ຂ່າວຫຼ້າສຸດ

ອຸ່ນ​ຫະ​ພູມ​ທົ່ວ​ໂລກ​ໃນ​ທ້າຍ​ສະຕະວັດ​ທີ 20 ເພີ່ມ​ຂຶ້ນ​ໄວ​ກວ່າ 2.000 ປີ​ກ່ອນ

133 29 ກ.ລ. 2019 ຂ່າວຕ່າງປະເທດ
ອຸ່ນ​ຫະ​ພູມ​ທົ່ວ​ໂລກ​ໃນ​ທ້າຍ​ສະຕະວັດ​ທີ 20 ເພີ່ມ​ຂຶ້ນ​ໄວ​ກວ່າ 2.000 ປີ​ກ່ອນ

     ໃນ​ການ​ຄົ້ນຄວ້າ​ເປັນ​ເທື່ອ​ທຳ​ອິດ ທີ່​ໄດ້​ນຳ​ຜົນ​ລົງ​ພິມ​ໃນ​ວາລະສານ ເນ​ເຈີ (Nature) ເມື່ອ​ວັນ​ທີ 24 ກໍລະກົດ​ທີ່​ຜ່ານ​ມາ​ນັ້ນ ບັນດາ​ນັກວິທະຍາສາດ ໄດ້​ວິໄຈ​ຂໍ້​ມູນ​ທີ່​ເກັບ​ກຳມາ​ໄດ້​ຈາກ​ອຸປະກອນ​ແທກ​ອຸ່ນ​ຫະ​ພູມ​ເກືອບ 700 ເຄື່ອງ ກ່ຽວ​ກັບ​ຮອບ​ວຽນ​ຄວາມ​ເຕີບ​ໃຫຍ່​ຂອງ​ຕົ້ນໄມ້ ຕະຫຼອດ​ຮອດ​ຮ່ອງຮອຍ​ຂອງ​ຫີນ ປາ​ກາ​ລັງ ແລະ ບັນດາ​ອຸປະກອນ​ແທກ​ອຸ່ນ​ຫະ​ພູມ​ທີ່​ທັນ​ສະໄໝ ເພື່ອ​ນຳ​ເອົາ​ໄລຍະ​ເວລາ​ໂດຍ​ລວມ​ອອກ​ມາ ກ່ຽວ​ກັບ​ສະພາບ​ດິນ​ຟ້າ​ອາກາດ​ທົ່ວ​ໂລກ. 

     ການ​ຄົ້ນຄວ້າ​ດັ່ງກ່າວ ຊີ້​ໃຫ້​ເຫັນ​ວ່າ ບໍ່​ມີ​ໄລຍະ​ເວລາ​ໃດ​ໃນ​ປະຫວັດສາດ ທີ່​ອຸ່ນ​ຫະ​ພູມ​ເພີ່ມ​ຂຶ້ນ​ໄວ ແລະ ຕໍ່​ເນື່ອງ ຄື​ກັນ​ກັບ​ໄລຍະ​ທ້າຍ​ສະຕະວັດ​ທີ 20 ຊຶ່ງ​ເປັນ​ໄລຍະ​ທີ່​ໂລກ​ອາ​ໃສ​ຕໍ່​ເຊື້ອ​ໄຟ​ແຂງ ບັນລຸ​ເຖິງ​ລະດັບ​ສູງ​ຢ່າງ​ບໍ່​ເຄີຍ​ເຫັນ​ມາ​ກ່ອນ ໂດຍ​ທີ່​ຈັງຫວະ​ເພີ່ມ​ຂຶ້ນ​ຂອງ​ອຸ່ນ​ຫະ​ພູມ​ໃນ​ໂລກ ພາຍ​ໃນ​ໄລຍະ​ທ້າຍ​ສະຕະວັດ​ທີ 20 ໄວ​ກວ່າ​ທຸກໆ​ໄລຍະ ໃນ​ຮອບ 2.000 ປີ​ທີ່​ຜ່ານ​ມາ.

    ການ​ສະຫຼຸບ​ຈາກ​ການ​ຄົ້ນຄວ້າ​ດັ່ງກ່າວ ລະບຸ​ວ່າ ບໍ່​ມີ​ໄລຍະ​ເວລາ​ໃດ​ເລີຍ​ໃນ​ປະຫວັດສາດ​ຂອງ​ຄົນ​ຍຸກ​ທັນ​ສະໄໝ ທີ່​ອຸ່ນ​ຫະ​ພູມ​ເພີ່ມ​ຂຶ້ນ​ໄວ ແລະ ຕໍ່​ເນື່ອງ ຄື​ກັນ​ກັບ​ໄລຍະ​ທ້າຍ​ສະຕະວັດ​ທີ 20 ຊຶ່ງ​ເປັນ​ໄລຍະ​ທີ່​ໂລກ​ຢູ່​ໃນ​ໄລຍະ​ຫຼັງ​ສົງຄາມ ແລະ ພື້ນຖານ​ເສດຖະກິດ​ອີງໃສ່​ເຊື້ອ​ໄຟ​ແຂງ ບັນລຸ​ເຖິງ​ລະດັບ​ສູງ​ຢ່າງ​ບໍ່​ເຄີຍ​ເຫັນ​ມາ​ກ່ອນ ໃນ​ການ​ຮັບ​ໃຊ້​ໃຫ້​ແກ່​ການ​ຜະລິດ ແລະ ການ​ຊົມໃຊ້.

    ໃນ​ການ​ຄົ້ນຄວ້າ​ດັ່ງກ່າວ ບັນດາ​ນັກວິທະຍາສາດ ໄດ້​ກວດກາ​ຄືນ​ຢ່າງ​ຖີ່​ຖ້ວນ ກ່ຽວ​ກັບ​ທ່າ​ອ່ຽງ​ຂອງ​ອຸ່ນ​ຫະ​ພູມ​ຕາມ​ພາກ​ພື້ນ ໃນ​ສະໄໝ​ແຕ່​ກີ້​ແຕ່​ກ່ອນ ໂດຍ​ສະເພາະ​ກໍ​ແມ່ນ​ໄລຍະ​ທີ່​ເຫັນ​ວ່າ​ມີ​ການ​ປ່ຽນແປງ​ສະພາບ​ດິນ​ຟ້າ​ອາກາດ​ທີ່​ບໍ່​ປົກກະຕິ ເຊັ່ນ​ໄລຍະ​ປີ 1550-1850 ຊຶ່ງ​ເປັນ​ໄລຍະ​ທີ່​ເຂດ​ເອີ​ຣົບ​ເໜືອ ເກີດ​ມີ​ລະດູ​ໜາວ​ທີ່​ເຢັນ​ຈັດ​ກວ່າ ເມື່ອ​ທຽບໃສ່​ລະດັບ​ສະເລ່ຍ​ຂອງ​ຊຸມ​ປີ​ຕົ້ນ​ສະຕະວັດ​ທີ 20. ການ​ຄົ້ນຄວ້າ​ກໍ​ພົບ​ວ່າ ອຸ່ນ​ຫະ​ພູມ​ໃນ​ໄລຍະ​ປີ 1550-1850 ແລະ ໄລຍະ​ທີ່​ບໍ່​ປົກກະຕິ​ອື່ນໆ ບໍ່​ເພີ່ມ​ຂຶ້​​ຶນ ຫຼື​ຫຼຸດ​ລົງ ດັ່ງ​ທີ່​ໄດ້​ຢັ້ງຢືນ​ໃນ​ເມື່ອ​ກ່ອນ ແລະ ປ່ຽນແປງ​ຕາມ​ພາກ​ພື້ນ ຕົ້ນຕໍ​ແມ່ນ​ໃນ 2.000 ປີ​ທີ່​ຜ່ານ​ມາ.

    ການ​ຄົ້ນຄວ້າ​ດັ່ງກ່າວ ຖືກ​ນຳ​ອອກ​ມາ​ເປີດເຜີຍ ທ່າມກາງ​ທີ່​ເອີ​ຣົບ​ພວມ​ປະ​ເຊີນ​ກັບ​ອາກາດ​ຮ້ອນ​ເປັນ​ງວດ​ທີ​ສອງ ໂດຍ​ທີ່​ລະດັບ​ອຸ່ນ​ຫະ​ພູມ​ຢູ່​ໃນ​ຫຼາຍ​ປະເທດ ແທກ​ໄດ້​ສູງ​ກວ່າ 40 ອົງສາ C. ອາກາດ​ຮ້ອນ​ດັ່ງກ່າວ ແກ່ຍາວ​ຍັງ​ບໍ່​ເຖິງ 1 ເດືອນ ແຕ່​ໄດ້​ສະແດງ​ໃຫ້​ເຫັນ​ເຖິງ​ຜົນ​ກະທົບ​ທີ່​ຮ້າຍ​ແຮງ ຂອງ​ສະພາບ​ດິນ​ຟ້າ​ອາກາດ​ປ່ຽນແປງ ຊຶ່ງ​ສາເຫດ​ຕົ້ນຕໍ​ແມ່ນ​ເລີ່ມ​ມາ​ຈາກ​ການເຄື່ອນໄຫວ​ຂອງ​ມະນຸດ.

ຂ່າວທີ່ກ່ຽວຂ້ອງ