ທີມຊາດລາວເສຍໃຫ້ໄທ ຊີງແຊັມອາຊຽນ

352 30 ກ.ລ. 2019 ວົງຈອນກີລາ
ທີມຊາດລາວເສຍໃຫ້ໄທ ຊີງແຊັມອາຊຽນ

    ການ​ແຂ່ງ­ຂັນ​ເຕະ­ບານ​ຊາຍ​ຮຸ່ນ​ອາ­ຍຸ​ບໍ່​ເກີນ 15 ປີ ຊີງ​ແຊັມ​ອາ​ຊຽນ 2019 ທີ່​ແຂວງ​ຊົນ​ບູ​ຣີ ປະ­ເທດ​ໄທ ເປັນ​ເຈົ້າ­ພາບ​ເປີດ​ສາກ​ການ​ແຂ່ງ­ຂັນ​ນັດ​ທີ 1 ຂອງ​ກຸ່ມ B ໃນ​ວັນ​ທີ 28 ກໍ­ລະ­ກົດ 2019 ຢູ-15 ປີ ທີມ​ຊາດ​ລາວ​ພົບ​ກັບ ຢູ-15 ທີມ​ຊາດ​ໄທ ເຈົ້າ­ພາບ ຮອງ​ແຊັມ​ຈາກ​ປີ­ຜ່ານ­ມາ ທັງ​ເປັນ​ອະ­ດີດ​ແຊັມ 3 ສະ­ໄໝ ທີ່​ສະ­ໜາມ Chonburi Campus Stadium 1.

    ການ​ແຂ່ງ­ຂັນ​ຄັ້ງ​ນີ້​ຫຼິ້ນ​ຕັ້ງ​ລະ 45 ນາ­ທີ ໂດຍ​ໃນ​ເຄິ່ງ​ເວ­ລາ​ທີ 1 ໄທ ເປັນ​ຝ່າຍ​ຄອບ​ຄອງ​ເກມ​ໄດ້​ຫຼາຍ​ກວ່າ ແຕ່​ທີມ​ຊາດ​ລາວ ສວຍ­ໂອ­ກາດ​ຍິງ​ປະ­ຕູ​ຂຶ້ນ​ກ່ອນ​ຈາກ ພົມ­ມາ ໂຄດ​ພູ­ທອນ ນາ­ທີໆ 10 ມາ​ເຄິ່ງ​ຫຼັງ​ໄທ ແກ້​ເກມ​ມາ​ດີ​ໄລ່​ບີບ​ທີມ​ຊາດ​ລາວ​ແຕ່​ຕົ້ນ​ເກມ ແລະ ມາ​ໄດ້​ປະ­ຕູ​ຕີ​ສະ­ເໝີ​ໄວ​ພຽງ 2 ນາ­ທີ ຈາກ ຄໍ​ຄະ­ນະ ຄຳ​ຍົກ ຈາກ​ນັ້ນ ນາ­ທີໆ 65 ຄໍ​ຄະ­ນະ ຄຳ​ຍົກ ຜູ້​ເກົ່າ​ເໝົາ​ຍິງ​ໄກ​ເປັນ​ປະ­ຕູ​ທີ 2 ໃຫ້​ຕົນ​ເອງ ແລະ ເປັນ​ປະ­ຕູ​ໄຊ​ໃຫ້ ຢູ-15 ທີມ​ຊາດ​ໄທ ແຊງ​ຊະ­ນະ ຢູ-15 ທີມ​ຊາດ​ລາວ 2-1 ເກັບ 3 ຄະ­ແນນ​ຕາມ​ເປົ້າ​ໝາຍ ສ່ວນ​ຜົນ​ອີກ​ສອງ​ຄູ່​ໃນ​ກຸ່ມ​ດຽວ​ກັນ ອົດ​ສະ​ຕຣາ​ລີ ຊະ­ນະ ກຳ­ປູ­ເຈຍ 3-1 ແລະ ມາ​ເລ​ເຊຍ ຊະ­ນະ ບຣູ​ໄນ 8-0.

    ຕາ­ຕະ­ລາງ​ການ​ແຂ່ງ­ຂັນ​ຂອງ ຢູ-15 ທີມ​ຊາດ​ລາວ ນັດ​ທີ 2 ວັນ​ທີ 30 ກໍ­ລະ­ກົດ 2019 ເວ­ລາ 15:00 ໂມງ ພົບ ອົດ​ສະ​ຕຣາ​ລີ ນັດ​ທີ 3 ວັນ​ທີ 1 ສິງ­ຫາ 2019 ເວ­ລາ 15:30 ໂມງ ພົບ ບຣູ​ໄນ ນັດ​ທີ 4 ວັນ​ທີ 3 ສິງ­ຫາ 2019 ເວ­ລາ 15:30 ໂມງ ພົບ ມາ​ເລ​ເຊຍ ແລະ ນັດ​ທີ 5 ວັນ​ທີ 5 ສິງ­ຫາ 2019 ເວ­ລາ 15:00 ໂມງ ພົບ ກຳ­ປູ­ເຈຍ.

    ສຳ­ລັບ​ການ​ແຂ່ງ­ຂັນ​ເຕະ­ບານ​ຊາຍ​ຊິງ​ແຊ້ມ​ອາ​ຊຽນ ຮຸ່ນ​ອາ­ຍຸ​ບໍ່​ເກີນ 15 ປີ ຄັ້ງ​ນີ້ ຈັດ​ຂຶ້ນ​ທີ່​ແຂວງ ຊົນ​ບູ​ຣີ ປະ­ເທດ​ໄທ ໃນ​ວັນ​ທີ 27 ກໍ­ລະ­ກົດ ຫາ 9 ສິງ­ຫາ 2019 ມີ 12 ປະ­ເທດ​ເຂົ້າ​ຮ່ວມ​ແຂ່ງ­ຂັນ ແບ່ງ​ອອກ​ເປັນ 2 ກຸ່ມ​ຄື: ກຸ່ມ A ມີ ອິນ​ໂດ​ເນ​ເຊຍ ແຊັມ​ເກົ່າ ມຽນ​ມາ ຫວຽດ­ນາມ ຕີ​ມໍ​ເລ​ສ​ເຕ ສິງ­ກະ­ໂປ ແລະ ຟີ​ລິບ​ປິນ ກຸ່ມ B ມີ ໄທ ເຈົ້າ­ພາບ ມາ​ເລ​ເຊຍ ລາວ ກຳ­ປູ­ເຈຍ ບຣູ​ໄນ ແລະ ອົດ​ສະ​ຕຣາ​ລີ.

ຂ່າວທີ່ກ່ຽວຂ້ອງ