ຂ່າວຫຼ້າສຸດ

ຜູ້ນຳ ສ ອາ​ເມ​ຣິ​ກາ ລົງ​ນາມ​ຮັບຮອງ​ການ​ຕໍ່​ກຳນົດ​ກອງ​ທຶນ​ຊົດ​ເຊີຍ​ຄວາມ​ເສຍ​ຫາຍໃນ​ເຫດການ 11 ກັນຍາ

100 31 ກ.ລ. 2019 ຂ່າວຕ່າງປະເທດ
ຜູ້ນຳ ສ ອາ​ເມ​ຣິ​ກາ ລົງ​ນາມ​ຮັບຮອງ​ການ​ຕໍ່​ກຳນົດ​ກອງ​ທຶນ​ຊົດ​ເຊີຍ​ຄວາມ​ເສຍ​ຫາຍໃນ​ເຫດການ 11 ກັນຍາ

   ວັນ​ທີ 29 ກໍລະກົດ​ນີ້ ປະທານາທິບໍດີ ໂດ​ນາ​​ລ ທຣຳ ຜູ້ນຳ ສ ອາ​ເມ​ຣິ​ກາ ໄດ້​ລົງ​ນາມ​ຮັບຮອງ​ຮ່າງ​ກົດໝາຍ​ສະບັບ​ໜຶ່ງ ໃນ​ການ​ຮັບປະກັນ​ວ່າ ກອງ​ທຶນ​ຊົດ​ເຊີຍ​ຄວາມ​ເສຍ​ຫາຍ​ໃຫ້​ແກ່​ຜູ້​ໄດ້​ຮັບ​ເຄາະ​ຮ້າຍ ຢູ່​ໃນ​ເຫດການ​ໂຈມ​ຕີ​ກໍ່​ການ​ຮ້າຍ​ນອງ​ເລືອດ ເມື່ອ​ວັນ​ທີ 11 ກັນຍາ ປີ 2001 ນັ້ນ​ຈະ​ບໍ່​ເຫືອດ​ແຫ້ງ​ເປັນ​ຈັກ​ເທື່ອ.

    ປະທານາທິບໍດີ ທຣຳ ໄດ້​ຮັບຮອງ​ການ​ຕໍ່​ກຳນົດ​ຮ່າງ​ກົດໝາຍ​ດັ່ງກ່າວ ໄປ​ຮອດ​ປີ 2092 ຊຶ່ງ​ເປັນ​ຈຸດ​ເວລາ​ທີ່​ໃນ​ຂັ້ນ​ພື້ນຖານ​ແລ້ວ ໄດ້​ເປັນ​ການ​ເຮັດ​ໃຫ້​ກົດໝາຍ​ນັ້ນ ມີ​ກຳນົດ​ເວລາ​ຕະຫຼອດ​ກາລະ​ນານ ກ່ອນ​ໜ້າ​ນັ້ນ ຮ່າງ​ກົດໝາຍ​ດັ່ງກ່າວ ກໍ​ໄດ້​ຮັບ​ການ​ຮັບຮອງ​ຢູ່​ໃນ​ສະພາ​ຕ່ຳ ແລະ ສະພາ​ສູງ​ຂອງ ສ ອາ​ເມ​ຣິ​ກາ ດ້ວຍ​ອັດຕາ​ສ່ວນ​ສຽງ​ສະໜັບສະໜູນ​ຢ່າງ​ຂາດ​ຂັ້ນ.

    ໃນ​ເຫດການ​ໂຈມ​ຕີ​ກໍ່​ການ​ຮ້າຍ​ຫຼາຍ​ລາຍ ໂດຍ​ໃຊ້​ເຮືອບິນ​ເປັນ​ພາຫະນະ ຢູ່​ໃນ ສ ອາ​ເມ​ຣິ​ກາ ເມື່ອ​ວັນ​ທີ 11 ກັນຍາ ປີ 2001 ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ  2.996 ຄົນ ແລະ ບາດເຈັບ ອີກ 6.000 ກວ່າ​ຄົນ ເປັນ​ເວລາ​ເກືອບ 18 ປີ ນັບ​ແຕ່​ເກີດ​ເຫດການ​ໂຈມ​ຕີ​ກໍ່​ການ​ຮ້າຍ​ດັ່ງກ່າວ​ເປັນຕົ້ນ​ມາ ຈຳນວນ​ຜູ້​ເສຍ​ຊີວິດ​ຍັງ​ສືບຕໍ່​ເພີ່ມ​ຂຶ້ນ ຍ້ອນ​ມີ​ບັນຫາ​ຕິດຕາມ​ມາ​ຕໍ່​ສຸຂະພາບ ຊຶ່ງ​ສື່ສານ​ເອີ້ນ​ລວມ​ວ່າ “ພະຍາດ 11 ກັນຍາ.”

     ໃນ​ໄລຍະ​ປີ 2001-2004 ກອງ​ທຶນ​ຊົດ​ເຊີຍ​ຄວາມ​ເສຍ​ຫາຍ​ໃຫ້​ແກ່​ຜູ້​ໄດ້​ຮັບ​ເຄາະ​ຮ້າຍ 11 ກັນຍາ ໄດ້​ຈ່າຍ​ເງິນ 7,4 ຕື້​ໂດ​ລາ​ສະຫະລັດ ໃຫ້​ແກ່​ຍາດຕິ​ພີ່ນ້ອງ​ຂອງ​ຜູ້​ເສຍ​ຊີວິດ  2.880 ຄົນ ແລະ ຜູ້​ໄດ້​ຮັບ​ບາດເຈັບ 2.680 ຄົນ ຈາກ​ເຫດການ​ໂຈມ​ຕີ​ກໍ່​ການ​ຮ້າຍ​ດັ່ງກ່າວ ສະພາ​ແຫ່ງ​ຊາດ ສ ອາ​ເມ​ຣິ​ກາ ໄດ້​ເພີ່ມ​ເຕີມ​ເງິນ​ເຂົ້າ​ໃນ​ກອງ​ທຶນ​ດັ່ງກ່າວ ໃນ​ປີ 2011 ແລະ  2015 ເພື່ອ​ຊ່ວຍເຫຼືອ​ໃຫ້​ແກ່​ອີກ​ຫຼາຍ​ພັນ​ຄົນ ແຕ່​ໄດ້​ງົດ​ການ​ຍອມຮັບ​ການ​ສະເໜີ​ຈ່າຍ​ຄ່າ​ຊົດ​ເຊີຍ​ໃໝ່ ໃນ​ທ້າຍ​ປີ  2020 ຫຼັງ​ຈາກ​ທີ່​ຄັງ​ເງິນ​ບົກ​ແຫ້ງ​ໄປ​ຢ່າງ​ໄວວາ ເຮັດ​ໃຫ້​ພວກ​ນັກ​ຄຸ້ມ​ຄອງ​ຕ້ອງ​ໄດ້​ຕັດ​ຫຼຸດ​ບ້ວງ​ການ​ຊຳລະ​ຜົນ​ປະໂຫຍດ​ໄປ​ເຖິງ 70%.

ຂ່າວທີ່ກ່ຽວຂ້ອງ