ຂ່າວຫຼ້າສຸດ

ສປປ ເກົາຫຼີ - ຈີນ ກັບ​ຄືນ​ສູ່​ການທ່ອງທ່ຽວ​ໂດຍ​ທາງ​ລົດໄຟ ແລະ ການບິນ

141 29 ກ.ລ. 2019 ຂ່າວຕ່າງປະເທດ
ສປປ ເກົາຫຼີ - ຈີນ ກັບ​ຄືນ​ສູ່​ການທ່ອງທ່ຽວ​ໂດຍ​ທາງ​ລົດໄຟ ແລະ ການບິນ

    ການ​ຮ່ວມ​ມື​ດ້ານ​ການທ່ອງທ່ຽວ ລະຫວ່າງ ​ສປປ ເກົາຫຼີ ກັບ ຈີນ ພວມ​ໄດ້​ຮັບ​ການ​ຊຸກຍູ້​ຢ່າງ​ແຂງແຮງ ໂດຍ​ທີ່​ການຈັດຕັ້ງ​ການ​ນຳ​ທ່ຽວ​ໂດຍ​ທາງ​ລົດໄຟ ເລີ່ມ​ອອກ​ຈາກ​ແຂວງ ຈີ້​ຫຼິນ (ຈີນ) ໄປ​ຍັງ​ສາຍພູ ຈິນ​ໂບ ໃນ​ແຂວງ​ຮາມ​ກີ​ຢົງ​ເໜືອ (​ສປປ ເກົາຫຼີ) ໄດ້​ກັບ​ຄືນ​ມາ​ເຄື່ອນ​ໄຫວ ເມື່ອ​ວັນ​ທີ 19 ກໍລະກົດ​ທີ່​ຜ່ານ​ມາ.

    ຂ່າວ​ແຈ້ງວ່າ ຫຼັງ​ຈາກ​ທີ່​ປະກອບ​ເອກະສານ​ອອກ​ເມືອງ​ສຳເລັດ​ແລ້ວ ນັກ​ທ່ອງ​ທ່ຽວ​ຊາວ​ຈີນ ປະມານ 30 ຄົນ ກໍ​ໄດ້​ຍ່າງ​ຂ້າມ​ຂົວ​ຜ່ານ​ແມ່ນ້ຳ ດູ​ມານ ໃນ​ເຂດ​ຊາຍ​ແດນ​ຈີນ - ​ສປປ ເກົາຫຼີ ແລະ ຫຼັງ​ຈາກ​ນັ້ນ​ກໍ​ຂຶ້ນ​ລົດໄຟ ເພື່ອ​ມຸ່ງ​ໜ້າ​ໄປ​ຍັງ​ເຂດ​ສາຍພູ ຈິນ​ໂບ ໂດຍ​ເລີ່ມ​ອອກ​ເດີນທາງ​ຈາກ​ສະຖານີ​ລົດໄຟ ນາມ​ຢາງ ໃນ​ແຂວງ ຮາມ​ກີ​ຢົງ​ເໜືອ.

    ນອກຈາກ​ນັ້ນແລ້ວ ນະຄອນ ດັນ​ດົງ (ແຂວງ​ຫຼຽວ​ນິງ ຂອງ​ຈີນ) ທີ່​ຕັ້ງ​ຢູ່​ໃນ​ເຂດ​ຊາຍ​ແດນ ຈີນ - ​ສປປ ເກົາຫຼີ ກໍ​ພວມ​ຢູ່​ໃນ​ໄລຍະ​ສູງ​ຂອງ​ການ​ໄປ​ທ່ອງ​ທ່ຽວ​ຢູ່​ໃນ ​ສປປ ເກົາຫຼີ. ເມື່ອ​ບໍ່​ດົນ​ມາ​ນີ້ ຢູ່​ໃນ​ນະຄອນ​ດັ່ງກ່າວ ໄດ້​ປະກົດ​ເຫັນ​ລົດ​ບັດ​ທ່ອງ​ທ່ຽວ​ຂອງ ​ສປປ ເກົາຫຼີ ນຳ​ເອົາ​ນັກ​ທ່ອງ​ທ່ຽວ​ຊາວ​ຈີນ ຂ້າມ​ໄປ​ມາ ຜ່ານ​ຂົວ​ຂ້າມ​ແມ່ນ້ຳ ອາມ​ມອກ.

    ຄຽງ​ຄູ່​ກັນ​ນັ້ນ ​ສປປ ເກົາຫຼີ ແລະ ຈີນ ກໍ​ໄດ້​ຟື້ນ​ຟູ​ເສັ້ນທາງ​ບິນ ເຊື່ອມ​ຕໍ່​ນະຄອນ ຕ້າ​ຫຼິນ (ແຂວງ​ຫຼຽວ​ນິງ) ໄປ​ຍັງ​ນະຄອນຫຼວງ​ພຽງ​ຢາງ ຂອງ ​ສປປ ເກົາຫຼີ ໂດຍ​ມີ​ສອງ​ຖ້ຽວ​ຕໍ່​ອາທິດ ຫຼັງ​ຈາກ​ທີ່​ໄດ້​ງົດ​ການບິນ​ເປັນ​ການ​ຊົ່ວຄາວ ມາ​ເປັນ​ເວລາ 9 ເດືອນ.

ຂ່າວທີ່ກ່ຽວຂ້ອງ