ຂ່າວຫຼ້າສຸດ

ກູ​ບາ ມີ​ປະລິມານ​ທ່ານໝໍ​ທີ່​ພວມ​ເຄື່ອນ​ໄຫວ​ສູງ​ສຸດ​ໃນ​ປະຫວັດສາດ

152 29 ກ.ລ. 2019 ຂ່າວຕ່າງປະເທດ
ກູ​ບາ ມີ​ປະລິມານ​ທ່ານໝໍ​ທີ່​ພວມ​ເຄື່ອນ​ໄຫວ​ສູງ​ສຸດ​ໃນ​ປະຫວັດສາດ

    ທ່ານ ໂຈ​ເຊ ອັນ​ເກລ ໂປ​ຕາ​​ລ ມີ​ຣັນ​ດາ ລັດຖະມົນຕີ​ສາທາລະນະ​ສຸກ​ຂອງ​ກູ​ບາ ກ່າວ​ຢູ່​ໃນ​ກອງ​ປະຊຸມ​ຖະແຫຼງ​ຂ່າວ​ຢ່າງ​ເປັນ​ທາງ​ການ ເມື່ອ​ບໍ່​ດົນ​ມາ​ນີ້​ວ່າ ໃນ 60 ປີ ແຫ່ງ​ການ​ປະຕິວັດ ກູ​ບາ​ກໍ່ສ້າງ​ທ່ານໝໍ​ໄດ້ 367.000 ຄົນ ໂດຍ​ໄລ່​ມາ​ຮອດ​ສົກຮຽນ​ທີ່​ຫາ​ກໍ​ສິ້ນ​ສຸດ​ລົງ; ເຮັດ​ໃຫ້​ເກີດ​ການ​ປ່ຽນແປງ​ຢ່າງ​ສິ້ນ​ເຊີງ ຢູ່​ໃນ​ພື້ນຖານ​ສາທາລະນະ​ສຸກ​ຂອງ​ກູ​ບາ ຊຶ່ງ​ມີ​ທ່ານໝໍ​ພຽງ  3.000 ຄົນ ໃນ​ເວລາ​ທີ່​ການ​ປະຕິວັດ​ສຳເລັດ​ຜົນ ໃນ​ປີ 1959. ໃນ​ບັນດາ​ທ່ານໝໍ ທີ່​ສຶກ​ສາ​ຈົບ​ຢູ່​ໃນ​ກູ​ບາ​ນັ້ນ ມີ​ເກືອບ 36.000 ຄົນ ເປັນ​ຊາວ​ຕ່າງປະເທດ ທີ່​ມາ​ຈາກ 141 ປະເທດ.

    ຕົວ​ເລກ​ຈາກ​ການ​ເປີດເຜີຍ​ເມື່ອ​ບໍ່​ດົນ​ມາ​ນີ້ ຂອງ​ກະຊວງ​ສາທາລະນະ​ສຸກ​ກູ​ບາ ໃຫ້​ຮູ້​ວ່າ ປະລິມານ​ທ່ານໝໍ​ທີ່​ພວມ​ເຄື່ອນ​ໄຫວ​ຢູ່​ໃນ​ກູ​ບາ ໄດ້​ມີ​ເກີນ​ແດນ 100.000 ຄົນ ຊຶ່ງ​ເປັນ​ການ​ບັນລຸ​ລະດັບ​ສະເລ່ຍ​ທີ່ ທ່ານໝໍ 9,0 ຄົນ/ປະຊາຊົນ 1.000 ຄົນ   ຕົວ​ເລກ​ທັງ​ສອງ​ລາຍການ​ທີ່​ມີ​ອອກ​ມາ​ນັ້ນ ຕ່າງ​ກໍ​ເປັນ​ລະດັບ​ທີ່​ສູງ​ສຸດ ໃນ​ປະຫວັດສາດ​ຂອງ ກູ​ບາ.  

  ໃນ​ເວລາ​ນີ້ ກະຊວງ​ສາທາລະນະ​ສຸກ​ກູ​ບາ ຄຸ້ມ​ຄອງ​ຄົນ​ງານ​ຢູ່ 485.000 ຄົນ ເທົ່າ​ກັບ​ກວ່າ  10% ຂອງ​ກຳລັງ​ແຮງ​ງານ​ໃນ​ທົ່ວ​ປະເທດ ໃນ​ນັ້ນ​ມີ 234.000 ຄົນ ທີ່​ມີ​ລະດັບ​ວິຊາ​ການ​ຂັ້ນ​ມະຫາວິທະຍາໄລ ເຮັດ​ວຽກ​ຢູ່​ໃນ 13.000 ຮາກ​ຖານ​ດ້ານ​ສາທາລະນະ​ສຸກ ໃນ​ທົ່ວ​ປະເທດ​ກູ​ບາ ແລະ ຫຼາຍ​ຮາກ​ຖານ​ຢູ່​ຕ່າງປະເທດ.

    ທີ່​ໜ້າ​ໃສ່ໃຈ​ກໍ​ຄື​ວ່າ ລະບົບ​ການ​ບໍລິການ​ສາທາລະນະ​ສຸກ​ຂອງ​ກູ​ບາ ມີ​ຄວາມ​ຮັບປະກັນ​ແຜ່​ກວ້າງ​ໃນ​ທົ່ວ​ປະເທດ ແລະ ບໍ່​ເສຍ​ຄ່າ​ໃນ​ການ​ກວດ ແລະ ປິ່ນປົວ​ພະຍາດ ໃນ​ຂະນະ​ທີ່​ຢາ​ປົວ​ພະຍາດ ເກືອບ​ວ່າ​ໄດ້​ຮັບ​ການ​ອູດ​ໜູນ​ລາຄາ​ທັງ​ນັ້ນ.

ຂ່າວທີ່ກ່ຽວຂ້ອງ