ນາຍົກລັດຖະມົນຕີ​ອັງກິດ ລາ​ອອກ​ຈາກ​ຕຳແໜ່ງ

274 26 ກ.ລ. 2019 ຂ່າວຕ່າງປະເທດ
ນາຍົກລັດຖະມົນຕີ​ອັງກິດ ລາ​ອອກ​ຈາກ​ຕຳແໜ່ງ

    ທ່ານ​ນາງ ເຕ​ເຣ​ຊາ ເມ ນາຍົກລັດຖະມົນຕີ​ອັງກິດ ໄດ້​ຍື່ນ​ຄຳ​ຮ້ອງ​ລາ​ອອກ​ຈາກ​ຕຳແໜ່ງ ຕໍ່​ພະ​ລາ​ຊີ​ນີ ອາ​ລິ​ຊາ​ເບດ II ແຫ່ງ​ອັງກິດ ແລ້ວ ໃນ​ວັນ​ທີ 24 ກໍລະກົດ​ນີ້ ທ່າມກາງ​ທີ່​ທ່ານ ໂບ​ຣິ​​ສ ຈອນ​ສັນ ຜູ້​ທີ່​ຈະ​ສືບ​ທອດ​ຕຳແໜ່ງ​ຕໍ່​ຈາກ​ນາງ ເມ ກໍ​ພວມ​ກະກຽມ​ຮັບ​ເອົາ​ຕຳແໜ່ງ ນາຍົກລັດຖະມົນຕີ.

    ໃນ​ຂະນະ​ດຽວ​ກັນ ແຈ້ງ​ການ​ຂອງ​ວັງ ເບີກ​ມິງ​ແຮມ ໃຫ້​ຮູ້​ວ່າ ໃນ​ວັນ​ດຽວ​ກັນ ພະ​ລາ​ຊີ​ນີ ອາ​ລິ​ຊາ​ເບດ II  ໄດ້​ໃຫ້ການ​ຕ້ອນຮັບ​ທ່ານ ໂບ​ຣິ​​ສ ຈອນ​ສັນ ໂດຍ​ທີ່​ພະ​ລາ​ຊີ​ນີ ໄດ້​ສະເໜີ​ໃຫ້​ທ່ານ ຈອນ​ສັນ ສ້າງຕັ້ງ​ລັດຖະບານ​ຊຸດ​ໃໝ່​ຂຶ້ນ​ມາ.

    ທາງ​ດ້ານ​ທ່ານ ມີ​ແຊນ ບາ​ນີ​ເອີ ຫົວໜ້າ​ຄະນະ​ເຈລະຈາ​ຂອງ​ສະຫະພາບ​ເອີ​ຣົບ (EU) ກ່ຽວ​ກັບ​ເລື່ອງ​ອັງກິດ​ຖອນ​ອອກ​ຈາກ EU ຫຼື​ທີ່​ເອີ້ນ​ວ່າ​ເບຣ​ຊິດ (Brexit) ນັ້ນ​ໄດ້​ກ່າວ​ຊົມເຊີຍ​ຕໍ່​ການ​ທີ່​ທ່ານ ໂບ​ຣິ​​ສ ຈອນ​ສັນ ໄດ້​ຮັບ​ເລືອກ​ຕັ້ງ​ໃຫ້​ເປັນ​ນາຍົກລັດຖະມົນຕີ​ຄົນ​ໃໝ່​ຂອງ​ອັງກິດ ຊຶ່ງ​ມີ​ຂຶ້ນ​ເມື່ອ​ວັນ​ທີ 23 ກໍລະກົດ​ທີ່​ຜ່ານ​ມາ. ທ່ານ ບາ​ນີ​ເອີ ໄດ້​ລົງ​ພິມ​ຂໍ້ຄວາມ​ຜ່ານ​ສື່​ສັງຄົມ Twitter ໂດຍ​ຕັ້ງ​ຄວາມ​ຫວັງ​ວ່າ ຈະ​ໄດ້​ເຮັດ​ວຽກ​ຢ່າງ “ສ້າງສັນ” ກັບ​ນາຍົກລັດຖະມົນຕີ​ຄົນ​ໃໝ່​ຂອງ​ອັງກິດ ເພື່ອ​ອຳນວຍ​ຄວາມ​ສະດວກ​ໃຫ້​ແກ່​ການ​ຮັບຮອງ​ຂໍ້​ຕົກລົງ Brexit ແລະ ນຳໄປ​ສູ່​ການ​ມີ Brexit ທີ່​ມີ​ຄວາມ​ເປັນ​ລະບຽບ​ຮຽບ​ຮ້ອຍ.

ຂ່າວທີ່ກ່ຽວຂ້ອງ