ເກີດ​ເຫດ​ບໍ່​ຢົກ​ພັງ​ຖະ​ຫຼົ່ມ​ຢູ່​ພາກ​ເໜືອ​ມຽນ​ມາ

228 31 ກ.ລ. 2019 ຂ່າວຕ່າງປະເທດ
ເກີດ​ເຫດ​ບໍ່​ຢົກ​ພັງ​ຖະ​ຫຼົ່ມ​ຢູ່​ພາກ​ເໜືອ​ມຽນ​ມາ

    ຕາມ​ຂ່າວສານ​ຈີນ ອົງການ​ປົກຄອງ​ທ້ອງຖິ່ນ ແລະ ເຈົ້າ​ໜ້າທີ່​ຕຳຫຼວດ​ຢູ່​ເຂດ​ພະກັນ ໃນ​ລັດ​ຍະ​ໄຂ່ (ພາກ​ເໜືອ​ມຽນ​ມາ) ຢືນຢັນ​ວ່າ ວັນ​ທີ 28 ກໍລະກົດ​ນີ້ ບໍ່​ຢົກ​ແຫ່ງ​ໜຶ່ງ​ໃນ​ເຂດ​ນັ້ນ​ເກີດ​ເຫດການ​ພັງ​ຖະ​ລົ່ມ ເຮັດ​ໃຫ້​ມີ​ຜູ້​ເສຍ​ຊີວິດ 14 ຄົນ ສູນຫາຍ​ອີກ 4 ຄົນ ແລະ ໃນ​ຜູ້​ປະສົບ​ເຄາະ​ຮ້າຍ​ນັ້ນ ມີ​ຕຳຫຼວດ​ລວມ​ຢູ່​ນຳ​ຜູ້​ໜຶ່ງ.

    ຂ່າວສານ​ລອຍ​ເຕີ ໄດ້​ອີງ​ຕາມ​ແຫຼ່ງ​ຂ່າວ​ຂອງ​ຕຳຫຼວດ​ທ້ອງຖິ່ນ​ວ່າ ໃນ​ເວລາ​ເກີດ​ເຫດ ພະນັກງານ 15 ຄົນ ຂອງ​ບໍລິສັດ​ຂຸດ​ຄົ້ນ​ຢົກ ແລະ ຕຳຫຼວດ 5 ຄົນ ທີ່​ຮັບຜິດຊອບ​ການ​ຕິດຕາມ​ຢູ່​ສະຖານທີ່​ນັ້ນ ໄດ້​ປະສົບ​ໄພ ຫຼັງ​ເກີດ​ເຫດ​ແລ້ວ ອົງການ​ປົກຄອງ​ເຂດ​ພະກັນ ແລະ ອົງການ​ຕຳຫຼວດ​ທ້ອງຖິ່ນ​ໄດ້​ຈັດ​ຕັ້ງ​ການ​ກອບ​ກູ້​ໃນ​ທັນທີ ນັບ​ມາ​ຮອດ​ຕອນ​ບ່າຍ​ວັນ​ທີ 28 ກໍລະກົດ ທິມ​ກູ້​ໄພ​ໄດ້​ພົບ​ສົບ​ຜູ້​ປະສົບ​ເຄາະ​ຮ້າຍ 14 ຄົນ ໃນ​ນັ້ນ​ລວມ​ມີ​ຕຳຫຼວດ​ໜຶ່ງ​ຄົນ ແລະ ມີ​ຕຳຫຼວດ​ອີກ 2 ຄົນ​ໄດ້​ຮັບ​ການ​ຊ່ວຍເຫຼືອ​ອອກ​ມາ ແລ້ວ​ສົ່ງ​ໄປ​ປິ່ນປົວ​ຢູ່​ໂຮງໝໍ ໃນ​ຂະນະ​ທີ່​ຍັງ​ມີ 4 ຄົນ​ຫາຍ​ສາບ​ສູນ ເຈົ້າ​ໜ້າທີ່​ຕຳຫຼວດ​ຄາດ​ວ່າ​ຜູ້​ຫາຍ​ສາບ​ສູນ​ໄດ້​ເສຍ​ຊີວິດ​ແລ້ວ.

    ຫົວໜ້າ​ອົງການ​ຕຳຫຼວດ​ທ້ອງຖິ່ນ ທີ່​ຮັບຜິດຊອບ​ການ​ກູ້​ໄພ​ຄັ້ງ​ນີ້ ກ່າວ​ວ່າ ບໍ່​ຢົກ​ທີ່​ເກີດ​ເຫດ​ແຫ່ງ​ນີ້ ໄດ້​ຢຸດ​ການ​ຂຸດ​ຄົ້ນ​ແລ້ວ ແຕ່​ຍັງ​ມີ​ຄົນ​ເຝົ້າ​ເວນຍາມ​ຢູ່ ເພື່ອ​ປ້ອງ​ກັນ​ບໍ່​ໃຫ້​ເກີດ​ເຫດ​ຕ່າງໆ ເຊັ່ນ​ດິນ​ເຈື່ອນ ຍ້ອນ​ການ​ຂຸດ​ຄົ້ນ​ທີ່​ຜິດ​ກົດໝາຍ.

ຂ່າວທີ່ກ່ຽວຂ້ອງ