ເບິ່ງບ້ານເຂົາເອົາບົດຮຽນ 30-07-2019

145 30 ກ.ລ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ມີ​ຂ່າວ​ກ່ຽວ​ກັບ​ເຈົ້າ​ຊີ­ວິດ​ມາ​ເລ​ເຊຍ ສະ­ໝັກ​ໃຈ​ຕັດ​ຫຼຸດ​ເງິນ­ເດືອນ​ຂອງ​ພະ​ອົງ​ເອງ ແລະ ເລື່ອງ​ຝຣັ່ງ​ມີ​ແຜນ​ເກັບ​ພາ­ສີ​ປີ້​ຍົນ​ຖ້ຽວ​ຂາ​ອອກ​ໃນ​ປີ 2020.

    ທີ່ ມາ​ເລ​ເຊຍ: ການ­ເຄື່ອນ­ໄຫວ ການ​ປະ­ພຶດ ຫຼື ພຶດ­ຕິ​ກຳ​ຂອງ​ຜູ້­ນຳ​ນັ້ນ ບໍ່​ວ່າ​ຈະ​ຢູ່​ປະ­ເທດ​ໃດ​ກໍ​ຍ່ອມ​ກາຍ­ເປັນ​ເປົ້າ​ສາຍ­ຕາ​ຂອງ​ສັງ­ຄົມ ຖ້າ​ເປັນ​ການ​ປະ­ພຶດ​ທີ່​ດີ​ກໍ​ຈະ​ໄດ້​ຮັບ​ຄຳ​ຊົມ­ເຊີຍ ແລະ ກາຍ­ເປັນ​ແວ່ນ​ແຍງ​ຂອງ​ສັງ­ຄົມ ແຕ່​ຖ້າ​ເປັນ​ການ​ກະ­ທຳ​ທີ່​ແຕກ​ປອກ​ອອກ​ທາງ​ແລ້ວ​ກໍ​ຈະ​ກາຍ­ເປັນ​ຕົວ­ຢ່າງ ເປັນ​ຂໍ້​ອ້າງ​ຂອງ​ຄົນ​ທົ່ວ​ໄປ​ໃນ​ການ​ກະ­ທຳ​ຜິດ ໂດຍ​ຈະ​ແກ້​ວ່າ “ແຕ່​ຜູ້­ນຳ​ເດ​ຍັງ​ເຮັດ...ຊາ​ຫຍັງ​ເຮົາ​ຜູ້​ນ້ອຍ !”.

    ເລື່ອງ​ທີ່​ຮື​ຮາ​ຟ້າ​ລັ່ນ​ແຮງ​ໃນ​ມາ​ເລ​ເຊຍ ໃນ​ເດືອນ​ມິ­ຖຸ­ນາ ປີ 2018 ນັ້ນ ກໍ​ຄື ຂ່າວ​ກ່ຽວ​ກັບ​ຄຳ​ປະ­ກາດ​ຂອງ​ເຈົ້າ​ຊີ­ວິດ​ມາ​ເລ​ເຊຍ​ທີ່​ສະ­ໝັກ​ໃຈ​ຕັດ​ຫຼຸດ​ເງິນ­ເດືອນ​ຂອງ​ພະ​ອົງ​ເອງ​ລົງ ເພື່ອ​ຮ່ວມ​ແກ້​ໄຂ​ບັນ­ຫາ​ການ​ເງິນ​ຂອງ​ປະ­ເທດ ມາ​ເລ​ເຊຍ​ປະ​ເຊີນ​ກັບ​ບັນ­ຫາ​ໜີ້​ພາກ​ລັດ​ທີ່​ມີ​ສູງ​ເຖິງ 251,5 ຕື້​ໂດ​ລາ​ສະ­ຫະ­ລັດ ຕາມ​ແຈ້ງ​ການ​ຈາກ​ລາ­ຊະ​ວັງ ເມື່ອ​ວັນ​ທີ 11 ມິ­ຖຸ­ນາ ປີ 2018 ນັ້ນ ກະ­ສັດ ມູ​ຮາ​ມັດ V ປະ­ກາດ​ຕັດ​ຫຼຸດ​ເງິນ­ເດືອນ​ຂອງ​ພະ​ອົງ​ເອງ​ລົງ 10% ຈົນ​ຮອດ​ປີ 2021 ເຊິ່ງ​ເປັນ​ປີ​ທີ່​ພະ​ອົງ​ຈະ​ສຳ­ເລັດ​ອາ­ຍຸ​ການ​ຄອງ​ບັນ­ລັງ.

    ຂ່າວ​ບໍ່​ໄດ້​ບອກ​ວ່າ: ຫຼັງ​ຈາກ​ຕັດ​ຫຼຸດ​ແລ້ວ ເງິນ­ເດືອນ​ພະ​ອົງ​ຈະ​ຍັງ​ເຫຼືອ​ເທົ່າ­ໃດ ບັນ­ດາ​ລັດ­ຖະ­ມົນ­ຕີ​ພາຍ​ໃຕ້​ການ​ນຳ​ຂອງ​ນາ­ຍົກ ມາ​ຮາ​ເທຍ ໂມ​ຮາ​ມັດ ນີ້​ຕ່າງ​ກໍ​ເຫັນ​ດີ​ເປັນ​ເອ­ກະ­ສັນ​ກັນ​ຕັດ​ຫຼຸດ​ເງິນ­ເດືອນ​ຂອງ​ພວກ​ຕົນ​ລົງ 10% ການ​ຕັດ​ຫຼຸດ​ເງິນ­ເດືອນ​ຂອງ​ຂັ້ນ​ນຳ​ໃນ​ມາ​ເລ​ເຊຍ​ນັ້ນ ເປັນ​ໄປ​ຕາມ​ຄວາມ​ສະ­ໝັກ​ໃຈ ບໍ່​ແມ່ນ​ບັງ­ຄັບ.

    ທີ່ ຝຣັ່ງ: ຂ່າວ​ຈາກ​ປະ­ເທດ​ຝຣັ່ງ ໃຫ້​ຮູ້​ໃນ​ກາງ​ເດືອນ​ກໍ­ລະ­ກົດ ປີ​ນີ້​ວ່າ: ນັບ​ແຕ່​ປີ 2020 ເປັນ­ຕົ້ນ​ໄປ ທາງ​ການ​ຝຣັ່ງ​ຈະ​ເລີ່ມ​ເກັບ​ພາ­ສີ​ສິ່ງ­ແວ­ດລ້ອມ​ກັບ​ຖ້ຽວ​ບິນ​ຂາ​ອອກ​ຢູ່​ສະ­ໜາມ​ບິນ​ໃນ​ທົ່ວ​ປະ­ເທດ ມາດ​ຕະ­ການ​ທີ່​ວ່າ​ນີ້ ແນ­ໃສ່​ສົ່ງ­ເສີມ​ໂຄງ­ການ​ຄົມ­ມະ­ນາ­ຄົມ​ທີ່​ເປັນ​ມິດ​ກັບ​ສິ່ງ­ແວ­ດລ້ອມ ເມື່ອ​ທຽບ​ກັບ​ການ​ຄົມ­ມະ­ນາ­ຄົມ​ທາງ­ບົກ ທາງ­ນ້ຳ (ລົດ­ໄຟ-ກຳ­ປັ່ນ) ແລ້ວ ການ​ໂດຍ­ສານ​ໂດຍ​ເຄື່ອງ​ບິນ​ນັ້ນ​ສ້າງ​ຜົນ​ເສຍ​ຫາຍ​ຕໍ່​ສິ່ງ­ແວ­ດລ້ອມ​ຫຼາຍ​ກວ່າ.

    ການ​ເກັບ​ພາ­ສີ​ກັບ​ຖ້ຽວ​ບິນ​ຈະ​ຊຸກ­ຍູ້​ໃຫ້​ຄົນ​ນຳ​ໃຊ້​ພາ­ຫາ​ນະ​ໂດຍ­ສານ​ທາງ​ເລືອກ​ຫຼາຍ​ຂຶ້ນ ແນ່­ນອນ​ເມື່ອ​ມີ​ການ​ເກັບ​ພາ­ສີ​ກັບ​ຖ້ຽວ​ບິນ ຄ່າ​ໂດຍ­ສານ​ທາງ​ອາ­ກາດ​ກໍ​ຈະ​ເພີ່ມ​ຂຶ້ນ​ເປັນ​ເງົາ​ຕາມ​ຕົວ ທ່ານ​ລັດ­ຖະ­ມົນ­ຕີ​ກະ­ຊວງ​ຄົມ­ມະ­ນາ­ຄົມ​ຝຣັ່ງ ບອກ​ວ່າ: ການ​ເກັບ​ພາ­ສີ​ນີ້​ຈະ​ເກັບ​ນຳ​ສະ­ເພາະ​ຖ້ຽວ​ບິນ​ຂາ​ອອກ​ເທົ່າ​ນັ້ນ ຕາມ​ອັດ­ຕາ​ດັ່ງ​ຕໍ່​ໄປ​ນີ້ ຄື: 1,5 ເອີ​ໂຣ ສຳ­ລັບ​ປີ້​ໂດຍ­ສານ​ຊັ້ນ​ປະ­ຢັດ​ພາຍ​ໃນ​ປະ­ເທດ ສ່ວນ​ຖ້ຽວ​ບິນ​ລະ­ຫວ່າງ​ບັນ­ດາ​ປະ­ເທດ​ໃນ​ສະ­ຫະ­ພາບ​ເອີ​ຣົບ​ນັ້ນ ຈະ​ເກັບ​ສູງ​ສຸດ 18 ເອີ​ໂຣ​ຕໍ່ 1 ປີ້ ຄາດ​ວ່າ​ຈາກ​ການ​ເກັບ​ພາ­ສີ​ຈະ​ເຮັດ​ໃຫ້​ລັດ­ຖະ­ບານ​ຝຣັ່ງ​ມີ​ລາຍ​ຮັບ 182 ລ້ານ​ເອີ​ໂຣ​ຕໍ່​ປີ.

ຂ່າວທີ່ກ່ຽວຂ້ອງ