ຂ່າວຫຼ້າສຸດ

6 ວິທີສັງເກດຂ່າວປອມເທິງ Facebook

209 25 ກ.ລ. 2019 ຫົວຂໍ້ຂ່າວອື່ນໆ

    ປັດ­ຈຸ­ບັນ ມີ​ເວັບ​ໄຊ​ທີ່​ລົງ​ຂ່າວ​ປອມ​ຢູ່​ຂ້ອນ​ຂ້າງ​ຫຼາຍ ແລະ ມີ​ການ​ແບ່ງ­ປັນ​ໄປ​ເທິງ​ສັງ­ຄົມ​ອອນ​ລາຍ​ຕ່າງໆ ໂດຍ​ສະ­ເພາະ Facebook ທີ່​ຄົນ​ລາວ​ນິ­ຍົມ​ໃຊ້​ກັນ​ຫຼາຍ​ທີ່​ສຸດ ເຊິ່ງ​ຫຼາຍ​ຄົນ​ກໍ​ອາດ​ສາ­ມາດ​ໄຈ້​ແຍກ​ດ້ວຍ​ຕົວ​ເອງ​ໄດ້​ວ່າ​ຂ່າວ​ໃດ​ເປັນ​ຂ່າວ​ຈິງ ຂ່າວ​ໃດ​ເປັນ​ຂ່າວ​ປອມ ແຕ່​ກໍ​ຍັງ​ມີ​ຄົນ​ອີກ​ຈຳ­ນວນ​ບໍ່​ໜ້ອຍ ທີ່​ຍັງ​ບໍ່​ສາ­ມາດ​ໄຈ້​ແຍກ​ໄດ້ ຫຼື​ອາດ​ໄຈ້​ແຍກ​ໄດ້​ບໍ່​ຄ່ອຍ​ດີ​ປານ­ໃດ ວັນ​ນີ້​ເຮົາ​ກໍ​ເລີຍ​ຈະ​ມາ​ແນະ­ນຳ​ວິ­ທີ​ສັງ­ເກດ​ຂ່າວ​ປອມ​ດ້ວຍ​ຕົວ​ເອງ​ວ່າ­ການ​ຈະ­ໄຈ້​ແຍກ​ຂ່າວ​ຈິງ​ກັບ​ຂ່າວ​ປອມ​ນັ້ນ ຕ້ອງ​ເບິ່ງ​ແນວ­ໃດ​ແດ່.

1.ເບິ່ງ​ຊື່​ເວັບ​ໄຊ

    ປະ­ການ​ທຳ​ອິດ​ກ່ອນ​ເລີຍ ໃຫ້​ເບິ່ງ​ວ່າ​ຂ່າວ​ດັ່ງ­ກ່າວ​ເປັນ​ລິ້ງ​ຈາກ​ເວັບ​ໄຊ​ໃດ ເປັນ​ເວັບ​ໄຊ ຫຼື​ສຳ­ນັກ​ຂ່າວ​ທີ່​ມີ​ຊື່​ສຽງ​ຫຼື​ບໍ່ ຖ້າ​ຫາກ​ເປັນ​ເວັບ​ໄຊ​ທີ່​ມີ​ຊື່​ສຽງ​ກໍ​ໝັ້ນ​ໃຈ​ໄດ້​ລະ­ດັບ​ໜຶ່ງ​ວ່າ​ບໍ່​ແມ່ນ​ຂ່າວ​ປອມ ນອກ​ເສຍ​ຈາ​ກວ່າ​ຈະ​ເປັນ​ການ​ລົງ​ຂໍ້​ມູນ​ຜິດ­ພາດ ແຕ່​ກໍ​ຕ້ອງ​ລະ­ວັງ​ເວັບ​ໄຊ​ທີ່​ຕັ້ງ­ໃຈ​ໃຊ້​ຊື່​ລອກ​ຮຽນ​ແບບ​ໃຫ້​ຄ້າຍ​ກັບ​ສຳ­ນັກ​ຂ່າວ​ຊື່​ດັງ​ດ້ວຍ ເຮັດ​ໃຫ້​ອາດ​ເຂົ້າ­ໃຈ​ຜິດ​ວ່າ​ເປັນ​ຊື່​ດຽວ​ກັນ​ໄດ້ ຫຼື​ຖ້າ​ຫາກ​ບໍ່​ແມ່ນ​ເວັບ​ໄຊ​ມີ​ຊື່​ສຽງ ກໍ​ອາດ​ເບິ່ງ​ທີ່​ຊື່​ຜູ້​ຂຽນ​ແທນ​ວ່າ​ເປັນ​ທີ່​ຮູ້­ຈັກ ແລະ ໜ້າ​ເຊື່ອ​ຖື​ຫຼື​ບໍ່.

2.ພິ­ຈາ­ລະ­ນາ​ຄວາມ​ສົມ​ເຫດ​ສົມ​ຜົນ

    ອ່ານ​ເນື້ອ​ຫາ​ໃຫ້​ຄົບ​ຖ້ວນ ຢ່າ​ອ່ານ​ພຽງ​ແຕ່​ຫົວ­ຂໍ້​ຂ່າວ ແລ້ວ​ໃຊ້​ຄວາມ​ຮູ້​ຄວາມ​ເຂົ້າ­ໃຈ ແລະ ປະ­ສົບ​ການ​ສ່ວນ​ຕົວ​ພິ­ຈາ­ລະ­ນາ​ເນື້ອ​ຫາ​ຂອງ​ຂ່າວ​ນັ້ນໆ ວ່າ​ມີ​ຄວາມ​ສົມ​ເຫດ​ສົມ​ຜົນ​ຫຼື​ບໍ່ ມີ​ຄວາມ​ເປັນ​ໄປ​ໄດ້​ຫຼາຍ​ໜ້ອຍ​ພຽງ​ໃດ ຖ້າ​ຫາ​ກວ່າ​ເປັນ​ເລື່ອງ​ທີ່​ໜ້າ​ເຫຼືອ​ເຊື່ອ​ຫຼາຍ​ເກີນ​ໄປ ຫຼື​ມີ​ໂອ­ກາດ​ເປັນ​ຈິງ​ໄດ້​ຍາກ ກໍ​ມີ​ທ່າ​ອ່ຽງ​ວ່າ​ຈະ​ເປັນ​ຂ່າວ​ປອມ ນອກ­ຈາກ​ວ່າ​ຈະ​ມາ​ຈາກ​ແຫຼ່ງ ຫຼື​ສຳ­ນັກ​ຂ່າວ​ທີ່​ເຊື່ອ​ຖື​ໄດ້​ແທ້​ຈິງ.

3.ກວດ​ສອບ​ແຫຼ່ງ​ທີ່​ມາ

    ກວດ​ສອບ​ເບິ່ງ​ວ່າ​ຂ່າວ​ດັ່ງ­ກ່າວ​ນັ້ນ​ມີ​ຕົ້ນ­ຕໍ​ມາ​ຈາກ​ແຫຼ່ງ​ໃດ ລວມ​ທັງ​ປຽບ­ທຽບ​ກັບ​ແຫຼ່ງ​ຂ່າວ​ອື່ນໆ ເຊິ່ງ​ອາດ​ມີ​ທັງ​ແຫຼ່ງ​ຂ່າວ​ໃນ​ປະ­ເທດ​ລາວ ແລະ ຕ່າງ­ປະ­ເທດ ເພື່ອ​ເບິ່ງ​ວ່າ​ເນື້ອ​ຫາ​ກົງ​ກັນ ແລະ ຖືກ­ຕ້ອງ​ຫຼື​ບໍ່ ມີ​ການ​ບິດ​ເບືອນ​ຫຼື​ບໍ່ ລວມ​ທັງ​ພິ­ຈາ­ລະ­ນາ​ແຫຼ່ງ​ທີ່​ມາ​ຂອງ​ຂ່າວ​ວ່າ​ມີ​ຄວາມ​ໜ້າ​ເຊື່ອ​ຖື​ຫຼາຍ​ໜ້ອຍ​ພຽງ​ໃດ.

4.ເຖິງ​ແມ່ນ​ມີ​ຮູບ​ປະ­ກອບ ກໍ​ຢ່າ​ວາງ­ໃຈ

    ເຖິງ​ແມ່ນ​ວ່າ​ຂ່າວ​ນັ້ນໆ​ຈະ​ມີ​ຮູບ​ປະ­ກອບ​ຂ່າວ ກໍ​ບໍ່​ໄດ້​ເປັນ​ຕົວ​ຊ່ວຍ​ຢືນ­ຢັນ​ວ່າ​ຈະ​ເປັນ​ຂ່າວ​ຈິງ​ສະ­ເໝີ​ໄປ ເພາະ​ຕໍ່­ໃຫ້​ຮູບ​ນັ້ນ​ເປັນ​ຂອງ​ຈິງ ບໍ່​ວ່າ​ຈະ​ເປັນ​ຮູບ​ທີ່​ຜ່ານ​ການ​ຕັດ​ຕໍ່​ຫຼື​ບໍ່​ກໍ​ຕາມ ກໍ​ອາດ​ຈະ​ເປັນ​ຮູບ​ຂອງ​ຂ່າວ​ອື່ນ​ທີ່​ຖືກ​ລັກ​ມາ​ໃຊ້​ປະ­ກອບ​ຂ່າວ​ປອມ​ກໍ​ເປັນ​ໄດ້.

5.ສື່​ທີ່​ນຳ​ສະ­ເໜີ ເປັນ­ກາງ​ຫຼື​ບໍ່

    ໃນ​ບາງ​ຂ່າວ​ນັ້ນ ຄວາມ​ເປັນ­ກາງ​ຂອງ​ສຳ­ນັກ​ຂ່າວ ຫຼື ສື່ ລວມ​ທັງ​ຄົນ​ຊຽນ​ຂ່າວ​ທີ່​ນຳ​ສະ­ເໜີ​ນັ້ນ​ກໍ​ມີ​ຜົນ​ເຊັ່ນ​ກັນ ເຖິງ​ແມ່ນ​ວ່າ​ຈະ​ບໍ່​ໄດ້​ເປັນ​ຂ່າວ​ປອມ ແຕ່​ການ​ທີ່​ສື່​ມີ​ອະ­ຄະ­ຕິ ຫຼື​ຄວາມ​ລຳ­ອຽງ ກໍ​ອາດ​ເຮັດ​ໃຫ້​ເນື້ອ​ຫາ​ຂອງ​ຂ່າວ​ມີ​ຄວາມ​ບິດ​ເບືອນ ແລະ ບໍ່​ກົງ​ກັບ​ຄວາມ​ເປັນ​ຈິງ​ໄດ້​ເໝືອນ​ກັນ ເຊິ່ງ​ກໍ​ບໍ່​ຖື​ວ່າ​ຕ່າງ​ຈາກ​ຂ່າວ​ປອມ​ປານ­ໃດ ເພາະ​ເປັນ​ການ​ນຳ​ສະ­ເໜີ​ສິ່ງ​ທີ່​ບໍ່​ເປັນ­ຄວາມ​ຈິງ.

6.ລໍ­ຖ້າ​ຜູ້​ຊ່ຽວ­ຊານ​ມາ​ຢືນ­ຢັນ

    ຂ່າວ​ໃນ​ຫຼາຍໆ​ເລື່ອງ ກໍ​ຄວນ​ລໍ­ຖ້າ​ໃຫ້​ຜູ້​ຊ່ຽວ­ຊານ​ໃນ​ເລື່ອງ​ນັ້ນໆ​ອອກ​ມາ​ພິ­ສູດ ຫຼື​ຢືນ­ຢັນ​ກ່ອນ​ວ່າ​ເປັນ​ເລື່ອງ​ຈິງ ໂດຍ​ສະ­ເພາະ​ເລື່ອງ​ກ່ຽວ​ກັບ​ສຸ­ຂະ­ພາບ ອາ­ຫານ ແລະ ຢາ ທີ່​ຕ້ອງ​ພິ­ຈາ­ລະ­ນາ​ໃຫ້​ຫຼາຍ​ກ່ອນ​ທີ່​ຈະ​ຕັດ­ສິນ​ໃຈ​ເຊື່ອ ເພາະ​ຫາກ​ເຊື່ອ​ຂ່າວ​ປອມ ແລ້ວ​ນຳ­ໄປ​ປະ­ຕິ­ບັດ​ຕາມ ກໍ​ອາດ​ສົ່ງ​ຜົນ​ກະ­ທົບ​ຕໍ່​ຊີ­ວິດ​ຂອງ​ຕົນ​ເອງ​ໄດ້.

ວ. ດາລາ​ວົງ - ນຳ​ສະເໜີ

ຂ່າວທີ່ກ່ຽວຂ້ອງ