊ້ນັບແຕ່ວັນທີ 1 ສິງຫາ 2019 ເປັນຕົ້ນໄປ ເຊິ່ງຈະເດີນທາງມາຈາກໜອງຄາຍ ຫາທ່ານາແລ້ງໂດຍຜ່ານຂົວມິດຕະພາບລາວ-ໄທ ແຫ່ງທີ 1 ເຊິ່ງຈະເປີດໃຫ້ບໍລິ ການມື້ລະ 4 ຮອບປະກອບມີດັ່ງ ນີ້: ຂະບວນລົດຮ່ວມ 471 ເວລາ ອອກຈາກໜອງຄາຍ 07:30 ນາ ທີ ຮອດທ່ານາງແລ້ງ 07:45 ນາທີ.

   ຂະບວນລົດຮ່ວມ 481 ເວລາ ອອກຈາກທ່ານາແລ້ງ 10:15 ນາທີ ຮອດໜອງຄາຍ 10:30 ນາທີ ຂະບວນລົດຮ່ວມ 483 ເວລາ ອອກຈາກໜອງຄາຍ 14:45 ນາທີ ຮອດທ່ານາງແລ້ງ 15:00 ນາທີ ຂະບວນລົດຮ່ວມ 484 ເວລາ ອອກຈາກທ່ານາແລ້ງ 17:30 ນາທີ ຮອດໜອງຄາຍ 17:45 ນາທີ.

ຂ່າວທີ່ກ່ຽວຂ້ອງ