ອຸຕຸແຈ້ງເຕືອນ 26-28 ນີ້ ຈະມີຝົນຕົກໜັກ ພ້ອມມີລົມພັດແຮງທົ່ວທຸກພາກ

284 25 ກ.ລ. 2019 ຂ່າວໜ້າ​ໜຶ່ງ

    ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ຄາດ​ຄະ­ເນ​ສະ­ພາບ​ອາ­ກາດ ວັນ​ທີ 22-25 ກໍ­ລະ­ກົດ 2019 ຄວາມ​ກົດ​ດັນ​ຕ່ຳ​ຂອງ​ອາ­ກາດ​ຮ້ອນ​ຈະ​ປົກ​ຄຸມ​ຢູ່​ທຸກ​ພາກ​ຂອງ​ປະ­ເທດ​ລາວ ດ້ວຍ​ກຳ­ລັງ​ປານ​ກາງ ພ້ອມ​ດຽວ​ກັນ​ລົມ​ຕາ­ເວັນ­ຕົກ-ຕາ­ເວັນ­ຕົກ​ສ່ຽງ​ໃຕ້ ຈະ​ມີ​ກຳ­ລັງ​ແຮງ​ພັດ​ປົກ​ຄຸມ​ພາກ​ກາງ ແລະ ພາກ​ໃຕ້ ເຊິ່ງ​ຈະ​ເຮັດ​ໃຫ້​ອາ­ກາດ​ຮ້ອນ​ຢູ່​ທົ່ວ​ໄປ ແລະ ຈະ​ມີ​ຝົນ­ຕົກ ຟ້າ­ຮ້ອງ ຟ້າ​ເຫຼື້ອມ ໃນ​ລະ­ດັບ​ຄ່ອຍ​ເປັນ​ບໍ­ລິ­ເວນ​ກວ້າງ​ຢູ່​ໃນ​ແຕ່​ລະ​ພາກ ແລະ ຕົກ​ປານ​ກາງ-ຕົກ​ໜັກ​ຢູ່​ບາງ​ທ້ອງ­ຖິ່ນ​ແຂວງ​ພາກ​ເໜືອ​ດ້ານ​ຕາ­ເວັນ​ອອກ-ພາກ​ກາງ ແລະ ບາງ​ທ້ອງ­ຖິ່ນ​ແຂວງ​ພາກ​ໃຕ້.

    ວັນ​ທີ 26-28 ກໍ­ລະ­ກົດ ນີ້ ຄວາມ​ກົດ​ດັນ​ຕ່ຳ​ຂອງ​ອາ­ກາດ ຍັງ​ຈະ​ສືບ­ຕໍ່​ປົກ​ຄຸມ​ຢູ່​ທົ່ວ​ທຸກ​ພາກ​ຂອງ​ປະ­ເທດ​ລາວ ສົມ​ທັບ​ກັບ​ກະ­ແສ​ລົມ​ຕາ­ເວັນ­ຕົກ​ສ່ຽງ​ໃຕ້​ມີ​ກຳ­ລັງ​ແຮງ​ພັດ​ປົກ​ຄຸມ ຈະ​ເຮັດ​ໃຫ້​ມີ​ຝົນ­ຕົກ ຟ້າ­ຮ້ອງ ຟ້າ​ເຫຼື້ອມ​ໃນ​ລະ­ດັບ​ຄ່ອຍ-ປານ​ກາງ​ເປັນ​ບໍ­ລິ­ເວນ​ກວ້າງ ແລະ ຕົກ​ໜັກ ພ້ອມ​ມີ​ລົມ​ພັດ​ແຮງ​ຢູ່​ບາງ​ທ້ອງ­ຖິ່ນ​ໃນ​ແຕ່​ລະ​ພາກ.

    ກົມ​ອຸ­ຕຸ­ນິ­ຍົມ ແລະ ອຸ​ທົກ​ກະ​ສາດ ໄດ້​ຄາດ​ຄະ­ເນ​ປະ­ລິ­ມານ​ນ້ຳ​ຝົນ​ປີ 2019 ໃນ​ບົດ​ລາຍ​ງານ ການ​ວິ­ເຄາະ​ສະ­ຖາ­ນະ​ການ ແລະ ຢັ້ງ­ຢືນ​ຄວາມ​ເປັນ​ຈິງ​ຂອງ​ປະ­ລິ­ມານ​ນ້ຳ​ແຫ້ງ​ຜິດ​ປົກ­ກະ­ຕິ ແລະ ຄາດ​ຄະ­ເນ​ປະ­ລິ­ມານ​ນ້ຳ​ຝົນ​ຂອງ​ປີ 2019 ໄລ­ຍະ​ຕົ້ນ​ເດືອນ​ກໍ­ລະ­ກົດ-ເດືອນ​ກັນ­ຍາ 2019 ຮ່ອງ​ຝົນ​ຍັງ​ສືບ­ຕໍ່​ເຄື່ອນ​ທີ່​ພັດ​ຜ່ານ​ພາກ​ກາງ ພ້ອມ​ດຽວ​ກັນ​ກະ­ແສ​ລົມ​ມໍ​ລະ​ສຸມ​ຕາ­ເວັນ­ຕົກ​ສ່ຽງ​ໃຕ້ ພັດ​ປົກ​ຄຸມ​ດ້ວຍ​ກຳ­ລັງ​ອ່ອນ ເຊິ່ງ​ຈະ​ເຮັດ​ໃຫ້​ມີ​ຝົນ­ຕົກ​ໃນ​ລະ­ດັບ​ຄ່ອຍ​ໃນ​ແຕ່​ລະ​ພາກ.

    ໃນ​ໄລ­ຍະ​ກາງ-ທ້າຍ​ເດືອນ​ກັນ­ຍາ 2019 ຮ່ອງ​ຝົນ​ຈະ​ເຄື່ອນ​ທີ່​ພາດ​ຜ່ານ​ເຂດ​ພາກ​ເໜືອ ແລະ ພາກ​ກາງ ປ່ອງ​ໃສ່​ພາ­ຍຸ​ໝູນ​ເຂດ​ຮ້ອນ ທີ່​ຈະ​ກໍ່​ຕົວ​ຢູ່​ທະ­ເລ​ຈີນ​ໃຕ້ ແລະ ເຂດ​ມະ­ຫາ​ສະ­ໝຸດ​ປາ​ຊີ​ຟິກ ເຊິ່ງ​ພາ­ຍຸ​ດັ່ງ­ກ່າວ​ຈະ​ເຄື່ອນ​ທີ່​ຜ່ານ​ເຂດ​ພາກ​ເໜືອ​ຂອງ​ຫວຽດ­ນາມ​ຈຳ­ນວນ​ໜຶ່ງ ຈາກ​ນັ້ນ ຈະ​ຜ່ານ​ພາກ​ກາງ ແລະ ພາກ​ເໜືອ​ຂອງ​ປະ­ເທດ​ລາວ ເຊິ່ງ​ຈະ​ເຮັດ​ໃຫ້​ຝົນ­ຕົກ​ໜັກ​ຢູ່​ບາງ​ທ້ອງ­ຖິ່ນ​ເຂດ​ພາກ​ເໜືອ​ດ້ານ​ຕາ­ເວັນ​ອອກ​ລົງ​ຫາ​ພາກ​ກາງ ແລະ ພາກ​ໃຕ້.

ຂ່າວທີ່ກ່ຽວຂ້ອງ