ສົ່ງເສີມການພັດທະນາ ແລະ ການລົງທຶນຂອງນັກທຸລະກິດຍີ່ປຸ່ນ ຢູ່ລາວ

313 25 ກ.ລ. 2019 ຂ່າວໜ້າ​ໜຶ່ງ

    ສະ​ຖາ​ບັນ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ລາວ-ຍີ່­ປຸ່ນ (ສລຍ) ຮ່ວມ​ກັບ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ຈັດ​ກອງ​ປະ­ຊຸມ ຄັ້ງ​ທີ 10 ຂອງ​ຄະ­ນະ​ກຳ­ມະ­ການ​ປະ­ສານ​ງານ​ໃນ​ໂຄງ­ການ​ສ້າງ​ຄວາມ​ເຂັ້ມ­ແຂງ ເພື່ອ​ການ​ສົ່ງ­ເສີມ​ການ​ພັດ­ທະ­ນາ​ພາກ​ທຸ­ລະ​ກິດ ແລະ ການ​ລົງ­ທຶນ​ຂອງ​ນັກ­ທຸ­ລະ­ກິດ​ຍີ່­ປຸ່ນ​ຢູ່​ລາວ ໂດຍ​ຜ່ານ ສລຍ ຈັດ​ຂຶ້ນ​ວັນ​ທີ 24 ກໍ­ລະ­ກົດ 2019 ຢູ່​ສຳ­ນັກ­ງານ​ອະ­ທິ­ການ​ບໍ­ດີ ມຊ ໂດຍ​ເປັນ​ປະ­ທານ​ຂອງ​ທ່ານ ສົມ​ສີ ຍໍ​ພັນ​ໄຊ ອະ­ທິ­ການ​ບໍ­ດີ ມຊ ແລະ ທ່ານ Yoshiharu YONEYAMA ຫົວ­ໜ້າ​ອົງ­ການ JICA ປະ­ຈຳ​ລາວ ມີ​ຜູ້­ຕາງ­ໜ້າ​ຈາກ​ກົມ ແລະ ພະ­ນັກ­ງານ​ກ່ຽວ­ຂ້ອງ ເຂົ້າ​ຮ່ວມ.   

    ກອງ​ປະ­ຊຸມ​ຄັ້ງ​ນີ້ ໄດ້​ຮັບ​ຟັງ​ການ​ລາຍ​ງານ​ກ່ຽວ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ອັນ​ພົ້ນ​ເດັ່ນ​ຂອງ​ຄະ­ນະ​ປະ­ສານ​ງານ​ໂຄງ­ການ​ດັ່ງ­ກ່າວ ເຊິ່ງ 6 ເດືອນ​ຜ່ານ​ມາ ໂຄງ­ການ​ໄດ້​ມີ​ການ​ສືບ­ຕໍ່​ດຳ­ເນີນ​ການ​ປະ­ຕິ­ບັດ​ວຽກ​ງານ​ຕາມ​ແຜນ­ການ​ທີ່​ວາງ​ໄວ້ ເປັນ­ຕົ້ນ ດ້ານ​ການ​ບໍ­ລິ­ຫານ​ທຸ­ລະ​ກິດ ແລະ ດ້ານ​ວັດ­ທະ­ນະ­ທຳ ໂດຍ​ໄດ້​ມີ​ການ​ຮ່ວມ​ກັບ​ຊ່ຽວ­ຊານ​ຍີ່­ປຸ່ນ ເພື່ອ​ປັບ­ປຸງ​ການ​ປະ­ຕິ­ບັດ​ວຽກ​ງານ​ໃນ​ໂຄງ­ການ​ດັ່ງ­ກ່າວ​ ຢ່າງ​ເປັນ​ລະ­ບົບ​ຕໍ່​ເນື່ອງ ເຊັ່ນ: ສືບ­ຕໍ່​ການ​ຮຽນ-ການ​ສອນ​ຫຼັກ­ສູດ​ປະ­ລິນ­ຍາ​ໂທ ຮຸ່ນ​ທີ 11 ແລະ ດຳ­ເນີນ​ການ​ປ້ອງ​ກັນ​ຄວາມ​ຄືບ​ໜ້າ​ບົດ​ຈົບ​ຊັ້ນ​ຂອງ​ນັກ​ສຶກ​ສາ​ປະ­ລິນ­ຍາ​ໂທ ຮຸ່ນ​ທີ 10 ຈັດ​ຫຼັກ­ສູດ​ເຝີກ​ອົບ­ຮົມ ແລະ ຫຼັກ­ສູດ​ສະ­ເພາະ​ດ້ານ ຂະ­ຫຍາຍ​ການ​ຈັດ​ເຝີກ​ອົບ­ຮົມ​ບໍ­ລິ­ການ​ທຸ­ລະ​ກິດ​ລົງ​ສູ່​ແຂວງ​ຫຼວງ​ພະ​ບາງ ສະ­ຫວັນ​ນະ​ເຂດ ແລະ ແຂວງ​ຈຳ­ປາ​ສັກ ສຳ­ເລັດ​ການ​ຈັດ​ສຳ​ມະ​ນາ​ສຳ­ລັບ​ນັກ­ທຸ­ລະ­ກິດ​ຍິງ​ລາວ ຮ່ວມ​ກັບ​ນັກ­ທຸ­ລະ­ກິດ​ຍິງ​ຍີ່­ປຸ່ນ ແລະ ສືບ­ຕໍ່​ການ­ເຄື່ອນ­ໄຫວ​ວຽກ​ງານ 5 ສ.

    ນອກ­ຈາກ​ການ​ຮຽນ-ການ​ສອນ ຍັງ​ໄດ້​ຈັດ​ງານ​ແລກ­ປ່ຽນ​ດ້ານ​ວິ­ຊາ​ການ ແລະ ການ​ແລກ­ປ່ຽນ​ວັດ­ທະ­ນະ­ທຳ​ຮ່ວມ​ກັບ​ນັກ​ສຶກ​ສາ​ຈາກ​ມະ­ຫາ­ວິ­ທະ­ຍາ­ໄລ​ຍີ່­ປຸ່ນ ໄດ້​ຮັບ​ທຶນ​ການ​ສຶກ​ສາ​ໃຫ້​ນັກ­ຮຽນ​ທີ່​ຮຽນ​ດີ​ຮຽນ​ເກ່ງ ຈາກ​ມູນ​ນິ­ທິ​ຢາ​ມາ​ດະ ມູນ​ນິ­ທິ​ຢູ​ເອບ​ເຈ ແລະ ມູນ​ນິ­ທິ​ພາ­ສາ​ຍີ່­ປຸ່ນ​ຢ່າງ​ລະ 5 ທຶນ ໄດ້​ສືບ­ຕໍ່​ແລກ­ປ່ຽນ​ວິ­ຊາ​ການ​ລະ­ຫວ່າງ​ສະ​ຖາ​ບັນ ແລະ ສະ­ພາ​ອຸດ­ສາ­ຫະ­ກຳ-ການ​ຄ້າ​ແຂວງ​ສະ­ຫວັນ​ນະ​ເຂດ ຈຳ​ປະ​ສັກ ແລະ ຫຼວງ​ພະ​ບາງ ນອກ​ນີ້ ຍັງ​ໄດ້​ປັບ­ປຸງ​ພາ­ລະ​ບົດ­ບາດ ແລະ ໂຄງ​ຮ່າງ​ການ­ຈັດ­ຕັ້ງ​ຈາກ 4 ພະ​ແນກ ເປັນ 5 ພະ​ແນກ ເພື່ອ​ເຮັດ​ໃຫ້­ການ​ປະ­ຕິ­ບັດ​ງານ​ມີ​ຄວາມ​ຖືກ­ຕ້ອງ ແລະ ສອດ­ຄ່ອງ.

    ສຳ­ລັບ​ແຜນ​ດຳ­ເນີນ​ງານ​ຕໍ່­ໜ້າ ຈະ​ເລັ່ງ​ໃສ່​ການ​ຊຸກ­ຍູ້​ສົ່ງ­ເສີມ​ການ​ພັດ­ທະ­ນາ​ວຽກ​ງານ​ແຕ່​ລະ​ດ້ານ ເປັນ­ຕົ້ນ ການ​ສືບ­ຕໍ່​ປະ­ຕິ­ບັດ​ໂຄງ­ການ​ໄລ­ຍະ 5 (ປີ 2019-2020) ການ​ສ້າງ​ຄວາມ​ເຂັ້ມ­ແຂງ​ເພື່ອ​ສົ່ງ­ເສີມ​ການ​ພັດ­ທະ­ນາ​ພາກ​ທຸ­ລະ​ກິດ ແລະ ເສີມ​ຂະ­ຫຍາຍ​ເຄືອ​ຄ່າຍ​ພາກ​ທຸ­ລະ​ກິດ ໂດຍ​ຜ່ານ ສລຍ ສົ່ງ​ອາ­ຈານ ແລະ ຜູ້​ສຳ​ນານ​ງານ​ມາ​ໃຫ້​ຄຳ​ປືກ​ສາ ແລະ ສອນ​ຫຼັກ­ສູດ​ບໍ­ລິ­ຫານ​ທຸ­ລະ​ກິດ ຫຼັກ­ສູດ​ສະ­ເພາະ​ດ້ານ ແລະ ຫຼັກ­ສູດ​ປະ­ລິນ­ຍາ​ໂທ ສົ່ງ­ເສີມ​ການ​ພົວ­ພັນ ແລະ ຮ່ວມ​ມື​ໃນ​ຂົງ­ເຂດ​ທຸ­ລະ​ກິດ ລາວ-ຍີ່­ປຸ່ນ ແລະ ການ​ສ້າງ​ເຄືອ​ຄ່າຍ ຈັດ​ແຂ່ງ­ຂັນ​ແຜນ​ທຸ­ລະ​ກິດ ດຳ­ເນີນ​ແຜນ​ງານ​ຫຼັກ­ສູດ​ການ​ສອນ ຮ່ວມ​ມື​ກັບ​ສະ­ພາ​ການ​ຄ້າ ໃຫ້​ຄຳ​ປືກ​ສາ​ກັບ​ບໍ­ລິ­ສັດ ແລະ ອື່ນໆ.

ຂ່າວທີ່ກ່ຽວຂ້ອງ