ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 31-07-2019

280 31 ກ.ລ. 2019 ຫົວຂໍ້ຂ່າວອື່ນໆ

    ບົດ​ປະ­ຈຳ​ວັນ​ນີ້ ເວົ້າ​ກ່ຽວ​ກັບ​ບັນ­ຫາ​ຢາ­ສູບ​ຢູ່ ສ ເກົາ­ຫຼີ ເລື່ອງ​ການ​ຕັດ​ຫຼຸດ​ອາ­ຍຸ​ເຂົ້າ​ບຳ­ນານ​ຢູ່​ໂປ​ໂລຍ ແລະ ຂ່າວ​ກ່ຽວ​ກັບ​ທາງ​ການ​ອັງ­ກິດ​ປັບ​ໃໝ​ໂຮງ­ແຮມ ແມ​ຣິ​ອອດ ຍ້ອນ​ຮັກ­ສາ​ຄວາມ​ລັບ​ລູກ​ຄ້າ​ບໍ່​ໄດ້.

    ທີ່ ສ ເກົາ­ຫຼີ: ໃນ​ບັ້ນ​ຮົບ​ຕ້ານ​ທາດ​ນິ​ໂກ​ຕິນ ຈາກ​ຢາ­ສູບ​ນີ້ ສ ເກົາ­ຫຼີ ເປັນ​ປະ­ເທດ​ໜຶ່ງ​ທີ່​ເອົາ​ຈິງ​ເອົາ​ຈັງ ແລະ ສາ­ມາດ​ບັນ­ລຸ​ຜົນ­ສຳ­ເລັດ​ເປັນ​ກ້າວໆ​ມາ ມາດ​ຕະ­ການ​ຕ້ານ​ຢາ­ສູບ​ໃນ​ປະ­ເທດ​ນີ້ ເນັ້ນ​ສ້າງ​ຄວາມ​ຮັບ​ຮູ້​ຂອງ​ສັງ­ຄົມ​ກ່ຽວ​ກັບ​ໄພ​ອັນ­ຕະ­ລາຍ​ຈາກ​ຢາ­ສູບ.

    ໃນ​ປີ 2016 ທາງ​ການ ສ ເກົາ­ຫຼີ ໄດ້​ກຳ­ນົດ​ໃຊ້​ຂໍ້​ບັງ­ຄັບ​ໃຫ້​ບັນ­ດາ​ບໍ­ລິ­ສັດ​ຜະ­ລິດ​ຢາ­ສູບ​ທັງ​ໝົດ​ພິມ​ຮູບ​ພາບ​ກ່ຽວ​ກັບ​ຜົນ​ຮ້າຍ​ຂອງ​ຢາ­ສູບ​ຕິດ​ໃສ່​ຊອງ­ຢາ​ສູບ ວິ­ທີ​ການ​ນີ້​ຫຼາຍໆ​ປະ­ເທດ​ກໍ​ໄດ້​ປະ­ຕິ­ບັດ​ກັນ​ມາ​ແລ້ວ ລວມ​ທັງ ສປປ ລາວ ພວກ​ເຮົາ​ນຳ ນອກ­ຈາກ​ນັ້ນ ໃນ​ປີ 2015 ສ ເກົາ­ຫຼີ ຍັງ​ໄດ້​ປັບ​ລາ­ຄາ​ຢາ­ສູບ​ໃຫ້​ສູງ​ຂຶ້ນ​ເກືອບ​ຈຸ​ເມກ ຄື: ເຖິງ 80% ຈາກ​ລາ­ຄາ​ຢາ­ສູບ​ຊອງ​ລະ 2.500 ວອນ (ປະ­ມານ 16.000 ກີບ) ມາ​ເປັນ 4.500 ວອນ​ຕໍ່​ຊອງ.

    ມາດ​ຕະ­ການ​ປັບ​ຂຶ້ນ​ລາ­ຄາ​ຢາ­ສູບ​ນີ້​ໄດ້​ເຫັນ​ຜົນ​ທັນ­ຕາ ຄື: ໄດ້​ເຮັດ​ໃຫ້​ຈຳ­ນວນ​ຄົນ​ສູບ­ຢາ​ທີ່​ມີ​ອາ­ຍຸ​ແຕ່ 19 ປີ​ຂຶ້ນ​ໄປ ຫຼຸດ​ລົງ​ຍັງ​ເຫຼືອ 39% ທຽບ​ກັບ 43% ໃນ​ປີ 2014 ແນວ­ໃດ​ກໍ​ດີ ສະ­ຖິ­ຕິ​ຂອງ​ອົງ­ການ​ຮ່ວມ​ມື ແລະ ພັດ­ທະ­ນາ​ເສດ­ຖະ­ກິດ (OECD) ໄດ້​ຊີ້​ອອກ​ໃນ​ປີ 2015 ວ່າ: ຈຳ­ນວນ​ຜູ້​ສູບ­ຢາ​ທີ່​ມີ​ອາ­ຍຸ​ແຕ່ 16 ປີ​ຂຶ້ນ​ເມືອ​ໃນ ສ ເກົາ­ຫຼີ ນັ້ນ​ຍັງ​ສູງ​ທີ່​ສຸດ​ໃນ​ໂລກ ໂດຍ​ມີ 31%.

    ທີ່ ໂປ​ໂລຍ (ໂປ​ແລນ): ໃນ​ຂະ­ນະ​ທີ່​ຫຼາຍໆ​ປະ­ເທດ​ໄດ້​ປັບ​ຂຶ້ນ​ອາ­ຍຸ​ສຳ­ລັບ​ເຂົ້າ​ບຳ­ນານ ເພື່ອ​ແກ້​ໄຂ​ບັນ­ຫາ​ການ​ເງິນ ແລະ ສະ­ພາບ​ຂາດ­ແຄນ​ແຮງ​ງານ​ນັ້ນ ຢູ່​ປະ­ເທດ​ໂປ​ໂລຍ​ຜັດ​ເຮັດ​ຕ່າງ​ໝູ່ ຄື: ໄດ້​ປັບ​ລົງ​ອາ­ຍຸ​ເຂົ້າ​ບຳ­ນານ​ໃນ​ປີ 2012 ພັກ ລັດ­ຖະ­ບານ​ສາຍ​ກາງ­ຂອງ​ໂປ​ໂລຍ​ໄດ້​ປັບ​ຂຶ້ນ​ອາ­ຍຸ​ບຳ­ນານ​ສຳ­ລັບ​ຊາຍ-ຍິງ​ຢ່າງ​ສະ­ເໝີ­ພາບ​ກັນ ຄື: 67 ປີ ແຕ່​ລັດ​ຖະ ບານ​ຊຸດ​ປັດ­ຈຸ­ບັນ (ພັກ​ກົດ­ໝາຍ ແລະ ຄວາມ​ຍຸ­ຕິ​ທຳ) ໄດ້​ປັບ​ລົງ​ອາ­ຍຸ​ບຳ­ນານ​ເປັນ 65 ປີ ສຳ­ລັບ​ເພດ​ຊາຍ ແລະ 60 ປີ ສຳ­ລັບ​ເພດ​ຍິງ.

    ການ​ປັບ​ລົງ​ອາ­ຍຸ​ເຂົ້າ​ບຳ­ນານ​ນີ້ ໄດ້​ສ້າງ​ຄວາມ​ກັງ­ວົນ​ໃຈ​ໃນ​ສັງ­ຄົມ​ຫຼາຍ​ພໍ​ສົມ­ຄວນ ຍ້ອນ​ຢ້ານ​ວ່າ​ມັນ​ຈະ​ກະ­ທົບ​ຕໍ່​ງົບ ປະ­ມານ​ຂອງ​ລັດ​ໃນ​ອະ­ນາ­ຄົດ ແລະ ຕໍ່​ອັດ­ຕາ​ຄ່າ​ແຮງ​ງານ ປະ­ເທດ​ໂປ​ໂລຍ​ໃນ​ປັດ­ຈຸ­ບັນ ພວມ​ປະ​ເຊີນ​ກັບ​ບັນ­ຫາ​ຄົນ​ອາ­ຍຸ​ສູງ​ທີ່​ເພີ່ມ​ຂຶ້ນ​ຢ່າງ​ໄວ­ວາ ຄາດ​ວ່າ­ການ​ປັບ​ຫຼຸດ​ອາ­ຍຸ​ເຂົ້າ​ບຳ­ນານ​ນີ້ ຈະ​ເຮັດ​ໃຫ້​ສິ້ນ​ເປືອງ​ການ​ໃຊ້​ຈ່າຍ​ງົບ­ປະ­ມານ​ຂອງ​ລັດ​ຕື່ມ 10 ພັນ​ລ້ານ​ຊະ​ໂລ​ຕີ (1 ຊະ​ໂລ​ຕີ ເທົ່າ​ກັບ​ເງິນ​ລາວ 2.300 ກີບ).

    ທີ່ ອັງ­ກິດ: ໃນ​ຍຸກ​ດີ​ຈີ​ຕອນ​ຄອງ​ໂລກ​ນີ້ ການ​ເຮັດ​ໃຫ້​ຄວາມ​ລັບ​ສ່ວນ​ບຸກ­ຄົນ​ຮົ່ວ​ໄຫຼ ໄດ້​ກາຍ­ເປັນ​ບັນ­ຫາ​ສຳ­ຄັນ​ທີ່​ຫຼາຍໆ​ປະ­ເທດ​ເອົາ­ໃຈ­ໃສ່​ປ້ອງ​ກັນ​ບໍ່​ໃຫ້​ເກີດ​ຂຶ້ນ ແລະ ຖ້າ​ເກີດ​ກໍ​ມີ​ມາດ​ຕະ­ການ​ແກ້​ໄຂ​ແບບ​ເດັດ­ຂາດ​ດ້ວຍ​ການ​ປັບ​ໃໝ​ໃສ່​ໂທດ​ຜູ້​ກະ­ທຳ​ຜິດ ຕົວ­ຢ່າງ: ໃນ​ວັນ​ທີ 10 ເດືອນ​ກໍ­ລະ­ກົດ​ນີ້​ເອງ ສຳ­ນັກ­ງານ​ກຳ­ມາ​ທິ​ການ​ສື່­ສານ​ອັງ­ກິດ ໄດ້​ອອກ​ມາ​ຖະ­ແຫຼງ​ວ່າ ຈະ​ປັບ​ໃໝ​ໂຮງ­ແຮມ​ແມ​ຣິ​ອອດ ເປັນ​ຈຳ­ນວນ​ເງິນ​ສູງ​ເຖິງ 123,6 ລ້ານ​ໂດ​ລາ​ສະ­ຫະ­ລັດ ຍ້ອນ​ວ່າ​ໂຮງ­ແຮມ 5 ດາວ​ລະ­ດັບ​ໂລກ​ແຫ່ງ​ນີ້​ລະ​ເຫຼີງ ບໍ່​ຮັກ­ສາ​ຂໍ້​ມູນ​ສ່ວນ​ບຸກ­ຄົນ​ທີ່​ໃຊ້​ບໍ­ລິ­ການ​ຂອງ​ໂຮງ­ແຮມ ການ​ຮົ່ວ​ໄຫຼ​ຂອງ​ຂໍ້​ມູນ​ສ່ວນ​ຕົວ​ນັ້ນ ເຮັດ​ໃຫ້​ມີ​ຄວາມ​ສ່ຽງ​ຈາກ​ການ​ໂຈມ​ຕີ​ທາງ​ໄຊ​ເບີ ຂ່າວ​ບອກ​ວ່າ: ເຄືອ​ຄ່າຍ​ໂຮງ­ແຮມ​ແມ​ຣິ​ອອດ ໃນ​ທົ່ວ​ໂລກ ໄດ້​ເຮັດ​ໃຫ້​ຂໍ້​ມູນ​ສ່ວນ​ຕົວ​ຂອງ​ລູກ​ຄ້າ ຈຳ­ນວນ 339 ລ້ານ​ລາຍ­ການ​ຖືກ​ຮົ່ວ​ໄຫຼ​ໄປ​ທົ່ວ​ໂລກ.

ຂ່າວທີ່ກ່ຽວຂ້ອງ