ອົງການອີຟັດ ເນັ້ນລົງທຶນໃສ່ຊາວກະສິກອນຂະໜາດນ້ອຍ

311 24 ກ.ລ. 2019 ຂ່າວໜ້າ​ໜຶ່ງ
ອົງການອີຟັດ ເນັ້ນລົງທຶນໃສ່ຊາວກະສິກອນຂະໜາດນ້ອຍ

    ອົງ­ການ​ກອງ​ທຶນ​ສາ­ກົນ​ເພື່ອ​ການ​ພັດ­ທະ­ນາ​ກະ­ສິ­ກຳ (ອີ​ຟັດ) ຂອງ​ສະ­ຫະ​ປະ­ຊາ​ຊາດ ເລີ່ມ​ຈັດ​ຕັ້ງ​ປະ­ຕິ­ບັດ​ວຽກ​ງານ​ຢູ່ ສປປ ລາວ ແຕ່​ປີ 1978 ເປັນ­ຕົ້ນ​ມາ ໂດຍ​ສາ­ມາດ ຈັດ​ຕັ້ງ​ປະ­ຕິ­ບັດ 15 ໂຄງ­ການ ມູນ​ຄ່າ​ການ​ລົງ­ທຶນ 156 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 1.361,66 ຕື້​ກີບ ມີ​ຜູ້​ໄດ້​ຮັບ​ຜົນ​ປະ­ໂຫຍດ 329.775 ຄົວ​ເຮືອນ ປັດ­ຈຸ­ບັນ​ມີ 3 ໂຄງ­ການ​ກຳ­ລັງ​ດຳ­ເນີນ​ການ­ຈັດ­ຕັ້ງ​ປະ­ຕິ­ບັດ ແລະ ໃນ​ປີ 2020-2026 ກຽມ​ສືບ­ຕໍ່​ສະ­ໜັບ­ສະ­ໜູນ​ໂຄງ­ການ​ຊົນ​ລະ​ກະ­ເສດ​ການ​ຜະ­ລິດ​ເພື່ອ​ເປັນ​ສິນ­ຄ້າ ມູນ​ຄ່າ 30 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 261,9 ຕື້​ກີບ.

    ວັນ​ທີ 22-23 ກໍ­ລະ­ກົດ 2019 ທ່ານ ກີວ​ເບີດ ຮຸງ​ໂບ ປະ­ທານ​ໃຫຍ່​ອົງ­ການ​ອີ​ຟັດ ໄດ້​ເດີນ­ທາງ​ຢ້ຽມ­ຢາມ​ແຂວງ​ຊຽງ​ຂວາງ ເພື່ອ​ລົງ​ຢ້ຽມ­ຢາມ​ໂຄງ­ການ​ຍຸດ​ທະ​ສາດ​ສະ­ໜັບ­ສະ­ໜູນ​ການ​ຄ້ຳ­ປະ­ກັນ​ສະ­ບຽງ​ອາ­ຫານ ແລະ ໂພ­ຊະ​ນາ​ການ ພ້ອມ​ທັງ​ໄດ້​ເຂົ້າ​ຢ້ຽມ​ຄຳ­ນັບ​ທ່ານ ບຸນ​ຕົ້ນ ຈັນ­ທະ​ພອນ ເຈົ້າ­ແຂວງ​ຊຽງ​ຂວາງ ອຳ­ນາດ​ການ​ປົກ­ຄອງ​ແຂວງ ແລະ ອຳ­ນາດ​ການ​ປົກ­ຄອງ​ເມືອງ​ຄຳ ເພື່ອ​ສັງ­ເກດ​ການ​ດຳ­ລົງ​ຊີ­ວິດ​ຂອງ​ປະ­ຊາ­ຊົນ ທີ່​ໄດ້​ຮັບ​ຜົນ​ກະ­ທົບ​ຈາກ​ໂຄງ­ການ ລວມ​ທັງ​ການ​ຮຽນ​ຮູ້​ກ່ຽວ​ກັບ​ສິ່ງ​ທ້າ​ທາຍ​ທີ່​ປະ­ຊາ­ຊົນ​ຍັງ​ປະ​ເຊີນ​ໜ້າ​ຢູ່ ໂຄງ­ການ​ດັ່ງ­ກ່າວ​ໄດ້​ຮ່ວມ​ມື​ຈັດ​ຕັ້ງ​ປະ­ຕິ­ບັດ​ລະ­ຫວ່າງ​ພາກ​ລັດ ແລະ ເອ­ກະ​ຊົນ ໄດ້​ໃຫ້­ການ​ຊ່ວຍ­ເຫຼືອ​ຊາວ​ກະ­ສິ­ກອນ​ໃນ​ການ​ຜະ­ລິດ​ພືດ​ຜັກ ແລະ ສັດ­ລ້ຽງ​ທີ່​ເປັນ​ທີ່​ຕ້ອງ­ການ​ຂອງ​ຕະ­ຫຼາດ.

    ອົງ­ການ​ອີ​ຟັດ ໄດ້​ໃຫ້­ການ​ສະ­ໜັບ­ສະ­ໜູນ​ຈັດ​ຕັ້ງ​ປະ­ຕິ­ບັດ​ໂຄງ­ການ​ໃນ​ແຂວງ​ຊຽງ​ຂວາງ ໂດຍ​ແບ່ງ​ເປັນ 2 ໄລ­ຍະ​ຄື: ໄລ­ຍະ​ທີ 1 ຈັດ​ຕັ້ງ​ປະ­ຕິ­ບັດ ປີ 1991-1997 ໄດ້​ໃຫ້​ທຶນ​ສະ­ໜັບ­ສະ­ໜູນ 10 ລ້ານ​ໂດ​ລາ​ສະ­ຫະ­ລັດ ໄລ­ຍະ​ທີ 2 ປີ 1999-2005 ໄດ້​ໃຫ້​ທຶນ​ສະ­ໜັບ­ສະ­ໜູນ 9,6 ລ້ານ​ໂດ​ລາ​ສະ­ຫະ­ລັດ ນອກ​ນີ້ ຍັງ​ໄດ້​ຈັດ​ຕັ້ງ​ປະ­ຕິ­ບັດ​ໂຄງ­ການ​ລ້ຽງ­ສັດ​ເປັນ​ສິນ­ຄ້າ​ມູນ​ຄ່າ 10 ລ້ານ​ໂດ​ລາ​ສະ­ຫະ­ລັດ ໄລ­ຍະ​ຈັດ​ຕັ້ງ​ປະ­ຕິ­ບັດ​ໃນ​ປີ 2016-2021 ໂຄງ­ການ​ກະ­ສິ­ກຳ​ເພື່ອ​ໂພ­ຊະ​ນາ​ການ​ມູນ​ຄ່າ 30 ລ້ານ​ໂດ​ລາ​ສະ­ຫະ­ລັດ ເຊິ່ງ​ການ​ໃຫ້​ທຶນ​ຂອງ​ອົງ­ການ​ອີ​ຟັດ ເປັນ​ການ​ປະ­ກອບ­ສ່ວນ​ໃຫຍ່​ຫຼວງ​ໃຫ້­ການ​ພັດ­ທະ­ນາ​ທີ່​ຍືນ​ຍົງ​ຂອງ​ແຂວງ ເຊິ່ງ​ທຶນ​ດັ່ງ­ກ່າວ​ໄດ້​ນຳ​ມາ​ກໍ່­ສ້າງ​ເສັ້ນ­ທາງ​ໄປ​ສູ່​ຊົນ­ນະ­ບົດ ສ້າງ​ຊົນ­ລະ­ປະ­ທານ ສະ­ໜອງ​ນ້ຳ​ໃຫ້​ປະ­ຊາ­ຊົນ​ປູກ​ເຂົ້າ ສະ­ໜອງ​ແນວ​ພັນ​ງົວ ແລະ ອົບ­ຮົມ​ວິ­ຊາ​ການ​ລ້ຽງ ໃຫ້​ປະ­ຊາ­ຊົນ​ເພື່ອ​ຊຸກ­ຍູ້​ໃນ​ການ​ປະ­ກອບ​ອາ­ຊີບ​ລ້ຽງ​ງົວ​ເປັນ​ສິນ­ຄ້າ ສ້າງ​ນ້ຳ​ລິນ ແລະ ນ້ຳ​ສະ­ອາດ ລວມ​ທັງ​ສ້າງ​ສຸກ­ສາ­ລາ ແລະ ກິດ­ຈະ­ກຳ​ນ້ອຍ​ຕ່າງໆ​ທີ່​ເປັນ​ການ​ຊຸກ­ຍູ້​ການ​ຜະ­ລິດ​ເປັນ​ສິນ­ຄ້າ​ຂອງ​ປະ­ຊາ­ຊົນ ເວົ້າ​ລວມ​ແລ້ວ ໂຄງ­ການ​ທີ່​ຈັດ​ຕັ້ງ​ປະ­ຕິ­ບັດ​ພາຍ​ໃນ​ແຂວງ ລ້ວນ​ແຕ່​ປະ­ກອບ­ສ່ວນ​ແກ້​ໄຂ​ຄວາມ­ທຸກ​ຍາກ​ຂອງ​ປະ­ຊາ­ຊົນ.

ຂ່າວທີ່ກ່ຽວຂ້ອງ