ຊູ​ດານ ປະກາດ​ໃຊ້​ຄຳ​ສັ່ງ​ຫ້າມ​ສັນຈອນ ຢູ່​ໃນ 4 ຕົວ​ເມືອງ

169 31 ກ.ລ. 2019 ຂ່າວຕ່າງປະເທດ
ຊູ​ດານ ປະກາດ​ໃຊ້​ຄຳ​ສັ່ງ​ຫ້າມ​ສັນຈອນ ຢູ່​ໃນ 4 ຕົວ​ເມືອງ

   ໃນ​ຖະແຫຼງການ​ທີ່​ມີ​ອອກ​ມາ​ເມື່ອ​ວັນ​ທີ 29 ກໍລະກົດ​ນີ້ ຫ້ອງການ​ຜູ້​ວ່າການ​ລັດ ນອດ ໂກ​ໂດ​ຟານ (North Kordofan) ຂອງ​ຊູ​ດານ ໃຫ້​ຮູ້​ວ່າ ຄຳ​ສັ່ງ​ຫ້າມ​ສັນຈອນ ຈະ​ມີ​ຜົນ​ບັງຄັບ​ໃຊ້ ແຕ່​ເວລາ 21 ໂມງ ຮອດ 6 ໂມງ​ເຊົ້າ​ຂອງ​ມື້ຕໍ່ມາ ໃນ​ໄລຍະ​ເວລາ​ທີ່​ບໍ່​ໄດ້​ກຳນົດ.

    ຄຳ​ສັ່ງ​ຫ້າມ​ສັນຈອນ ຢູ່​ໃນ 4 ຕົວ​ເມືອງ ທີ່​ຂຶ້ນ​ກັບ​ລັດ​ດັ່ງກ່າວ ໄດ້​ຖືກ​ປະກາດ​ໃຊ້ ຫຼັງ​ຈາກ​ທີ່​ມີ 5 ຄົນ ຖືກ​ຍິງ​ເສຍ​ຊີວິດ (ໃນ​ນັ້ນ​ເປັນ​ນັກ​ສຶກ​ສາ 4 ຄົນ) ຢູ່​ໃນ​ລະຫວ່າງ​ການ​ປະ​ທ້ວງ ຢູ່​ໃນ​ເຂດ​ພາກ​ກາງ​ຊູ​ດານ ໃນ​ຂະນະ​ດຽວ​ກັນ ຈຳນວນ​ຜູ້​ໄດ້​ຮັບ​ບາດເຈັບ​ຈາກ​ການ​ປະ​ທ້ວງ​ດັ່ງກ່າວ ຍັງ​ບໍ່​ເປັນ​ທີ່​ຈະແຈ້ງ.

    ປັດຈຸບັນ​ນີ້ ຢູ່​ຊູ​ດານ ພວມ​ປະ​ເຊີນ​ກັບ​ຂະ​ບວນ​ຕໍ່ຕ້ານ ຊຶ່ງ​ເລີ່ມ​ມີ​ມາ​ຕັ້ງແຕ່​ເດືອນ​ທັນວາ ປີ 2018 ໃນ​ເບື້ອງ​ຕົ້ນ ຂະ​ບວນ​ການ​ຕໍ່ຕ້ານ​ນັ້ນ ໄດ້​ຮັບ​ການ​ກະຕຸກ​ຊຸກຍູ້ ຍ້ອນ​ລາຄາ​ເຂົ້າຈີ່​ເພີ່ມ​ຂຶ້ນ 3 ເທົ່າ ແລະ ຫຼັງ​ຈາກ​ນັ້ນ ການ​ປະ​ທ້ວງ​ໄດ້​ກາຍເປັນ​ຂະ​ບວນ​ຕໍ່ຕ້ານ ແລະ ຊຸກຍູ້​ໃຫ້​ກອງທັບ ຂັບ​ໄລ່​ປະທານາທິບໍດີ ໂອ​ມາ ອາ​​ລ-ບາ​ຊີ ອອກ​ຈາກ​ຕຳແໜ່ງ ຫຼັງ​ຈາກ​ທີ່​ໄດ້​ກຳ​ອຳນາດ​ມາ​ເປັນ​ເວລາ 30 ປີ.

    ບົດ​ລາຍ​ງານ​ຂອງ​ຄະນະ​ກຳມະການ​ສູນ​ກາງ​ທ່ານໝໍ​ຂອງ​ຊູ​ດານ ໃຫ້​ຮູ້​ວ່າ ນັບ​ແຕ່​ເດືອນ​ທັນວາ ປີ 2018 ເປັນຕົ້ນ​ມາ ເຫດການ​ຮຸນ​ແຮງ​ຕ່າງໆ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ​ແລ້ວ​ເກືອບ 250 ຄົນ ໃນ​ນັ້ນ​ເປັນ​ຜູ້​ປະ​ທ້ວງ​ທີ່​ຖືກ​ຍິງ​ເສຍ​ຊີວິດ 127 ຄົນ ພາຍ​ໃນ​ວັນ​ທີ 3 ມິຖຸນາ​ທີ່​ຜ່ານ​ມາ ໃນ​ລະຫວ່າງ​ມີ​ການ​ປະ​ທ້ວງ​ນັ່ງ​ຢູ່​ດ້ານ​ໜ້າ​ສຳນັກງານ​ຂອງ​ກອງທັບ​ຊູ​ດານ ໃນ​ນະຄອນຫຼວງ ຄາ​ຕູມ.

ຂ່າວທີ່ກ່ຽວຂ້ອງ