ເດືອນ​ມິຖຸນາ​ປີ​ນີ້​ຮ້ອນ​ທີ່​ສຸດ​ໃນ​ຮອບ 140 ປີ

164 25 ກ.ລ. 2019 ຂ່າວຕ່າງປະເທດ
ເດືອນ​ມິຖຸນາ​ປີ​ນີ້​ຮ້ອນ​ທີ່​ສຸດ​ໃນ​ຮອບ 140 ປີ

    ອົງການ​ມະຫາ​ສະໝຸດ ແລະ ຊັ້ນ​ອາກາດ​ແຫ່ງ​ຊາດ ສ ອາ​ເມ​ຣິ​ກາ (NOAA) ໃຫ້​ຮູ້​ວ່າ ເດືອນ​ມິຖຸນາ​ປີ​ນີ້ ເປັນ​ເດືອນ​ມິຖຸນາ​ທີ່​ຮ້ອນ​ເປັນ​ສະຖິຕິ​ຂອງ​ໜ່ວຍ​ໂລກ ຂໍ້​ມູນ​ຂອງ NOAA ທີ່​ຫາ​ກໍ​ນຳ​ອອກ​ມາ​ເປີດເຜີຍ ໃຫ້​ຮູ້​ວ່າ ອຸ່ນ​    ຫະ​ພູມ​ໂດຍ​ສະເລ່ຍ​ຂອງ​ທົ່ວ​ໂລກ ໃນ​ເດືອນ​ມິຖຸນາ​ທີ່​ຜ່ານ​ມາ ເພີ່ມ​ຂຶ້ນ 0,95 ອົງສາ C ເມື່ອ​ທຽບໃສ່​ລະດັບ​ອຸ່ນ​ຫະ​ພູມ​ສະເລ່ຍ ທີ່​ບັນທຶກ​ໄດ້​ຕະຫຼອດ​ທັງ​ສະຕະວັດ​ທີ 20 ຄື​ຢູ່​ທີ່ 15,5 ອົງສາ C.

     ດັ່ງນັ້ນ ເດືອນ​ມິຖຸນາ ປີ 2019 ເປັນ​ເດືອນ​ທີ 414 ຕິດຕໍ່​ກັນ ທີ່​ອຸ່ນ​ຫະ​ພູມ ສູງ​ກວ່າ​ລະດັບ​ສະເລ່ຍ​ຂອງ​ສະຕະວັດ​ທີ 20 ນອກຈາກ​ນັ້ນແລ້ວ ເດືອນ​ມິຖຸນາ ປີ 2019 ກໍ​ຍັງ​ເປັນ​ເດືອນ​ມິຖຸນາ​ທີ່​ຮ້ອນ​ທີ່​ສຸດ ຕາມ​ການ​ບັນທຶກ​ໄວ້​ໂດຍ NOAA ພາຍ​ໃນ 140 ປີ​ທີ່​ຜ່ານ​ມາ ແລະ ເປັນ 9/10 ຂອງ​ເດືອນ​ມິຖຸນາ​ທີ່​ຮ້ອນ​ທີ່​ສຸດ​ໃນ 140 ປີ ແມ່ນ​ຢູ່​ໃນ​ໄລຍະ​ແຕ່​ປີ 2010 ຮອດ​ປັດຈຸບັນ.

     ສະຖິຕິ​ຂອງ NOAA ໃຫ້​ຮູ້​ວ່າ ບໍ່​ສະເພາະ​ແຕ່​ທະວີບ​ເອີ​ຣົບ​ເທົ່າ​ນັ້ນ ທີ່​ຜ່ານ​ຜ່າ​ເດືອນ​ມິຖຸນາ ທີ່​ຮ້ອນ​ທີ່​ສຸດ​ໃນ​ປະຫວັດສາດ ແຕ່​ຫາກ​ຍັງ​ລວມ​ເຖິງ​ທະວີບ​ອາ​ຟະ​ຣິກ​ກາ ເຂດ ຮາ​ວາຍ ສ ອາ​ເມ​ຣິ​ກາ ແລະ  ອາ​ເມ​ຣິ​ກາ​ໃຕ້ ຕ່າງ​ກໍ​ຮັບ​ຮູ້​ອຸ່ນ​ຫະ​ພູມ ໃນ​ເດືອນ​ດຽວ​ກັນ ຢູ່​ທີ່​ສູງ​ສຸດ​ນັບ​ແຕ່​ກ່ອນ​ມາ​ຮອດ ປັດຈຸບັນ NOAA ກໍ​ໃຫ້​ຮູ້​ວ່າ ຫຼາຍ​ເຂດ​ໃນ​ອາ​ເມ​ຣິ​ກາ​ໃຕ້ ອາຊີ​ຕາເວັນ​ອອກ ແລະ ທິດຕາເວັນຕົກ ຂອງ​ກາ​ນາ​ດາ ໄດ້​ຜ່ານ​ເຄິ່ງ​ຕົ້ນ​ປີ 2019 ທີ່​ຮ້ອນ​ທີ່​ສຸດ​ໃນ​ປະຫວັດສາດ.

     NOAA ແຈ້ງ​ເຕືອນ​ວ່າ ການ​ທີ່​ອຸ່ນ​ຫະ​ພູມ​ສູງ​ເປັນ​ເວລາ​ສອງ​ເດືອນ​ຕິດຕໍ່​ກັນ (ເດືອນ​ພຶດສະພາ ແລະ ເດືອນ​ມິຖຸນາ) ໄດ້​ເຮັດ​ໃຫ້ການ​ປົກ​ຄຸມ​ຂອງ​ນ້ຳ​ແຂງ​ຢູ່​ໃນ​ທະເລ​ເຂດ​ຂົ້ວ​ໂລກ​ໃຕ້ ລົງ​ສູ່​ລະດັບ​ຕ່ຳ ເທື່ອ​ໃໝ່ ໃນ​ຂະນະ​ດຽວ​ກັນ ແດດ​ຮ້ອນ​ອົບເອົ້າ​ຢູ່​ໃນ​ທະວີບ​ເອີ​ຣົບ ແລະ ທະວີບ​ອາ​ເມ​ຣິ​ກາ ໄດ້​ກາຍເປັນ​ຈຸດ​ສົນໃຈ​ໃນ​ໄລຍະ​ທີ່​ຜ່ານ​ມາ ເມື່ອ​ແດດ​ຮ້ອນ​ອົບເອົ້າ ສືບຕໍ່​ເປັນ​ຜົນ​ກະທົບ ຮ້າຍ​ແຮງ ຕໍ່​ເຂດ​ອາ​ເມ​ຣິ​ກາ​ເໜືອ ແລະ ເອີ​ຣົບ.

ຂ່າວທີ່ກ່ຽວຂ້ອງ