ຫຼາຍ​ກຸ່ມ​ບໍລິສັດ ແຂ່ງຂັນ​ກັນ​ເພື່ອ​ສະໜອງ​ເຮືອບິນ​ສູ້​ຮົບ​ໃຫ້​ແກ່​ກາ​ນາ​ດາ

126 26 ກ.ລ. 2019 ຂ່າວຕ່າງປະເທດ
ຫຼາຍ​ກຸ່ມ​ບໍລິສັດ ແຂ່ງຂັນ​ກັນ​ເພື່ອ​ສະໜອງ​ເຮືອບິນ​ສູ້​ຮົບ​ໃຫ້​ແກ່​ກາ​ນາ​ດາ

    ລັດຖະບານ​ກາ​ນາ​ດາ ແຈ້ງ​ໃຫ້​ຮູ້ເມື່ອ​ວັນ​ທີ 23 ກໍລະກົດ​ນີ້​ວ່າ ໄດ້​ຕົກລົງ​ຄັດ​ເລືອກ​ເອົາ 4 ກຸ່ມ​ບໍລິສັດ ໄດ້ແກ່ Airbus Boeing Lockheed Martin ແລະ  Saab ເຂົ້າ​ຮ່ວມ​ໃນ​ການ​ແຂ່ງຂັນ​ເພື່ອ​ຊີງ​ເອົາ​ການ​ປະມູນ​ໃນ​ການ​ສະໜອງ​ເຮືອບິນ​ສູ້​ຮົບ​ລຸ້ນ​ໃໝ່ ຈຳນວນ 88 ລຳ ເພື່ອ​ແທນ​ທີ່​ໃຫ້​ແກ່​ຝູງ​ເຮືອບິນ F-18 ຂອງ​ກອງທັບ​ອາກາດ​ກາ​ນາ​ດາ ໂດຍ​ມີ​ກຳນົດ​ເວລາ​ສົ່ງ​ມອບ​ສິນຄ້າ ໃນ​ປີ 2025.

    ນັບ​ແຕ່​ນີ້​ໄປ​ຮອດ​ລະດູບານໃໝ່ ປີ 2020 ກຸ່ມ​ບໍລິສັດ​ທັງ​ສີ່​ແຫ່ງ​ດັ່ງກ່າວ ຈະ​ຕ້ອງ​ໄດ້​ນຳ​ສະເໜີ​ຂໍ້​ສະເໜີ​ທີ່​ພົວພັນ​ເຖິງ​ບ້ວງ​ການ​ປະມູນ ໄປ​ໃຫ້​ແກ່​ກາ​ນາ​ດາ ແລະ ການ​ຕົກລົງ​ວ່າ​ຈະ​ເລືອກ​ເອົາ​ກຸ່ມ​ບໍລິສັດ​ໃດ​ເປັນ​ຜູ້​ຊະນະ​ການ​ປະມູນ​ນັ້ນ ຝ່າຍ​ກາ​ນາ​ດາ​ຈະ​ປະກາດ​ພາຍ​ໃນ​ຕົ້ນ​ປີ 2022.

    ສື່ສານ​ໃນ​ກາ​ນາ​ດາ ລາຍ​ງານ​ວ່າ ສັນຍາ​ການ​ສະໜອງ​ສິນຄ້າ​ດັ່ງກ່າວ ມີ​ມູນ​ຄ່າ​ປະມານ​ແຕ່ 15-19 ຕື້​ໂດ​ລາ​ກາ​ນາ​ດາ ແລະ ນີ້​ກໍ​ເປັນ​ບ້ວງ​ການ​ລົງທຶນ​ທີ່​ສຳຄັນ​ທີ່​ສຸດ​ຂອງ​ກາ​ນາ​ດາ ໃຫ້​ແກ່​ກອງທັບ​ອາກາດ​ຂອງ​ປະເທດ​ນີ້ ພາຍ​ໃນ 30 ປີ​ທີ່​ຜ່ານ​ມາ.

    ຝູງ​ເຮືອບິນ​ສູ້​ຮົບ​ລຸ້ນ​ໃໝ່​ນັ້ນ ຫຼັງ​ຈາກ​ທີ່​ໄດ້​ຮັບ​ການ​ສະໜອງ ໃນ​ປີ 2025 ຈະ​ມີໜ້າ​ທີ່​ຕົ້ນຕໍ​ກໍ​ຄື ສົມທົບ​ກັບ​ກອງ​ກຳລັງ​ກອງທັບ​ອາກາດ ສ ອາ​ເມ​ຣິ​ກາ ໃນ​ການ​ລາດຕະເວນ​ເຂດ​ທ້ອງຟ້າ​ອາ​ເມ​ຣິ​ກາ​ເໜືອ ໃນ​ຂອບ​ຂອງ​ກອງ​ບັນຊາ​ການ​ປ້ອງ​ກັນ​ອາກາດ​ອາ​ເມ​ຣິ​ກາ​ເໜືອ (NORAD) ຊຶ່ງ​ເປັນ​ອົງການ​ທີ່​ບໍລິຫານ ແລະ ຄຸ້ມ​ຄອງ​ຮ່ວມ​ກັນ ລະຫວ່າງ ສ ອາ​ເມ​ຣິ​ກາ ກັບ​ກາ​ນາ​ດາ.

ຂ່າວທີ່ກ່ຽວຂ້ອງ