ເອີ​ຣົບ ຍັງ​ສືບຕໍ່​ປະ​ເຊີນ​ກັບ​ອາກາດ​ຮ້ອນ

253 26 ກ.ລ. 2019 ຂ່າວຕ່າງປະເທດ
ເອີ​ຣົບ ຍັງ​ສືບຕໍ່​ປະ​ເຊີນ​ກັບ​ອາກາດ​ຮ້ອນ

    ອົງການ​ອຸຕຸນິຍົມ ອຸ​ທົກ​ກະ​ສາດ Meteo-France ຂອງ​ຝຣັ່ງ ລາຍ​ງານ​ວ່າ ມີ​ຫຼາຍ​ນະຄອນ​ໃນ​ປະເທດ​ຝຣັ່ງ ໄດ້​ພົບ​ກັບ​ລະດັບ​ອຸ່ນ​ຫະ​ພູມ​ສູງ ມາ​ຕັ້ງແຕ່​ວັນ​ທີ 23 ກໍລະກົດ ໃນ​ນັ້ນ​ຢູ່​ນະຄອນ ບອກ​ໂດ (Bordeaux) ແທກ​ອຸ່ນ​ຫະ​ພູມ​ໄດ້​ສູງ​ເຖິງ 41,2 ອົງສາ C ນັບ​ວ່າ​ສູງ​ກວ່າ 0,5 ອົງສາ C ເມື່ອ​ທຽບໃສ່​ລະດັບ​ອຸ່ນ​ຫະ​ພູມ​ທີ່​ແທກ​ໄດ້​ເມື່ອ​ເດືອນ​ສິງຫາ ປີ 2003.

    ໃນ​ຂະນະ​ດຽວ​ກັນ ອຸ່ນ​ຫະ​ພູມ​ຢູ່​ໃນ​ບັນດາ​ປະເທດ​ໃກ້​ຄຽງ​ກັບ​ຝຣັ່ງ ເຊັ່ນ ແບນ​ຊິກ ລຸກ​ຊຳ​ບວກ ເຢຍ​ລະ​ມັນ ແລະ ໂຮນ​ລັງ ກໍ​ຄາດ​ວ່າ​ຈະ​ຮ້ອນ​ກວ່າ​ລະດັບ​ສູງ​ເປັນ​ປະຫວັດ​ການ​ກ່ອນ​ໜ້າ​ນັ້ນ ທີ່​ແທກ​ອຸ່ນ​ຫະ​ພູມ​ໄດ້ 38,6 ອົງສາ C.

    ອົງການ​ອຸຕຸນິຍົມ​ຂອງ​ອັງກິດ ໃຫ້ການ​ພະຍາກອນ​ວ່າ ອຸ່ນ​ຫະ​ພູມ​ຢູ່​ໃນ​ອັງກິດ ໃນ​ວັນ​ທີ 25 ກໍລະກົດ​ນີ້ ອາດ​ຈະ​ບັນລຸ​ເກີນ​ລະດັບ​ສະຖິຕິ 38,5 ອົງສາ C ທີ່​ແທກ​ໄດ້​ຢູ່ ຟາ​ເວີ​ແຊມ (Faversham) ເມື່ອ​ເດືອນ​ສິງຫາ ປີ 2004.

    ອາດ​ຮ້ອນ​ງວດ​ທີ 2 ປະກົດ​ຂຶ້ນ​ມາ​ຢູ່​ໃນ​ທະວີບ​ເອີ​ຣົບ ພຽງ​ເວລາ 2 ເດືອນ​ທີ່​ຜ່ານ​ມາ ເຮັດ​ໃຫ້​ເກີດ​ຄວາມ​ກັງວົນ ກ່ຽວ​ກັບ​ວ່າ​ການເຄື່ອນໄຫວ​ຂອງ​ຄົນ ພວມ​ເປັນ​ການ “ເຜົາ” ໜ່ວຍ​ໂລກ. ຄວາມ​ກັງວົນ​ທີ່​ວ່າ​ນັ້ນ ບໍ່​ແມ່ນ​ວ່າ​ບໍ່​ມີ​ພື້ນຖານ ທັງ​ນີ້​ກໍ​ເພາະວ່າ​ການ​ຄົ້ນຄວ້າ​ທີ່​ດຳເນີນ​ໂດຍ​ສະ​ຖາ​ບັນ​ເຕັກ​ໂນ​ໂລ​ຊີ ແຫ່ງ​ປະເທດ​ສະ​ວິດ ລະບຸ​ວ່າ ຖ້າ​ຫາກ​ບໍ່​ມີ​ການ​ປ່ຽນແປງ​ສະພາບ​ດິນ​ຟ້າ​ອາກາດ​ແລ້ວ ອາກາດ​ຮ້ອນ​ແກ່ຍາວ​ເປັນ​ເວລາ​ຫຼາຍ​ອາທິດ ຢູ່​ໃນ​ເຂດ​ເອີ​ຣົບ​ເໜືອ ພາຍ​ໃນ​ປີ 2018 ອາດ​ບໍ່​ມີ​ຄວາມ​ຮ້າຍ​ແຮງ​ເຖິງ​ຂະໜາດ​ນັ້ນ.

ຂ່າວທີ່ກ່ຽວຂ້ອງ