ຝຣັ່ງ​ ຄົ້ນ​ພົບ​ກຳປັ່ນ​ດຳ​ນ້ຳ​ທີ່​ສູນຫາຍ​ໄປ​ເມື່ອ​ປີ 1968

236 29 ກ.ລ. 2019 ຂ່າວຕ່າງປະເທດ
ຝຣັ່ງ​ ຄົ້ນ​ພົບ​ກຳປັ່ນ​ດຳ​ນ້ຳ​ທີ່​ສູນຫາຍ​ໄປ​ເມື່ອ​ປີ 1968

     ລັດຖະມົນຕີ​ປ້ອງ​ກັນ​ປະເທດ​ຝຣັ່ງ ຟລໍ​ເຣນ ພາ​ລີ ແຈ້ງ​ໃຫ້​ຮູ້ເມື່ອ​ບໍ່​ດົນ​ມາ​ນີ້ ວ່າ​ກອງທັບ​ເຮືອ​ຝຣັ່ງ ໄດ້​ກຳນົດ​ເຫັນ​ທີ່​ຕັ້ງ ຂອງ​ກຳປັ່ນ​ດຳ​ນ້ຳ Minerve ທີ່​ສູນຫາຍ​ໄປ​ຢ່າງ​ລຶ​ລັບ​ເມື່ອ​ປີ 1968 ໂດຍ​ເກີດ​ຂຶ້ນ​ຢູ່​ນອກ​ຝັ່ງ​ທະເລ ຕູ​ລົງ ໃນ​ທະເລ​ເມ​ດີ​ເຕ​ຣາ​ເນ ກຳປັ່ນ​ດຳ​ນ້ຳ Minerve ຂອງ​ກອງທັບ​ເຮືອ​ຝຣັ່ງ ຖືກ​ປ່ອຍ​ລົງ​ນ້ຳ ເມື່ອ​ເດືອນ​ພຶດສະພາ ປີ 1958 ໂດຍ​ໄດ້​ມີ​ຊື່​ສຽງ​ໂດ່ງ​ດັງ ໃນ​ເມື່ອ​ມັນ​ສູນຫາຍ​ໄປ​ຢ່າງ​ລຶ​ລັບ ຢູ່​ໃນ​ບໍລິເວນ​ໃກ້​ກັບ​ທ່າ​ກຳປັ່ນ ຕູ​ລົງ ຂອງ​ຝຣັ່ງ ເມື່ອ​ປີ 1968 ພ້ອມ​ກັບ​ພະນັກງານ​ປະຈຳ​ກຳປັ່ນ 52 ຄົນ.

    ເອກະສານ​ຕ່າງໆ​ໃນ​ປະຫວັດສາດ ລະບຸ​ວ່າ ເມື່ອ​ວັນ​ທີ 27 ກໍລະກົດ ປີ 1968 ໃນ​ຂະນະ​ທີ່​ພວມ​ລວດ​ຕະເວນ​ຢູ່​ໃນ​ເຂດ​ທະເລ​ຫ່າງ​ຈາກ​ຖານ​ທີ່​ໝັ້ນ ຕູ​ລົງ 46​ກມ ກຳປັ່ນ Minerve ໄດ້​ສູນຫາຍ​ໄປ ໂດຍ​ທີ່​ບໍ່​ມີ​ຮ່ອງຮອຍ​ໃດໆ​ປະ​ໄວ້. ກອງທັບ​ເຮືອ​ຝຣັ່ງ ເຫັນ​ວ່າ​ກຳປັ່ນ​ດັ່ງກ່າວ​ໄດ້​ສູນຫາຍ​ໄປ ຫຼັງ​ຈາກ​ທີ່​ມັນ​ບໍ່​ໄດ້​ກັບ​ຄືນ​ສູ່​ຖານ​ທີ່​ໝັ້ນ ຫຼັງ​ຈາກ​ການ​ຄາດ​ຄະເນ​ໄວ້​ຫຼາຍ​ຊົ່ວໂມງ.

ຫຼັງ​ຈາກ​ນັ້ນ ກອງທັບ​ເຮືອ​ຝຣັ່ງ ກໍ​ໄດ້​ດຳເນີນ​ການ​ຄົ້ນ​ຫາ​ໃນ​ຂອບ​ຂະໜາດ​ໃຫຍ່. ຝຣັ່ງ​ໄດ້​ຂໍ​ໃຫ້ ສ ອາ​ເມ​ຣິ​ກາ ຊ່ວຍເຫຼືອ​ໃນ​ການ​ຄົ້ນ​ຫາ​ກຳປັ່ນ​ດັ່ງກ່າວ ແຕ່​ການ​ຄົ້ນ​ຫາ​ກໍ​ບໍ່​ໄດ້ຜົນ. ມາ​ໃນ​ປີ 2018 ລັດຖະບານ​ຝຣັ່ງ ໄດ້​ຕົກລົງ​ເຊື່ອມ​ຕໍ່​ການເຄື່ອນໄຫວ​ຄົ້ນ​ຫາ​ກຳປັ່ນ​ລຳ​ນັ້ນ ຕາມ​ການ​ສະເໜີ​ຂອງ​ຄອບຄົວ​ບັນດາ​ຜູ້​ທີ່​ມີໜ້າ​ຢູ່​ໃນ​ກຳປັ່ນ ໃນ​ເວລາ​ທີ່​ສູນຫາຍ​ໄປ.

ຂ່າວທີ່ກ່ຽວຂ້ອງ