Facebook ຖືກ ສ ອາ​ເມ​ຣິ​ກາ ປັບ​ໃໝ​ຍ້ອນ​ລະເມີດ​ສິດທິ​ສ່ວນ​ບຸກຄົນ

133 26 ກ.ລ. 2019 ຂ່າວຕ່າງປະເທດ
Facebook ຖືກ ສ ອາ​ເມ​ຣິ​ກາ ປັບ​ໃໝ​ຍ້ອນ​ລະເມີດ​ສິດທິ​ສ່ວນ​ບຸກຄົນ

   ຄະນະ​ກຳມະການ​ການ​ຄ້າ​ຂອງ ສ ອາ​ເມ​ຣິ​ກາ (FTC) ໄດ້​ມີ​ແຈ້ງ​ການ​ອອກ​ມາ​ຢ່າງ​ເປັນ​ທາງ​ການ ວັນ​ທີ 24 ກໍລະກົດ​ນີ້ ກ່ຽວ​ກັບ​ການ​ກຳນົດ​ການ​ປັບ​ໃໝ​ທີ່ 5 ຕື້​ໂດ​ລາ​ສະຫະລັດ ຕໍ່​ສື່​ສັງຄົມ Facebook ຍ້ອນ​ລະເມີດ​ສິດທິ​ສ່ວນ​ຕົວ​ຂອງ​ຜູ້​ຊົມໃຊ້. ການ​ດຳເນີນ​ການ​ດັ່ງກ່າວ ໄດ້​ເປັນ​ການ​ຢຸດຕິ​ການ​ສືບສວນ​ສອບ​ສວນ​ຂອງ FTC ທີ່​ມີ​ຕໍ່​ການເຄື່ອນໄຫວ​ປິດ​ລັບ​ຂອງ Facebook. ໄປ​ຄຽງ​ຄູ່​ກັບ​ການ​ປັບ​ໃໝ​ສູງ​ເປັນ​ປະຫວັດ​ການ​ດັ່ງກ່າວ Facebook ຈະ​ຕ້ອງ​ໄດ້​ປັບ​ໂຄງ​ສ້າງ​ໃນ​ການ​ເຂົ້າ​ຫາ​ສິດທິ​ສ່ວນ​ບຸກຄົນ ຂອງ​ສື່​ສັງຄົມ​ດັ່ງກ່າວ.

    ຕາມ​ການ​ຕົກລົງ​ແລ້ວ ສະພາ​ບໍລິຫານ​ຄຸ້ມ​ຄອງ​ຂອງ Facebook ຈະ​ຕ້ອງ​ໄດ້​ກໍ່​ຕັ້ງ​ຄະນະ​ກຳມະການ​ປ້ອງ​ກັນ​ຄວາມ​ລັບ​ໜຶ່ງ​ທີ່​ເປັນ​ເອກະລາດ​ຂຶ້ນ​ມາ  ຍົກເລີກ​ສິດ​ການ​ຄວບ​ຄຸມ​ຢ່າງ​ບໍ່​ມີ​ຂອບ​ເຂດ​ຂອງ​ທ່ານ ມາກ ຊຸກ​ເກີ​ເບີກ ຜູ້ອຳນວຍການ​ຝ່າຍ​ບໍລິຫານ​ຂອງ Facebook ກ່ຽວ​ກັບ​ການ​ຕົກລົງ​ດ້ານ​ຜົນ​ກະທົບ​ຕໍ່​ສິດທິ​ສ່ວນ​ຕົວ​ຂອງ​ຜູ້​ຊົມໃຊ້. ໃນ​ຂະນະ​ດຽວ​ກັນ Facebook ກໍ​ເຫັນ​ດີ​ປະຕິບັດ​ການ​ຕິດຕາມ​ກວດກາ​ທີ່​ໃຫຍ່​ກວ່າ​ເກົ່າ ກັບ​ການ​ນຳ​ໃຊ້​ຂອງ​ຝ່າຍ​ທີ​ສາມ.

    ອີກ​ດ້ານ​ໜຶ່ງ ໃນ​ວັນ​ດຽວ​ກັນ Facebook ໄດ້​ເປີດເຜີຍ​ຜົນ​ການ​ເຮັດ​ທຸລະ​ກິດ ໃນ​ໄຕ​ມາດ  2/2019 ໂດຍ​ມີ​ລາຍ​ຮັບ​ເປັນ​ໄຕ​ມາດ​ທີ​ສອງ​ຕິດຕໍ່​ກັນ ທີ່​ເກີນ​ການ​ຄາດ​ຫວັງ​ເອົາ​ໄວ້​ຂອງ​ບັນດາ​ນັກ​ລົງທຶນ ໂດຍ​ບໍ່​ເອົາ​ຫົວຊາ​ຕໍ່​ການ​ທີ່​ຖືກ​ປັບ​ໃໝ​ດັ່ງກ່າວ ຊຶ່ງ​ລາຍ​ຮັບ​ໂດຍ​ສະເລ່ຍ​ໃສ່​ຫົວ​ຄົນ​ຈາກ​ຜູ້​ຊົມໃຊ້ ຢູ່​ທີ່ 7,05 ໂດ​ລາ​ສະຫະລັດ ນັບ​ວ່າ​ສູງ​ກວ່າ​ທີ່ Factset ຄາດ​ຄະເນ​ເອົາ​ໄວ້ 6,87 ໂດ​ລາ​ສະຫະລັດ. Facebook ໃຫ້​ຮູ້​ວ່າ ລາຍ​ຮັບ​ສະເລ່ຍ​ຕໍ່​ຜູ້​ຊົມໃຊ້​ແຕ່ລະຄົນ ເພີ່ມ​ຂຶ້ນ 18% ຂຶ້ນ​ເປັນ 7,05 ໂດ​ລາ​ສະຫະລັດ ຈາກ​ລະດັບ 5,97 ໂດ​ລາ​ສະຫະລັດ ໃນ​ເວລາ​ດຽວ​ກັນ​ຂອງ​ກາຍ.

    Facebook ໃຫ້​ຮູ້​ວ່າ ໃນ​ເວລາ​ດັ່ງກ່າວ ລວບ​ລວມ​ສະຖິຕິ​ຜູ້​ໃຊ້​ໃນ​ແຕ່​ລະ​ເດືອນ ຢູ່​ທີ່ 2,7 ຕື້​ກວ່າ​ຄົນ ສຳລັບ​ການ​ນຳ​ໃຊ້​ທັງ​ໝົດ ເພີ່ມ​ຂຶ້ນ​ໜ້ອຍ​ໜຶ່ງ ເມື່ອ​ທຽບໃສ່​ໄຕ​ມາດ 1/2019. ພື້ນຖານ​ຜູ້​ຊົມໃຊ້​ປະຈຳ​ວັນ​ຢູ່​ໃນ​ເອີ​ຣົບ ໃນ​ໄຕ​ມາດ​ທີ 2/2019 ບໍ່​ມີ​ການ​ປ່ຽນແປງ ເມື່ອ​ທຽບໃສ່​ໄຕ​ມາດ 1/2019 ຄື​ຢູ່​ທີ່​ລະດັບ 286 ລ້ານ​ຄົນ. ສ່ວນ​ຜູ້​ຊົມໃຊ້​ຢູ່​ໃນ ສ ອາ​ເມ​ຣິ​ກາ ແລະ  ກາ​ນາ​ດາ ໄດ້​ເພີ່ມ​ຂຶ້ນ​ເປັນ 187 ລ້ານ​ຄົນ ຈາກ​ທີ່​ມີ 186 ລ້ານ​ຄົນ ໃນ​ໄຕ​ມາດ​ກ່ອນ​ໜ້າ​ນັ້ນ.

ຂ່າວທີ່ກ່ຽວຂ້ອງ