ກູ​ບາ ສະໜອງ​ການ​ບໍລິການ​ອິນ​ເຕີ​ເນັດ​ໄຮ້​ສາຍ ຢູ່​ໃນ​ເຮືອນ​ປະຊາຊົນ

476 01 ສ.ຫ. 2019 ຂ່າວຕ່າງປະເທດ
ກູ​ບາ ສະໜອງ​ການ​ບໍລິການ​ອິນ​ເຕີ​ເນັດ​ໄຮ້​ສາຍ ຢູ່​ໃນ​ເຮືອນ​ປະຊາຊົນ

    ທ່ານ ເອີ​ແນ​​ສ​ໂຕ ໂຣດ​ຣີ​ເກ​​ສ ເຮີ​ນານ​ເດ​​ສ ຮອງ​ລັດຖະມົນຕີ​ສື່ສານ​ຂອງ​ກູ​ບາ ກ່າວ​ເມື່ອ​ວັນ​ທີ 28 ກໍລະກົດ​ທີ່​ຜ່ານ​ມາ ວ່າ​ນັບ​ແຕ່​ວັນ​ທີ 22 ກໍລະກົດ​ປີ​ນີ້​ເປັນຕົ້ນ​ໄປ ປະຊາຊົນ​ກູ​ບາ ສາມາດ​ເຂົ້າ​ຫາ​ອຸປະກອນ​ຮັບ​ສົ່ງ ລົງທະບຽນ​ກັບ​ບັນດາ​ເຈົ້າ​ໜ້າທີ່​ທີ່​ກ່ຽວຂ້ອງ ເພື່ອ​ນຳ​ໃຊ້​ເຄືອ​ຂ່າຍ​ອິນ​ເຕີ​ເນັດ ວາຍ-ຟາຍ (Wi-Fi) ສ່ວນ​ບຸກຄົນ ທີ່​ເຊື່ອມ​ຈອດ​ກັບ​ສັນຍານ​ຈາກ​ບໍລິສັດ​ໂທລະ​ຄົມມະນາຄົມ  ETECSA ທີ່​ເປັນ​ລັດ​ວິ​ສາ​ຫະ​ກິດ​ໃນ​ກູ​ບາ ແລະ ນັບ​ແຕ່​ວັນ​ດຽວ​ກັນ​ນັ້ນ​ເປັນຕົ້ນ​ໄປ ປະຊາຊົນ​ກູ​ບາ ບໍ່​ຈຳເປັນ​ທີ່​ຈະ​ຕ້ອງ​ໄປ​ໃນ​ຈຸດ​ທີ່​ມີ​ສັນຍານ​ອິນ​ເຕີ​ເນັດ ໃນ​ທີ່​ສາທາລະນະ​ເພື່ອ​ໃຊ້​ບໍລິການ​ອິນ​ເຕີ​ເນັດ​ອີກ​ຕໍ່​ໄປ.

    ທ່ານ ເອີ​ແນ​​ສ​ໂຕ ໂຣດ​ຣີ​ເກ​​ສ ເຮີ​ນານ​ເດ​​ສ ກ່າວ​ຕໍ່​ຜູ້​ສື່​ຂ່າວ​ຄື​ດັ່ງກ່າວ ຊຶ່ງ​ເປັນ​ເວລາໜຶ່ງ​ມື້ກ່ອນ​ເວລາ​ທີ່​ກູ​ບາ ອະນຸຍາດ​ຢ່າງ​ເປັນ​ທາງ​ການ ໃນ​ການ​ຜັນ​ຂະຫຍາຍ​ເຄືອ​ຂ່າຍ​ອິນ​ເຕີ​ເນັດ​ແບບ​ໃຊ້​ສາຍ ແລະ ໄຮ້​ສາຍ (Wi-Fi) ຢູ່​ໃນ​ເຮືອນ​ຂອງ​ປະຊາຊົນ. ເປົ້າ​ໝາຍ​ຂອງ​ລັດຖະບານ​ກູ​ບາ ກໍ​ແມ່ນ​ອຳນວຍ​ຄວາມ​ສະດວກ​ໃຫ້​ແກ່​ປະຊາຊົນ ໄດ້​ເຊື່ອມ​ຈອດ​ກັບ​ອິນ​ເຕີ​ເນັດ​ໃນ​ບໍລິເວນ​ກວ້າງ ແລະ ງ່າຍດາຍ​ກວ່າ​ເກົ່າ.

     ທ່ານ ເອີ​ແນ​​ສ​ໂຕ ໂຣດ​ຣີ​ເກ​​ສ ເຮີ​ນານ​ເດ​​ສ ເວົ້າ​ວ່າ ນັບ​ແຕ່​ເວລາ​ທີ່​ເຄືອ​ຂ່າຍ​ອິນ​ເຕີ​ເນັດ Wi-Fi ປະກົດ​ຕົວ​ເປັນ​ເທື່ອ​ທຳ​ອິດ​ຢູ່​ໃນ​ກູ​ບາ ໃນ​ປີ 2013 ເປັນຕົ້ນ​ມາ ຄ່າ​ບໍລິການ​ໃນ​ການ​ເຂົ້າ​ຫາ​ອິນ​ເຕີ​ເນັດ​ໄດ້​ຫຼຸດ​ລົງ ແລະ ສືບຕໍ່​ຫຼຸດ​ລົງ​ອີກ ເມື່ອ​ພື້ນຖານ​ໂຄງ​ລ່າງ​ດ້ານ​ໂທລະ​ຄົມມະນາຄົມ​ຂອງ​ກູ​ບາ ໄດ້​ຮັບ​ການ​ແກ້​ໄຂ​ດີ​ຂຶ້ນ. ຂະແໜງການ​ໂທລະ​ຄົມມະນາຄົມ​ຢູ່​ໃນ​ກູ​ບາ ໄດ້​ເໜັງ​ຕີງ​ຢ່າງ​ແຂງແຮງ ໃນ​ປີ​ທີ່​ຜ່ານ​ມາ. ຢູ່​ກູ​ບາ ທີ່​ມີ​ປະຊາກອນ 11,2 ລ້ານ​ຄົນ​ນັ້ນ ມາ​ຮອດ​ເວລາ​ນີ້ ມີ​ສະຖານີ​ສົ່ງ​ຄື້ນ  Wi-Fi ຈຳນວນ 1.400 ແຫ່ງ ມີ​ເຮືອນ​ຂອງ​ສ່ວນ​ບຸກຄົນ 80.000 ຫຼັງ ເຊື່ອມ​ຈອດ​ກັບ​ອິນ​ເຕີ​ເນັດ ແລະ ປະຊາຊົນ​ກູ​ບາ 2,5 ລ້ານ​ຄົນ ນຳ​ໃຊ້​ລະບົບ​ເຄືອ​ຂ່າຍ 3G.

ຂ່າວທີ່ກ່ຽວຂ້ອງ