ຂ່າວຫຼ້າສຸດ

ສ ເກົາຫຼີ ຊ່ວຍເຫຼືອລົດຂົນສົ່ງຄົນເຈັບ ໃຫ້ພະແນກສາທາຫຼາຍແຂວງ

280 24 ກ.ລ. 2019 ຂ່າວໜ້າ​ໜຶ່ງ
ສ ເກົາຫຼີ ຊ່ວຍເຫຼືອລົດຂົນສົ່ງຄົນເຈັບ ໃຫ້ພະແນກສາທາຫຼາຍແຂວງ

    ພິ­ທີ​ມອບ-ຮັບ​ລົດ Ambulance ມື​ສອງ ທີ່​ໄດ້​ຮັບ​ການ​ຊ່ວຍ­ເຫຼືອ​ຈາກ​ສະ­ມາ­ຄົມ​ອາ​ຣຶມ​ດາ​ອຸນ​ຊາ​ຣາມ​ດຶ​ລ ແລະ ອົງ­ການ​ກູ້​ໄພ​ນະ­ຄອນ​ບູ​ຊານ ສ ເກົາ­ຫຼີ ຈັດ​ຂຶ້ນ​ວັນ​ທີ 22 ກໍ­ລະ­ກົດ 2019 ຢູ່​ກະ­ຊວງ​ສາ­ທາ­ລະ­ນະ​ສຸກ ເຊິ່ງ​ມອບ​ໂດຍ​ທ່ານ Woo Jae Bong ປະ­ທານ​ອົງ­ການ​ກູ້​ໄພ​ນະ­ຄອນ​ບູ​ຊານ ສ ເກົາ­ຫຼີ ແລະ ທ່ານ IM Moo Hong ປະ­ທານ​ສະ­ມາ­ຄົມ​ອາ​ຣຶມ​ດາ​ອຸນ​ຊາ​ຣາມ​ດຶ​ລ ສ ເກົາ­ຫຼີ ແລະ ຮັບ​ໂດຍ​ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ມີ​ທ່ານ Shin Sung Soon ເອກ​ອັກ​ຄະ​ລັດ​ຖະ​ທູດ ສ ເກົາ­ຫຼີ ປະ­ຈຳ​ລາວ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ລົດ​ທີ່​ນຳ​ມາ​ມອບ​ຄັ້ງ​ນີ້​ມີ 8 ຄັນ ມູນ​ຄ່າ 515.405 ໂດ​ລາ​ສະ­ຫະ­ລັດ ຫຼື ປະ­ມານ 4,5 ຕື້​ກີບ ເຊິ່ງ ມອບ​ໃຫ້​ແຂວງ​ບໍ່​ແກ້ວ ໄຊ​ຍະ​ບູ​ລີ ຫົວ­ພັນ ຊຽງ​ຂວາງ ສາ­ລະ​ວັນ ໄຊ​ສົມ­ບູນ ແລະ ແຂວງ​ວຽງ​ຈັນ ໂດຍ​ຜ່ານ​ການ​ຊ່ວຍ­ເຫຼືອ​ຈາກ​ຄະ­ນະ​ສະ­ມາ­ຊິກ​ສະ­ພາ​ແຫ່ງ​ຊາດ ເຂດ 9 ແຂວງ​ຊຽງ​ຂວາງ  ທີ່​ໄດ້​ເອົາ­ໃຈ­ໃສ່​ຂົນ ຂວາຍ​ເຫື່ອ­ແຮງ​ໃນ​ການ​ຂໍ​ການ​ຊ່ວຍ­ເຫຼືອ​ຄັ້ງ​ນີ້ ສອງ​ອົງ­ການ​ດັ່ງ­ກ່າວ​ໄດ້​ປະ­ກອບ­ສ່ວນ​ຊ່ວຍ­ເຫຼືອ​ຂະ­ແໜງ ສາ­ທາ­ລະ­ນະ​ສຸກ​ລາວ​ແຕ່​ປີ 2015 ເປັນ­ຕົ້ນ​ມາ ໂດຍ​ສະ­ເພາະ​ການ​ຊ່ວຍ­ເຫຼືອ​ສ້າງ​ໂຮງ​ໝໍ­ນ້ອຍ ພ້ອມ​ທັງ​ປະ­ກອບ​ອຸ­ປະ­ກອນ​ການ​ແພດ ແລະ ລົດ Ambulance 1 ຄັນ​ໃຫ້​ເມືອງ​ຄຳ ແຂວງ​ຊຽງ​ຂວາງ ແລະ ເມືອງ​ຈຳ​ພອນ ແຂວງ ສະ­ຫວັນ​ນະ​ເຂດ ນອກ​ນີ້ ຍັງ​ໄດ້​ສືບ­ຕໍ່​ໃຫ້­ການ​ຊ່ວຍ­ເຫຼືອ​ລົດ Ambulance 7 ຄັນ ປີ 2018 ແລະ ເພີ່ມ​ອີກ 8 ຄັນ ປີ 2019 ລວມ​ມູນ​ຄ່າ​ການ​ຊ່ວຍ­ເຫຼືອ 1.340.105 ໂດ​ລາ ຫຼື ປະ­ມານ 11 ຕື້​ກີບ ເປັນ​ການ​ປະ­ກອບ­ສ່ວນ​ອັນ​ສຳ­ຄັນ​ໃນ​ການ​ພັດ­ທະ­ນາ​ວຽກ​ງານ​ສາ­ທາ­ລະ­ນະ​ສຸກ ເວົ້າ​ສະ­ເພາະ​ເປັນ​ເງື່ອນ­ໄຂ​ເຮັດ​ໃຫ້​ລາວ ສາ­ມາດ​ບັນ­ລຸ​ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ ດ້ານ​ການ​ບໍ­ລິ­ການ​ສາ­ທາ­ລະ­ນະ​ສຸກ​ໃຫ້​ປົກ​ຄຸມ​ທົ່ວ​ປະ­ເທດ.

ຂ່າວທີ່ກ່ຽວຂ້ອງ