ທຸກພາກສ່ວນ ຕ້ອງຮ່ວມມືໃນການປ້ອງກັນພະຍາດໄຂ້ຍຸງລາຍ

245 25 ກ.ລ. 2019 ຂ່າວໜ້າ​ໜຶ່ງ
ທຸກພາກສ່ວນ ຕ້ອງຮ່ວມມືໃນການປ້ອງກັນພະຍາດໄຂ້ຍຸງລາຍ

    ນັບ​ແຕ່​ຕົ້ນ​ປີ 2019 ເປັນ­ຕົ້ນ​ມາ ຢູ່​ນະ­ຄອນ­ຫຼວງ​ວຽງ​ຈັນ (ນວ) ມີ​ການ​ລະ­ບາດ​ຂອງ​ພະ­ຍາດ​ໄຂ້­ຍຸງ​ລາຍ ປັດ­ຈຸ­ບັນ​ຍັງ​ມີ​ທ່າ​ອ່ຽງ​ເພີ່ມ​ຂຶ້ນ​ຢ່າງ​ຕໍ່​ເນື່ອງ ເຮັດ​ໃຫ້​ມີ​ຜູ້​ເສຍ​ຊີ­ວິດ​ແລ້ວ 7 ຄົນ.

    ທ່ານ​ນາງ ໄຊ​ພອນ ນັນ­ທະ​ພອນ ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ ນວ ໄດ້​ລາຍ​ງານ​ໃນ​ວັນ​ທີ 23 ກໍ­ລະ­ກົດ 2019 ວ່າ: ປັດ­ຈຸ­ບັນ​ທົ່ວ ນວ ມີ​ຜູ້​ເປັນ­ໄຂ້​ຍຸງ​ລາຍ 3.095 ກໍ­ລະ­ນີ ໃນ​ນີ້ ເມືອງ​ທີ່​ເກີດ​ຫຼາຍ​ກວ່າ​ໝູ່​ແມ່ນ​ເມືອງ​ໄຊ​ທາ­ນີ 1.047 ກໍ­ລະ­ນີ ເສຍ​ຊີ­ວິດ 2 ຄົນ ເມືອງ​ໄຊ​ເສດ​ຖາ 600 ກໍ­ລະ­ນີ ສີ​ໂຄດ​ຕະ­ບອງ​ມີ 306 ກໍ­ລະ­ນີ ບໍ່​ມີ​ກໍ­ລະ­ນີ​ເສຍ​ຊີ­ວິດ ສ່ວນ​ເມືອງ​ສີ​ສັດ­ຕະ​ນາກ ມີ​ຜູ້​ເສຍ​ຊີ­ວິດ 2 ຄົນ ເມືອງ​ຫາດ​ຊາຍ​ຟອງ ນາ​ຊາຍ​ທອງ ແລະ ເມືອງ​ສັງ​ທອງ ເສຍ​ຊີ­ວິດ​ເມືອງ​ລະ 1 ຄົນ ສາ­ເຫດ​ຂອງ​ການ​ເສຍ​ຊີ­ວິດ​ສ່ວນ​ໃຫຍ່​ແມ່ນ​ໄປ​ໂຮງ­ໝໍ​ຊ້າ ຊື້​ຢາ​ມາ​ປິ່ນ­ປົວ​ເອງ ຈົນ​ອາ­ການ​ໜັກ​ແລ້ວ​ຈິ່ງ​ມາ​ໂຮງ­ໝໍ ແລະ ອື່ນໆ.

    ເພື່ອ​ເຮັດ​ໃຫ້­ການ​ລະ­ບາດ​ຂອງ​ພະ­ຍາດ​ດັ່ງ­ກ່າວ​ຫຼຸດ​ລົງ ແລະ ສາ­ມາດ​ຄວບ​ຄຸມ​ໄດ້ ພະ​ແນກ​ສາ­ທາ­ລະ­ນະ​ສຸກ ນວ ຮ່ວມ​ກັບ​ຂະ­ແໜງ­ການ​ກ່ຽວ­ຂ້ອງ​ໄດ້​ເອົາ­ໃຈ­ໃສ່​ສ້າງ​ຂະ​ບວນ​ການ​ຕ່າງໆ ເປັນ­ຕົ້ນ ໃຫ້​ຄວາມ​ຮູ້​ແກ່​ປະ­ຊາ­ຊົນ ນຳ­ພາ​ປະ­ຊາ­ຊົນ​ທຳ­ລາຍ​ແຫຼ່ງ​ເພາະ​ພັນ​ໜອນ​ນ້ຳ​ຍຸງ​ລາຍ​ຕາມ​ຫຼັກ­ການ 5ປ ພົ່ນ​ຢາ​ຕາມ​ບ້ານ​ທີ່​ມີ​ຄວາມ​ສ່ຽງ ໂອ­ກາດ​ນີ້ ກໍ​ຂໍ​ຮຽກ­ຮ້ອງ​ມາ​ຍັງ​ປະ­ຊາ­ຊົນ ຈົ່ງ​ພ້ອມ​ກັນ​ຈັດ​ຕັ້ງ​ປະ­ຕິ­ບັດ​ຕາມ​ຫຼັກ­ການ 5ປ ເປັນ​ປົກ­ກະ­ຕິ ເຊິ່ງ​ການ​ສ້າງ​ຂະ​ບວນ​ການ​ດັ່ງ­ກ່າວ ເປັນ​ໜ້າ­ທີ່​ຂອງ​ໝົດ​ທຸກ​ຄົນ ຖ້າ​ທຸກ​ຄົນ​ເອົາ­ໃຈ­ໃສ່​ກໍ​ຈະ​ເຮັດ​ໃຫ້­ການ​ລະ­ບາດ​ຂອງ​ພະ­ຍາດ​ດັ່ງ­ກ່າວ​ຫຼຸດ​ລົງ ແລະ ເມື່ອ​ມີ​ອາ­ການ​ໄຂ້​ຄວນ​ໄປ​ໂຮງ­ໝໍ ບໍ່​ຄວນ​ຊື້​ຢາ​ມາ​ກິນ​ເອງ.

ຂ່າວທີ່ກ່ຽວຂ້ອງ