ຂ່າວຫຼ້າສຸດ

ຄົນ​ອາຍຸ​ສູງ​ຢູ່​ໃນ ສ ເກົາຫຼີ ສ່ວນ​ຫຼາຍ​ຢາກ​ເຮັດ​ວຽກ​ເພີ່ມ

127 26 ກ.ລ. 2019 ຂ່າວຕ່າງປະເທດ
ຄົນ​ອາຍຸ​ສູງ​ຢູ່​ໃນ ສ ເກົາຫຼີ ສ່ວນ​ຫຼາຍ​ຢາກ​ເຮັດ​ວຽກ​ເພີ່ມ

    ບົດ​ລາຍ​ງານ​ຂອງ​ກົມ​ສະຖິຕິ​ແຫ່ງ​ຊາດ ສ ເກົາຫຼີ ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 23 ກໍລະກົດ​ນີ້ ຊີ້​ໃຫ້​ເຫັນ​ວ່າ ມີ 64,9% ຂອງ​ຈຳນວນ​ຜູ້​ອາຍຸ​ສູງ  (ແຕ່ 55 ຫາ 79 ປີ) ຢູ່​ໃນ ສ ເກົາຫຼີ ຢາກ​ເຮັດ​ວຽກ​ເພີ່ມ.

    ອັດຕາ​ສ່ວນ​ດັ່ງກ່າວ ນັບ​ວ່າ​ເພີ່ມ​ຂຶ້ນ 0,8% ເມື່ອ​ທຽບໃສ່​ໜຶ່ງ​ປີ​ກ່ອນ​ໜ້າ​ນີ້ ແລະ ໂດຍ​ສະເລ່ຍ​ເກນ​ອາຍຸ​ທີ່​ຢາກ​ເຮັດ​ວຽກ​ເພີ່ມ ໄດ້​ເພີ່ມ​ຂຶ້ນ​ຕື່ມ 1 ປີ ໂດຍ​ຂຶ້ນ​ເປັນ 73 ປີ. ໃນ​ຂະນະ​ດຽວ​ກັນ ອັດຕາ​ສ່ວນ​ຂອງ​ຜູ້​ທີ່​ຢາກ​ເຮັດ​ວຽກ​ເຕັມ​ເວລາ ຢູ່​ທີ່ 58,8% ເປັນ​ຕົວ​ເລກ​ທີ່​ຫຼຸດ​ລົງ​ເມື່ອ​ທຽບໃສ່​ໜຶ່ງ​ປີ​ກ່ອນ​ໜ້າ​ນີ້. ໃນ​ທາງ​ກົງກັນຂ້າມ ຈຳນວນ​ຄົນ​ທີ່​ຢາກ​ເຮັດ​ວຽກ​ເຄິ່ງ​ເວລາ​ພັດ​ເພີ່​​ີມ​ຂຶ້ນ ໂດຍ​ສະເພາະ​ແມ່ນ​ຢູ່​ໃນ​ກຸ່ມ​ຄົນ​ທີ່​ມີ​ອາຍຸ​ສູງ.

    ໃນ​ຮອບ​ໜຶ່ງ​ປີ​ທີ່​ຜ່ານ​ມາ ຢູ່​ໃນ ສ ເກົາຫຼີ ມີ​ອັດຕາ​ສ່ວນ​ຜູ້​ເຖົ້າ ທີ່​ໄດ້​ຜ່ານ​ການ​ຫາ​ວຽກ​ເຮັດ​ງານ​ທຳ ຢູ່​ທີ່ 18,8% ເພີ່ມ​ຂຶ້ນ 1,9% ເມື່ອ​ທຽບໃສ່​ປີ​ກ່ອນ.

    ອັດຕາ​ສ່ວນ​ຄົນ​ຮັບ​ເງິນ​ບຳນານ ຢູ່​ໃນ ສ ເກົາຫຼີ ໃນ​ໜຶ່ງ​ປີ​ທີ່​ຜ່ານ​ມາ ເພີ່ມ​ຂຶ້ນ​ໜ້ອຍ​ໜຶ່ງ ເມື່ອ​ທຽບໃສ່​ປີ​ກ່ອນ ແຕ່​ກໍ​ບໍ່​ເກີນ 50%. ພິເສດ ນັບ​ແຕ່​ປີ​ກາຍເປັນ​ຕົ້ນ​ມາ ເກນ​ອາຍຸ​ຮັບ​ເງິນ​ບຳນານ​ຢູ່​ໃນ​ປະເທດ​ດັ່ງກ່າວ ໄດ້​ຍົກ​ຂຶ້ນ​ເປັນ 62 ປີ ເຮັດ​ໃຫ້​ອັດຕາ​ສ່ວນ​ຄົນ​ທີ່​ມີ​ອາຍຸ​ສູງ​ກວ່າ 60 ປີ ທີ່​ຮັບ​ເບ້ຍ​ບຳນານ ເພີ່ມ​ຂຶ້ນ 0,7%. ສ່ວນ​ເງິນ​ບຳນານ​ໃນ​ແຕ່​ລະ​ເດືອນ ແມ່ນ​ຢູ່​ທີ່  610.000 ວອນ (ເທົ່າ​ກັບ​ປະມານ 517 ໂດ​ລາ​ສະຫະລັດ) ເພີ່ມ​ຂຶ້ນ 40.000 ວອນ (ເທົ່າ​ກັບ​ປະມານ  34 ໂດ​ລາ​ສະຫະລັດ).

ຂ່າວທີ່ກ່ຽວຂ້ອງ