ກອງປະຊຸມສະໄໝສາມັນ ເທື່ອທີ 7 ຂອງ ສປ ນວ ພິຈາລະນາຫຼາຍບັນຫາສຳຄັນ

320 25 ກ.ລ. 2019 ຂ່າວໜ້າ​ໜຶ່ງ
ກອງປະຊຸມສະໄໝສາມັນ ເທື່ອທີ 7 ຂອງ ສປ ນວ ພິຈາລະນາຫຼາຍບັນຫາສຳຄັນ

    ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 7 ຂອງ​ສະ­ພາ​ປະ­ຊາ­ຊົນ ນະ­ຄອນ­ຫຼວງ​ວຽງ​ຈັນ (ສປ ນວ) ຊຸດ​ທີ I ໄຂ​ຂຶ້ນ​ເປັນ​ທາງ​ການ​ໃນ​ວັນ​ທີ 24 ກໍ­ລະ­ກົດ 2019 ຢູ່​ຫ້ອງ​ວ່າ­ການ​ປົກ­ຄອງ ນວ ໂດຍ​ເປັນ​ປະ­ທານ​ຂອງ​ທ່ານ ອາ­ນຸ­ພາບ ຕຸ​ນາ​ລົມ ປະ­ທານ ສປ ນວ ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ ນວ ພ້ອມ​ດ້ວຍ​ຮອງ​ເຈົ້າ​ຄອງ ຫົວ­ໜ້າ​ພະ​ແນກ ແລະ ພາກ ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ອາ­ນຸ­ພາບ ຕຸ​ນາ​ລົມ ກ່າວ​ວ່າ: 6 ເດືອນ​ຜ່ານ​ມາ​ບັນ­ດາ​ອົງ​ການ­ຈັດ­ຕັ້ງ​ລັດ​ອ້ອມ​ຂ້າງ ນວ ໄດ້​ສຸມ​ໃສ່​ຈັດ​ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ແຜນ​ງົບ­ປະ­ມານ​ປະ­ຈຳ​ປີ 2019 ຕາມ​ມະ­ຕິ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 6 ຂອງ ສປ ນວ ຮັບ­ຮອງ​ເອົາ ເຊິ່ງ​ມີ​ຂໍ້​ສະ­ດວກ ຂໍ້​ຫຍຸ້ງ­ຍາກ ແລະ ສິ່ງ​ທ້າ​ທາຍ​ຫຼາຍ​ປະ­ການ ແຕ່​ຍ້ອນ​ຄວາມ​ເອົາ­ໃຈ­ໃສ່​ຊີ້​ນຳ​ຢ່າງ​ໃກ້­ຊິດ​ຂອງ​ອົງ­ຄະ​ນະ​ພັກ ອົງ­ການ​ປົກ­ຄອງ ແລະ ຄວາມ​ເປັນ​ເຈົ້າ​ການ​ຮັບ­ຜິດ­ຊອບ​ສູງ​ຂອງ​ທຸກ​ພາກ­ສ່ວນ​ພາກ​ລັດ ເອ­ກະ​ຊົນ ແລະ ປະ­ຊາ­ຊົນ ຈຶ່່ງ​ເຮັດ​ໃຫ້​ຄາດ­ໝາຍ ມາດ​ຕະ­ການ​ຕ່າງໆ​ທີ່​ກອງ​ປະ­ຊຸມ​ສະ­ພາ​ປະ­ຊາ­ຊົນ​ຮັບ­ຮອງ​ເອົາ​ນັ້ນ ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ຕໍ່​ເນື່ອງ ແລະ ມີ​ຜົນ­ສຳ­ເລັດ​ທີ່​ດີ​ຂຶ້ນ ເຮັດ​ໃຫ້ ນວ ສືບ­ຕໍ່​ມີ​ສະ­ຖຽນ​ລະ​ພາບ​ດ້ານ​ການ­ເມືອງ​ໜັກ​ແໜ້ນ ສັງ­ຄົມ​ມີ​ຄວາມ​ສະ­ຫງົບ​ເປັນ​ລະ­ບຽບ​ຮຽບ​ຮ້ອຍ ເສດ­ຖະ­ກິດ​ມີ​ສະ­ຖຽນ​ລະ​ພາບ​ໂດຍ​ພື້ນ­ຖານ ສ້າງ​ສະ­ພາບ​ແວດ​ລ້ອມ ແລະ ເງື່ອນ­ໄຂ​ເອື້ອ​ອຳ­ນວຍ​ໃຫ້­ການ​ພັດ­ທະ­ນາ ນວ ນັບ​ມື້​ພົ້ນ​ເດັ່ນ​ເທື່ອ​ລະ​ກ້າວ.

    ກອງ​ປະ­ຊຸມ​ຄັ້ງ​ນີ້ ຈະ​ສຸມ​ໃສ່​ຄົ້ນ­ຄວ້າ ພິ­ຈາ­ລະ­ນາ ແລະ ຮັບ­ຮອງ​ເອົາ​ບັນ­ຫາ​ສຳ­ຄັນ​ພື້ນ­ຖານ​ຂອງ ນວ ເຊັ່ນ: ພິ­ຈາ­ລະ­ນາ ແລະ ຮັບ­ຮອງ​ເອົາ​ບົດ​ລາຍ​ງານ​ຂອງ​ອົງ­ການ​ປົກ­ຄອງ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແຜນ​ງົບ­ປະ­ມານ​ແຫ່ງ​ລັດ 6 ເດືອນ​ຕົ້ນ​ປີ ທິດ​ທາງ 6 ເດືອນ​ທ້າຍ​ປີ 2019 ແລະ ສະ­ເໜີ​ດັດ­ແກ້​ງົບ­ປະ­ມານ 6 ເດືອນ​ທ້າຍ​ປີ 2019 ຂອງ ນວ ການ​ສະ­ເໜີ​ແຕ່ງ­ຕັ້ງ​ສະ­ມາ­ຊິກ​ອົງ­ການ​ປົກ­ຄອງ​ຕາມ​ການ​ສະ­ເໜີ​ຂອງ​ທ່ານ​ເຈົ້າ​ຄອງ ນວ ການ​ສະ­ເໜີ​ແຕ່ງ­ຕັ້ງ​ຫົວ­ໜ້າ​ອົງ­ການ​ໄອ​ຍະ​ການ​ປະ­ຊາ­ຊົນ ນວ ຕາມ​ການ​ສະ­ເໜີ​ຂອງ​ຄະ­ນະ​ປະ­ຈຳ ສປ ນວ ບົດ​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ​ວຽກ​ງານ​ແຕ່​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 6-7 ຂອງ​ຄະ­ນະ​ປະ­ຈຳ ສປ ນວ ຮັບ​ຟັງ​ການ​ລາຍ​ງານ​ຄືນ​ການ­ຈັດ­ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ສະ­ໄໝ​ສາ­ມັນ ເທື່ອ​ທີ 6 ສະ­ບັບ​ເລກ​ທີ 008/ສປ​ນວ ລົງ​ວັນ​ທີ 28 ມັງ­ກອນ 2019 ວ່າ​ດ້ວຍ​ການ​ຮັບ­ຮອງ​ເອົາ​ບົດ​ຊີ້​ແຈງ​ຂອງ​ອົງ­ການ​ໄອ​ຍະ​ການ​ປະ­ຊາ­ຊົນ  ສານ​ປະ­ຊາ­ຊົນ ພະ​ແນກ​ຍຸ­ຕິ​ທຳ ແລະ ກອງ​ບັນ­ຊາ​ການ ປກສ ນວ.

    ຮັບ​ຟັງ​ການ​ຊີ້​ແຈງ​ບັນ­ຫາ​ສຳ­ຄັນ ແລະ ພົ້ນ​ເດັ່ນ​ເຊັ່ນ: ການ​ແກ້​ໄຂ​ບັນ­ຫາ​ຂໍ້​ຂັດ​ແຍ່ງ​ທີ່​ດິນ ຄວາມ​ຄືບ​ໜ້າ­ການ​ປະ­ຕິ­ບັດ​ໂຄງ­ການ​ການ​ຊົດ​ເຊີຍ​ທີ່​ດິນ ແລະ ສິ່ງ​ປຸກ​ສ້າງ​ໃຫ້​ປະ­ຊາ­ຊົນ​ທີ່​ຖືກ​ຜົນ​ກະ­ທົບ​ຄື: ໂຄງ­ການ​ກໍ່­ສ້າງ​ເສັ້ນ­ທາງ​ດ່ວນ ນວ-ບໍ່​ເຕັນ ໄລ­ຍະ​ທີ 1 ນວ-ວັງ​ວຽງ ແຂວງ​ວຽງ​ຈັນ ໂຄງ­ການ​ກໍ່­ສ້າງ​ເສັ້ນ­ທາງ​ດອນ​ນົກ​ຂຸ້ມ-450 ປີ ຂອງ​ບໍ­ລິ­ສັດ​ນ້ຳ​ທາ​ກໍ່­ສ້າງ​ຂົວ​ທາງ ໂຄງ­ການ​ກໍ່­ສ້າງ​ມະ­ຫາ­ວິ­ທະ­ຍາ­ໄລ ວິ­ທະ­ຍາ­ສາດ​ສຸ­ຂະ­ພາບ​ຂອງ​ກະ­ຊວງ​ສາ­ທາ­ລະ­ນະ​ສຸກ ໂຄງ­ການ​ກໍ່­ສ້າງ​ສະ­ໜາມ​ກ໋ອບ​ລ່ອງ​ແທັງ​ຂອງ​ບໍ­ລິ­ສັດ​ລົງ­ທຶນ​ວຽງ​ຈັນ ແລະ ອະ­ສັງ­ຫາ­ລິ­ມະ​ຊັບ ການ​ຄຸ້ມ​ຄອງ ແລະ ອະ­ນຸ­ຍາດ​ໃຫ້​ນັກ​ລົງ­ທຶນ​ຕ່າງ­ປະ­ເທດ ລົງ­ທຶນ​ປູກ​ກ້ວຍ​ຢູ່ ນວ ເຊັ່ນ: ຢູ່​ເມືອງ​ໄຊ​ທາ­ນີ ນາ​ຊາຍ​ທອງ ສັງ​ທອງ ແລະ ເມືອງ​ປາກ​ງື່ມ ບັນ­ຫາ​ໄຟ​ເຍືອງ​ທາງ​ຕາມ​ແຕ່​ລະ​ເສັ້ນ­ທາງ ບັນ­ຫາ​ນ້ຳ​ເປື້ອນ​ທີ່​ໄຫຼ​ລົງ​ຮ່ອງ​ແຊງ​ສົ່ງ​ກິ່ນ​ເໝັນ​ແກ່​ປະ­ຊາ­ຊົນ​ທີ່​ອາ­ໄສ​ຢູ່​ໃກ້​ຄຽງ ການ​ຕິດ­ຕາມ​ກວດ­ກາ​ການ­ຈັດ­ຕັ້ງ​ປະ­ຕິ­ບັດ​ຄຳ​ສັ່ງ​ຕ່າງໆ​ຂອງ​ອົງ­ການ​ໄອ​ຍະ​ການ ນວ ທີ່​ໄດ້​ອອກ​ໄປ​ແລ້ວ ການ​ຄຸ້ມ​ຄອງ​ກອງ​ທຶນ​ບຳ­ບັດ​ຜູ້​ຕິດ​ຢາ​ເສບ​ຕິດ ແລະ ການ​ຄຸ້ມ​ຄອງ​ຜູ້​ຖືກ​ຫາ ແລະ ນັກ­ໂທດ​ຢູ່​ຄ້າຍ​ຄຸມ​ຂັງ-ດັດ​ສ້າງ ນວ.

ຂ່າວທີ່ກ່ຽວຂ້ອງ