ເບິ່ງບ້ານເຂົາເອົາບົດຮຽນ 25-07-2019

179 25 ກ.ລ. 2019 ຫົວຂໍ້ຂ່າວອື່ນໆ

    ເລື່ອງ​ທີ່​ສັນ​ຫາ​ມາ​ເລົ່າ​ປະ­ຈຳ​ວັນ​ນີ້ ມີ​ເລື່ອງ​ທາງ​ການ​ຫວຽດ­ນາມ ກ່າວ​ເຕືອນ​ອະ­ດີດ​ພະ­ນັກ­ງານ​ການ​ນຳ​ກ່ຽວ​ກັບ​ການ​ສໍ້​ລາດ​ບັງ​ຫຼວງ ຕໍ່​ໃສ່​ມາດ​ຕະ­ການ​ຂອງ​ຍີ່­ປຸ່ນ​ໃນ​ການ​ຫຼຸດ­ຜ່ອນ​ຄວັນ​ຢາ­ສູບ ສຸດ​ທ້າຍ​ແມ່ນ​ຂ່າວ​ກ່ຽວ​ກັບ​ການ​ລົງ­ໂທດ​ຜູ້​ລະ­ເມີດ​ກົດ​ຈະ­ລາ­ຈອນ​ຢູ່​ສິງ­ກະ­ໂປ.

    ທີ່ ຫວຽດ­ນາມ: ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 22 ເດືອນ​ກໍ­ລະ­ກົດ​ນີ້ ໄດ້​ສະ­ເໜີ​ຂ່າວ​ທີ່​ໜ້າ​ສົນ­ໃຈ​ຈາກ​ຫວຽດ ນາມ ກ່ຽວ​ກັບ​ບັນ­ຫາ​ສໍ້​ລາດ​ບັງ​ຫຼວງ​ຂອງ​ພະ­ນັກ­ງານ​ການ​ນຳ​ຂັ້ນ​ເຕີບໆ.

    ຂ່າວ​ບອກ​ວ່າ: ໃນ​ວັນ​ທີ 19 ເດືອນ​ນີ້​ເອງ ທາງ​ກົມ​ການ­ເມືອງ​ສູນ​ກາງ​ພັກ​ກອມ​ມຸຍ​ນິດ​ຫວຽດ­ນາມ ໄດ້​ອອກ​ເອ­ກະ ສານ​ກ່າວ​ເຕືອນ​ດ້ານ​ວິ­ໄນ​ຕໍ່​ທ່ານ ວູ ວັນ​ມິງ ອະ­ດີດ​ກຳ­ມະ­ການ​ສູນ​ກາງ​ພັກ​ກອມ​ມຸຍ​ນິດ​ຫວຽດ­ນາມ ອະ­ດີດ​ຮອງ​ນາ ຍົກ​ລັດ­ຖະ­ມົນ­ຕີ ຮັບ­ຜິດ­ຊອບ​ກຳ­ມາ​ທິ​ການ​ກິດ­ຈະ­ການ​ພົນ​ລະ​ເຮືອນ​ຫວຽດ­ນາມ ໃນ​ໄລ­ຍະ​ດຳ­ລົງ​ຕຳ­ແໜ່ງ​ອັນ​ສູງ​ສົ່ງ ທາງ​ເບື້ອງ​ພັກ ແລະ ລັດ​ນັ້ນ ທ່ານ ວູ ວັນ​ມິງ ໄດ້​ຮັບ​ມອບ​ໝາຍ​ໃຫ້​ລົງ​ເລິກ​ວຽກ​ງານ​ປະ­ຕິ​ຮູບ​ດ້ານ​ທຸ­ລະ​ກິດ ແຕ່​ປີ 2011 ເຖິງ​ປີ 2016 ທ່ານ​ມີ​ສິດ​ເຊັນ​ບັນ­ດາ​ເອ­ກະ­ສານ​ການ​ຈັດ​ຊື້ ແລະ ການ​ຍົກ­ເລີກ​ກອງ​ທຶນ​ຂອງ​ລັດ​ໃນ​ທຸ­ລະ​ກິດ​ທ່າ­ເຮືອ​ກິ​ຍອນ ISC ແລະ ທ່າ­ເຮືອ​ກວງ​ນິນ ການ​ເປີດ­ເຜີຍ​ໃຫ້​ສັງ­ຄົມ​ຮູ້​ກ່ຽວ​ກັບ​ການ​ລົງ​ວິ­ໄນ​ຕໍ່​ພະ­ນັກ­ງານ​ຂັ້ນ​ສູງ​ຂອງ​ລັດ​ທີ່​ມີ​ພຶດ­ຕິ​ກຳ​ສໍ້​ລາດ​ບັງ​ຫຼວງ ຫຼື ຮັບ​ສິນ​ບົນ​ນັ້ນ ເປັນ​ວິ­ທີ​ການ​ໜຶ່ງ​ຂອງ​ທາງ​ການ​ຫວຽດ­ນາມ ເພື່ອ​ສ້າງ​ຄວາມ​ເຊື່ອ​ໝັ້ນ​ຂອງ​ປະ­ຊາ­ຊົນ​ຕໍ່​ຄວາມ​ເດັດ­ຂາດ​ຂອງ​ພັກ ແລະ ລັດ ໃນ​ບັ້ນ​ຮົບ​ຕ້ານ​ການ​ສໍ້​ລາດ​ບັງ​ຫຼວງ.

    ທີ່ ຍີ່­ປຸ່ນ: ຫວ່າງ​ບໍ່​ເຫິງ​ມາ​ນີ້ ມີ​ຂ່າວ​ກ່ຽວ​ກັບ​ທາງ​ການ​ຍີ່­ປຸ່ນ​ເລີ່ມ​ເອົາ​ມາດ​ຕະ­ການ​ເດັດ­ຂາດ​ກ່ຽວ​ກັບ​ການ​ຫ້າມ​ສູບ­ຢາ​ຕາມ​ສະ­ຖານ­ທີ່​ສາ­ທາ­ລະ­ນະ ເຊິ່ງ​ມີ​ຂຶ້ນ​ໃນ​ໄລ­ຍະ​ທີ່​ປະ­ເທດ​ນີ້​ພວມ​ຂຸ້ນ­ຂ້ຽວ​ກະ­ກຽມ​ເປັນ​ເຈົ້າ­ພາບ​ມະ​ຫະ​ກຳ​ກີ­ລາ​ໂອ​ລິມ ປິກ ແລະ ປາ​ຣາ​ລິມ​ປິກ (ກີ­ລາ​ສຳ­ລັບ​ຄົນ​ພິ­ການ) ໃນ​ປີ 2020.

    ການ​ຫ້າມ​ສູບ­ຢາ​ຕາມ​ສະ­ຖານ­ທີ່​ສາ­ທາ­ລະ­ນະ​ໃນ​ຍີ່­ປຸ່ນ​ນັ້ນ​ດຳ­ເນີນ​ມາ​ເປັນ​ຂັ້ນ​ຕອນ ແລະ ຄ່ອຍ​ເຂັ້ມ​ງວດ​ກວດ​ຂັນ​ຂຶ້ນ​ຕາມ​ລຳ­ດັບ ຕົວ­ຢ່າງ ໃນ​ປີ 2018 (ວຽງ​ຈັນ​ທາມ ສະ­ບັບ​ວັນ​ທີ 25 ສິງ­ຫາ 2017) ກໍ​ມີ​ຂ່າວ​ວ່າ ທາງ​ການ​ຍີ່­ປຸ່ນ​ໄດ້​ມີ​ນະ­ໂຍ­ບາຍ​ສະ­ໜັບ­ສະ­ໜູນ​ດ້ານ​ການ​ເງິນ​ໃຫ້​ບັນ­ດາ​ຮ້ານ​ອາ­ຫານ​ຈຳ­ນວນ​ໜຶ່ງ​ສ້າງ​ຫ້ອງ​ສູບ­ຢາ​ສະ­ເພາະ ເພື່ອ​ແຍກ​ຜູ້​ສູບ ຢາ​ອອກ​ຈາກ​ຫ້ອງ​ລວມ ນະ­ໂຍ­ບາຍ​ດັ່ງ­ກ່າວ​ເລີ່ມ​ປະ­ຕິ­ບັດ​ເປັນ​ຮູບ​ປະ​ທຳ​ໃນ​ສົກ​ງົບ­ປະ­ມານ​ປະ­ຈຳ​ປີ 2018.

    ເປົ້າ​ໝາຍ​ຂອງ​ນະ­ໂຍ­ບາຍ ກໍ​ຄື ເພື່ອ​ປົກ​ປ້ອງ​ບໍ່​ໃຫ້​ຜູ້​ບໍ່​ສູບ­ຢາ​ໄດ້​ຮັບ​ຄວັນ​ຢາ­ສູບ​ຈາກ​ບັນ­ດາ​ສິງ​ອົມ​ຄວັນ ເຈົ້າ​ການ​ໃນ​ການ​ດຳ­ເນີນ​ນະ­ໂຍ­ບາຍ​ດັ່ງ­ກ່າວ ໄດ້­ແກ່ ກະ­ຊວງ​ສາ­ທາ­ລະ­ນະ​ສຸກ ແຮງ​ງານ ແລະ ສະ­ຫວັດ­ດີ​ການ ງົບ​ສະ­ໜັບ­ສະ­ໜູນ​ດັ່ງ­ກ່າວ ເບື້ອງ​ຕົ້ນ​ມີ​ພຽງ 50.279,3 ໂດ​ລາ​ສະ­ຫະ­ລັດ ແຕ່​ກໍ​ສູງ​ກວ່າ​ງົບ​ປີ 2017 ປະ­ມານ 5 ເທົ່າ ງົບ​ສະ­ໜັບ­ສະ­ໜູນ​ສູງ​ສຸດ​ສຳ­ລັບ​ລາຍ​ບຸກ­ຄົນ​ທີ່​ປະ­ກອບ​ການ​ຮ້ານ​ອາ­ຫານ​ນັ້ນ​ແມ່ນ​ປະ­ມານ 2 ລ້ານ​ເຢັນ ໃນ​ເດືອນ​ມີ­ນາ ປີ 2017 ທາງ​ກະ­ຊວງ​ໄດ້​ເປີດ­ເຜີຍ​ກ່ຽວ​ກັບ​ຮ່າງ​ແຜນ​ເກືອດ​ຫ້າມ​ໂດຍ​ພື້ນ­ຖານ​ການ​ສູບ­ຢາ​ຕາມ​ຮ້ານ​ອາ­ຫານ ກໍ​ຄື ສະ­ຖານ­ທີ່​ບໍ­ລິ­ການ​ດ້ານ​ກິນ​ດື່ມ​ອື່ນໆ ຍົກ­ເວັ້ນ​ຢູ່​ພາຍ​ໃນ​ຫ້ອງ​ທີ່​ຈັດ​ໄວ້​ສະ­ເພາະ​ຜູ້​ສູບ­ຢາ.

    ທີ່ ສິງ­ກະ­ໂປ: ໃນ​ຕົ້ນ​ເດືອນ​ກໍ­ລະ­ກົດ ປີ​ນີ້ ລັດ​ຖະ​ສະ­ພາ​ສິງ­ກະ­ໂປ​ໄດ້​ຮັບ­ຮອງ​ເອົາ​ກົດ­ໝາຍ​ວ່າ​ດ້ວຍ​ການ​ຄົມ­ມະ­ນາ­ຄົມ ສະ­ບັບ​ປັບ­ປຸງ ໂດຍ​ໄດ້​ກຳ­ນົດ​ໂທດ​ຜູ້​ລະ­ເມີດ​ກົດ​ຈະ­ລາ­ຈອນ​ທີ່​ສ້າງ​ຄວາມ​ເສຍ​ຫາຍ​ແກ່​ຊີ­ວິດ ແລະ ຊັບ​ສິນ​ຂອງ​ລັດ ແລະ ສັງ­ຄົມ ພາຍ​ໃຕ້​ກົດ­ໝາຍ​ສະ­ບັບ​ປັບ­ປຸງ ຜູ້​ຂັບ​ລົດ​ຕຳ​ຄົນ​ຈົນ​ເສຍ​ຊີ­ວິດ ຈະ​ໄດ້​ຮັບ​ໂທດ​ຈຳ​ຄຸກ 8 ປີ ແທນ​ທີ່​ຈະ​ເປັນ 3 ປີ ແລະ ຖືກ​ຢຶດ​ໃບ​ຂັບ​ຂີ່​ເປັນ​ເວ­ລາ 10 ປີ ຖ້າ​ຜູ້­ກ່ຽວ​ເຮັດ​ຜິດ​ຊ້ຳ​ອີກ (ຂັບ​ລົດ​ຕຳ​ຄົນ​ຈົນ​ເສຍ​ຊີ­ວິດ) ໂທດ​ຈຳ​ຄຸກ​ຈະ​ເພີ່ມ​ຂຶ້ນ​ເປັນ 15 ປີ ສ່ວນ​ການ​ກຳ­ນົດ​ໂທດ​ຈຳ​ຄຸກ​ໃນ​ກົດ­ໝາຍ​ສະ­ບັບ​ເກົ່າ​ນັ້ນ​ແມ່ນ 5 ປີ.

ຂ່າວທີ່ກ່ຽວຂ້ອງ