ທັບນັກກີລານັກຮຽນລາວ ກັບເຖິງ ສປປ ລາວ ດ້ວຍຄວາມປອດໄພ

434 29 ກ.ລ. 2019 ວົງຈອນກີລາ
ທັບນັກກີລານັກຮຽນລາວ ກັບເຖິງ ສປປ ລາວ ດ້ວຍຄວາມປອດໄພ

    ທັບ​ນັກ­ກີ­ລາ​ນັກ­ຮຽນ​ລາວ ຊຸດ​ເຂົ້າ​ຮ່ວມ​ງານ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ 11 ທີ່​ເມືອງ​ເຊ​ມາ​ລັງ ແຂວງ​ຊາ​ວາ ປະ­ເທດ​ອິນ​ໂດ​ເນ​ເຊຍ ໃນ​ລະ­ຫວ່າງ​ວັນ​ທີ 17-25 ກໍ­ລະ­ກົດ 2019 ໄດ້​ເດີນ­ທາງ​ກັບ​ເຖິງ ສປປ ລາວ ດ້ວຍ​ຄວາມ​ປອດ​ໄພ​ໃນ​ຕອນ​ຄ່ຳ​ວັນ​ທີ 25 ກໍ­ລະ­ກົດ ນີ້ ທີ່​ສະ­ໜາມ​ບິນ​ສາ­ກົນ​ວັດ​ໄຕ ນະ­ຄອນ­ຫຼວງ​ວຽງ​ຈັນ ໂດຍ​ໄດ້​ຮັບ​ການ​ຕ້ອນ­ຮັບ​ຢ່າງ​ອົບ​ອຸ່ນ​ຈາກ​ຄະ­ນະ​ນຳ ກະ­ຊວງ​ສຶກ​ສາ​ທິ​ການ ແລະ ກີ­ລາ ພໍ່​ແມ່​ຜູ້​ປົກ­ຄອງ ຍາດ­ຕິ​ພີ່­ນ້ອງ ແລະ ໝູ່​ເພື່ອນ.

     ຄະ­ນະ​ຊຸດ​ນີ້ ນຳ​ໂດຍ​ທ່ານ ບຸນ​ສຸກ ທິ​ລະ​ສັກ ຫົວ­ໜ້າ​ກົມ​ພະ­ລະ-ສິ­ລະ​ປະ​ສຶກ​ສາ ກະ­ຊວງ​ສຶກ​ສາ​ທິ​ການ ແລະ ກີ­ລາ ທັງ​ເປັນ​ຮອງ​ປະ­ທານ​ສະ­ຫະ­ພັນ​ກີ­ລາ​ນັກ­ຮຽນ​ສາ­ມັນ​ລາວ ທ່ານ ສຸດ​ຖະ­ໜອມ ອິນ​ທະ​ວົງ ວ່າ­ການ​ຫົວ­ໜ້າ​ຫ້ອງ­ການ​ເລ­ຂາ­ທິ­ການ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ.

    ການ​ແຂ່ງ­ຂັນ​ຄັ້ງ​ນີ້ ສປປ ລາວ ສົ່ງ​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ​ເຂົ້າ​ຮ່ວມ 80 ຄົນ ໃນ​ນັ້ນ ຄະ­ນະ​ຮັບ­ຜິດ­ຊອບ 13 ທ່ານ ຍິງ 1 ທ່ານ ຄະ­ນະ​ນຳ ຄູ​ເຝິກ 15 ທ່ານ ນັກ­ກີ­ລາ 51 ຄົນ ຍິງ 16 ຄົນ ແລະ ກຳ­ມະ­ການ​ຕັດ­ສິນ​ອີກ 1 ທ່ານ ໃນ 5 ປະ­ເພດ ປະ­ກອບ​ມີ: ລອຍ­ນ້ຳ ແລ່ນ-ລານ ດອກ​ປີກ​ໄກ່ ປັນ​ຈັກ​ສີ​ລັດ ແລະ ກະ­ຕໍ້.

    ສຳ­ລັບ​ຜົນ­ງານ​ຂອງ​ທັບ​ນັກ­ກີ­ລາ​ນັກ­ຮຽນ​ລາວ​ເຮົາ ໄດ້​ອັນ​ດັບ​ທີ 8 ໄດ້ 1 ຫຼຽນ​ເງິນ ແລະ 7 ຫຼຽນ​ທອງ ໂດຍ 1 ຫຼຽນ​ເງິນ ໄດ້​ຈາກ ທ້າວ ແຟັງ ວົງ​ພັກ­ດີ ກີ­ລາ​ປັນ​ຈັກ​ສີ​ລັດ ປະ­ເພດ​ຕໍ່­ສູ້ ລຸ້ນ 63 ກິ​ໂລ 7 ຫຼຽນ​ທອງ ຈາກ​ກີ­ລາ​ປັນ​ຈັກ​ສີ​ລັດ 4 ຫຼຽນ​ທອງ ນາງ ຕຸກ​ຕາ ມຸກ­ດາ​ວົງ ປະ­ເພດ​ຟ້ອນ​ຍິງ​ດ່ຽວ ທ້າວ ໂຈ​ນັດ ຄຸນ​ວົງ­ສາ ປະ­ເພດ​ຕໍ່­ສູ້ ລຸ້ນ 55 ກິ​ໂລ ທ້າວ ຈັນ​ສະ­ໝອນ ພົມ​ໂສ­ພາ ລຸ້ນ 59 ກິ​ໂລ ແລະ ນາງ ອາ​ລິ​ສາ ສາມ​ມົນ­ຕີ ລຸ້ນ 59 ກິ​ໂລ ສ່ວນ​ອີກ 3 ຫຼຽນ​ທອງ​ໄດ້​ຈາກ​ກີ­ລາ​ກະ­ຕໍ້ ທັງ 3 ລາຍ­ການ​ທີ່​ເຂົ້າ​ຮ່ວມ​ເຊັ່ນ: ປະ­ເພດ​ທີມ​ຊຸດ​ຊາຍ ປະ­ເພດ​ທີມ​ດ່ຽວ​ຊາຍ ແລະ ປະ­ເພດ​ຄູ່​ຊາຍ.

ຂ່າວທີ່ກ່ຽວຂ້ອງ